Danimarkaya ikigünlük səfər zamanı ABŞ Konqresinin 11 üzvü Kopenhagendə mətbuat konfransı keçirərək bəyan ediblər ki, bu səfər onlara Danimarka ilə Qrenlandiya arasında münasibətləri, həmçinin Danimarka Krallığı daxilindəki vəziyyəti daha yaxşı anlamağa imkan verib.
AZƏRTAC xəbər verir ki, nümayəndə heyəti Qrenlandiyaya dəstəyin nümayiş etdirilməsinin vacibliyini və əldə olunmuş nəticələri Amerika ictimaiyyətinə və ABŞ administrasiyasına çatdırmaq niyyətini vurğulayıb. Bununla yanaşı, ekspertlərin fikrincə, amerikalı qanunvericilər gələcək siyasi addımlar barədə konkret cavablardan yayınırdılar.
Demokrat Partiyasından senator Kris Kuns qeyd edib ki, səfərin məqsədi ilk növbədə məlumat əldə etmək idi. Həmçinin konqresmenlər Danimarkanın ABŞ-ın müttəfiqi kimi strateji əhəmiyyətini vurğulayıb və nümayəndə heyətində Respublikaçılar Partiyasının təmsilçilərinin olmamasının bu ölkəyə və Qrenlandiyaya respublikaçılar tərəfindən dəstəyin olmaması anlamına gəlmədiyini bildiriblər.
“250 il ərzində Birləşmiş Ştatların Danimarkanın simasında yaxın müttəfiqi var”, – deyə o bildirib.
K. Kuns əlavə edib ki, ABŞ-ın Danimarkaya hazırkı münasibəti gələcəkdə Amerikanın beynəlxalq əlaqələrinə zərər vura bilər.
Qeyd edək ki, bu gün Danimarka və Qrenlandiyada adanın öz müqəddəratını təyin etmək hüququna dəstək məqsədilə kütləvi nümayişlər keçirilib.
Aksiyalar Kopenhagen və Nuuk da daxil olmaqla bir neçə şəhərdə baş tutub və amerikalı konqresmenlərin Danimarka paytaxtına səfəri ilə eyni vaxta təsadüf edib. Kopenhagendə etirazın mərkəzi nöqtəsi şəhər meriyası qarşısındakı meydan olub. Burada iştirakçılar Qrenlandiya bayraqları ilə adanın ABŞ-ın nəzarətinə verilməsi ideyasına etirazlarını ifadə edib və Qrenlandiya ilə həmrəy olduqlarını vurğulayıblar. Nümayişçilər bildiriblər ki, bu cür planları öz həyat tərzlərinə təhlükə hesab edir və adanın suverenliyinə hörmət olunmasını tələb edirlər.
jpg_1772540760.jpg)
jpeg_1772540615.jpeg)
19 (1)jpg_1771885865.jpg)
