1990-cı ilin 20 Yanvarı Azərbaycan tarixində yalnız bir faciə günü deyil, həm də milli oyanışın qanla yazılmış səhifəsidir. O gecə Bakının üzərinə çökən qaranlıq təkcə tankların kölgəsi deyildi, azadlıq arzularının sınağa çəkildiyi bir məqam idi. Sovet ordusunun dinc əhaliyə qarşı törətdiyi amansız qırğın xalqın iradəsini sındırmaq məqsədi daşıyırdı. Lakin güllələr susdurmalı olduğu səsləri daha da ucaltdı. Küçələrdə axan qan, azadlıq uğrunda atılan ilk ciddi addımların rəmzinə çevrildi. Şəhid olanlar təkcə bir gecənin qurbanları deyil, müstəqil Azərbaycanın bünövrəsini qoyanlardır. 20 Yanvar xalqın qorxmadığını, geri çəkilmədiyini bütün dünyaya göstərdi. Bu faciə sovet rejiminin həqiqi simasını ifşa etdi. Eyni zamanda, milli birliyin və həmrəyliyin gücünü ortaya qoydu. 20 Yanvar yaddaşımızda kədər qədər qürur daşıyan müqəddəs bir tarix kimi yaşayır.
AZƏRTAC xəbər verir ki, 20 Yanvar faciəsinin 36-cı ildönümündə paytaxtın “20 Yanvar” dairəsində ucaldılmış memorial abidə kompleksi gün ərzində izdihamlı ziyarətçiləri qəbul edib. Şəhidlərin əziz xatirəsini anmaq üçün abidəyə axışan insanların əlindəki tər çiçəklər, baxışlarındakı qürur və mübarizə ruhu 20 Yanvarın milli yaddaşımızdakı sarsılmaz yerini bir daha nümayiş etdirirdi. Abidə önündə hökm sürən sükut və ehtiram dolu ab-hava həmin faciənin ağrısını illər keçsə də unutmadığımızı göstərirdi.
Bu qanlı gecədə həyatını itirənlərin xatirəsi təkcə kədər deyil, həm də azadlıq və müstəqillik uğrunda göstərilən tarixi iradə kimi yad olunurdu. Ziyarətə gələnlər şəhidlərin ruhu qarşısında baş əyərək, onların fədakarlığının bugünkü müstəqil və suveren Azərbaycanın təməl daşlarından biri olduğunu vurğulayırdılar. 20 Yanvar hadisələri xalqın sarsılmaz iradəsini və milli birliyini əks etdirən yaddaş günü kimi bir daha xatırlanırdı.
Yasamal Rayon İcra Hakimiyyətinin və bir sıra qeyri-hökumət təşkilatlarının nümayəndələri tərəfindən abidə önünə əklil və gül dəstələri düzülərək, Vətən uğrunda canlarından keçən şəhidlərin əziz xatirəsi dərin ehtiramla yad edilib.
Tədbir çərçivəsində 20 Yanvar şəhidlərinin xatirəsi bir dəqiqəlik sükutla anılıb, Azərbaycanın müstəqilliyi və suverenliyi naminə həyatlarını qurban vermiş qəhrəmanların ruhuna hörmət və ehtiram bir daha ifadə olunub.
Ziyarətə gələnlər arasında 20 Yanvar şəhidi Rahib Hüseynovun qızı Mariya Vəlixanova da olub. O, AZƏRTAC-a açıqlamasında bildirib ki, atası şəhid olanda özü hələ azyaşlı olub. Sonradan böyüyəndə atasının 20 Yanvar şəhidi olduğunu öyrənib. Hadisələri dəqiq xatırlamasa da, hər zaman atasının yolunu gözlədiyini deyib. Şəhid qızı kimi arzusunun gələcək nəsillərin şəhidlərimizi daim yad etməsi və onları heç vaxt unutmamasıdır. Mariya Vəlixanova bütün şəhidlərimizə Allahdan rəhmət diləyib.
Anım mərasimində iştirak edən hadisə şahidi, keçmiş hərbiçi Cəbrayıl Mehdiyev isə bildirib ki, 20 Yanvar hadisələri onun gözləri qarşısında baş verib. O qeyd edib ki, həmin dövrdə yaşadığı məhəllədə xalq sovet hakimiyyətinə qarşı ayağa qalxmışdı. Onun sözlərinə görə, bu hadisələrə təkcə keçmişin faciəsi kimi deyil, Azərbaycanın gələcəyə doğru atdığı tarixi addım kimi baxmaq lazımdır. Cəbrayıl Mehdiyev vurğulayıb ki, məhz xalqın birliyi və mübarizəsi nəticəsində bu gün Azərbaycan müstəqil, azad və sülh şəraitində yaşayır.
Keçmiş hərbçi, həmçinin Birinci Qarabağ müharibəsinin iştirakçısı olduğunu qeyd edib, gələcəkdə Zəngəzur dəhlizinin açılacağına ümidvar olduğunu bildirib. O, Göyçəyə getməyi arzuladığını deyərək, dövlətimizin başçısına cansağlığı, ölkəmizə isə daim sülh və əmin-amanlıq arzulayıb.
20 Yanvar Azərbaycan xalqının azadlıq iradəsinin qanla yazıldığı tarixdir. Bu faciənin hər il dərin ehtiramla anılması bir daha sübut edir ki, Vətən naminə canından keçən şəhidlərimizin xatirəsi zamanın sınağından keçərək Azərbaycan xalqının yaddaşında əbədi həkk olunub. Onların tökdüyü qan azadlıq yolunun susmayan çağırışına çevrilib və bu çağırış nəsildən-nəslə ötürülür. 20 Yanvar şəhidləri xalqımızın qürur mənbəyi, müstəqilliyimizin sarsılmaz rəmzi kimi daim yaşayacaq.
jpg_1770988918.jpg)
