"Ordu istənilən dövlətin gücü, qüdrəti və möhkəmliyidir. Azərbaycan Silahlı Qüvvələri 1991-ci ildə dövlət müstəqilliyimiz bərpa edildiyi gündən müstəqilliyimizin keşiyində durub. Ona görə də 26 İyun təkcə hərbçilərimizin deyil, Azərbaycan xalqının bayramıdır". 
Milli Məclisin deputatı Aydın Mirzəzadə "Azərbaycan" qəzetinə açıqlamasında bildirib ki, ilk dövrlərdə zəif hakimiyyətin olması Silahlı Qüvvələrin normal formalaşmasına da ciddi təsir edib. Bununla belə özünümüdafiə dəstələri, ayrı-ayrı regionlarda əlinə silah götürüb torpağını müdafiə edənlər erməni işğalçıları ilə çox ciddi mübarizə aparıblar. 
Deputatın sözlərinə görə, 1990-cı illərdə çox təəssüf ki, Silahlı Qüvvələrin hələ tam formalaşmaması ərazimizin müəyyən hissəsinin itirilməsinə səbəb oldu. Ancaq Ulu Öndər Heydər Əliyevin hakimiyyətə gəlişi və ondan sonra dövlət quruculuğunda ciddi islahatların aparılması bütün sahələr kimi ordu quruculuğuna ciddi təsir etdi. Böyüyən büdcəmizin əhəmiyyətli hissəsi yeni silahların alınmasına, təlimlərin keçirilməsinə, hərbi qulluqçuların sosial problemlərinin həll edilməsinə yönəldildi. Ordumuzun 
NATO standartlarına uyğun olaraq qurulması, hərbi təhsilin keyfiyyətinin artırılması öz nəticəsini verdi. Azərbaycan Ordusu ildən-ilə yüksək peşəkarlığını göstərməyə başlayırdı. Erməni işğalçılarının Azərbaycanın yeni ərazilərini işğal etmək cəhdinin qarşısı alınır, onların təxribatlarına təsirli cavablar verilirdi. "Cəbhə xəttində ara-sıra baş verən lokal döyüşlərdə ordumuz Ermənistan silahlı qüvvələrini ciddi itkilər verməyə məcbur edirdi. Beləliklə, 2016-cı ilin dördgünlük Aprel döyüşlərində Azərbaycan Ordusu ilk qələbəsini qazandı. Ulu Öndər Heydər Əliyevin dövlət quruculuğu siyasətini uğurla davam etdirən Prezident İlham Əliyevin hərbi quruculuq siyasəti ilkin nəticəsini verdi. Azərbaycan qətiyyətlə torpaqlarının işğaldan azad edilməsi istiqamətində çox ciddi siyasət aparmağa başladı və 2020-ci ildə 44 günlük müharibədə torpaqlarının bir hissəsini qəhrəmanlıqla işğaldan azad etdi. Bəzilərini isə döyüşsüz geri qaytardı. Ordumuz Azərbaycan-Ermənistan sərhədinə çıxaraq ərazi bütövlüyümüzü ciddi şəkildə qorumağa başladı".
Ötən il sentyabrın 20-də birgünlük antiterror tədbirinin Silahlı Qüvvələrin qüdrətini bir daha göstərdiyini vurğulayan A.Mirzəzadə qeyd edib ki, Azərbaycan Ordusu bu gün regionun ən güclü ordusu kimi dövlət müstəqilliyinin keşiyində durur: "Ordu quruculuğuna dövlət səviyyəsində çox ciddi əhəmiyyət verilir. Bütün dövrlərdə Azərbaycan Ordusu ən müasir silahlarla təchiz edilib. Hərbi təhsil günün ən yüksək tələbləri səviyyəsində qurulub. Zabitlərin vaxtaşırı xarici ölkələrdə hərbi təlimlərdə iştirakı, eyni zamanda kurslar keçməsi də ordumuzun möhkəmlənməsinə səbəb olub. Vaxtaşırı keçirilən hərbi təlimlər Azərbaycan Ordusunun ərazi bütövlüyümüzü qorumaq üçün ciddi sınaqlara hazır olduğunu göstərir. Silahlı Qüvvələrimiz bu gün dünyanın ən güclü 50 ordusundan biridir. Azərbaycan Ordusunun döyüş təcrübəsi dünyanın aparıcı dövlətlərinin baş qərargahlarında ciddi surətdə öyrənilir".
Deputat bildirib ki, Azərbaycan əsgəri bu gün öz torpağını qorumaq üçün istənilən fədakarlığa hazırdır. Torpaqlarımızın işğaldan azad olunmasında da xalq-ordu birliyinin böyük rolu oldu. Hər bir azərbaycanlı ordumuzun möhkəm olmasında maraqlıdır və gənclərimizin böyük həvəslə hərbi xidmətə yollanması ordumuzu gücləndirən faktorlardan biridir. Milli Ordumuzun yaranmasının 106-cı ildönümündə birmənalı şəkildə müstəqilliyimizi, kimliyimizi qoruyan şərəfli Silahlı Qüvvələrə malik olduğumuzu görürük və bu ordu bu gün də, sabah da dövlət müstəqilliyimizin qorunmasında vacib vəzifələr yerinə yetirir. Xalqımız öz əsgərinə inanır və Silahlı Qüvvələrimizin bundan sonra da güclü olması üçün dövlətimiz, rəhbərliyimiz tərəfindən bütün vacib addımlar atılır.

Əsmər QARDAŞXANOVA,
"Azərbaycan"