Rayona gələn yerli qonaqların sayında azalma olsa da, xaricilərin sayı 50 faizə yaxın artıb

Azərbaycanın hər guşəsinə elə bir gözəllik bəxş olunub ki, il ərzində turizmin bütün növləri üzrə qonaq qəbul edə bilir. 

Belə məkanların sırasında həm unikal relyefi, flora və faunası, saf havası, həm də insan əli hesabına yaradılan tarixi və müasir tikililəri ilə seçilən Qəbələnin özünəməxsus yeri var. Cari ilin yanvar-avqust aylarında Qəbələ rayonundakı hotel və mehmanxana tipli müəssisələrə 72,3 min nəfər yerli və əcnəbi turist yerləşdirilib. Onların 25,8 min nəfəri (35,7 faizi) Azərbaycan, 46,5 min nəfəri (64,3 faizi) xarici ölkə vətəndaşı olub. Rayon Statistika İdarəsinin məlumatına görə, 8 ayda Qəbələnin hotel və mehmanxana tipli müəssisələrinə yerləşdirilən yerli və əcnəbi turistlərin sayı ötən ilin müvafiq dövrü ilə müqayisədə 14,1 min nəfər (24,4 faiz) artıb. Bu dövr yerli turistlərin sayı keçən ilin müvafiq dövrü ilə müqayisədə 1,2 min nəfər (4,5 faiz) azalsa da, əcnəbi turistlərin sayında 15,4 min nəfər (49,6 faiz) artım qeydə alınıb.

Qəbələyə gələn əcnəbi turistlər arasında Hindistan vətəndaşları əvvəlki aylarda olduğu kimi, yenə də üstünlük təşkil ediblər - 19,5 min nəfər. Ümumiyyətlə, yanvar-avqust aylarında Qəbələyə Səudiyyə Ərəbistanından 10454, Birləşmiş Ərəb Əmirliklərindən 3778, Küveytdən 2385, Pakistandan 1947, Gürcüstandan 1125, Rusiyadan 713, Omandan 761, Qətərdən 681, İsraildən 543, Türkiyədən 217, Böyük Britaniyadan 200, ABŞ-dən 187, Bəhreyndən isə 175 turist səfər edib. Bundan əlavə, həmin müddətdə Qəbələyə digər ölkələrdən də xeyli sayda əcnəbi qonaq gəlib.

Məlumatda o da bildirilir ki, Qəbələ ərazisində yerləşən 18 mehmanxana və mehmanxana tipli müəssisədən hesabat dövründə 15-i fəaliyyət göstərib. Bir gün qonaqlamaq üçün orta qiymət 45,7 manat təşkil olub. Turistlərin qonaqlama müddəti 1-2 gün davam edib. Həmin müddətdə rayonun turizm obyektlərində 977 işçi çalışıb.

Qurban MƏMMƏDOV,

"Azərbaycan"