Gəncə Dövlət Universitetində (GDU) yaz semestr imtahanlarına ictimai baxış keçirilmişdir.
Mediaturda universitetin humanitar məsələlər üzrə  prorektoru Gülsüm Fətəliyeva, tədris məsələləri üzrə prorektor  Şahin Xurşudov, elm və innovasiyalar üzrə prorektor, Milli Məclisin deputatı Pərvin Kərimzadə GDU-nun fəaliyyəti və son zamanlar qazandığı uğurlar barədə ətraflı məlumat verərək diqqətə çatdırmışlar ki, ali təhsil ocağında tədris müasir innovativ təlim texnologiyaları əsasında qurulur, yüksəkixtisaslı kadr hazırlığı daim diqqət mərkəzində saxlanılmaqla beynəlxalq akademik əlaqələr və ölkədaxili əməkdaşlıq daha da inkişaf etdirilir. O da vurğulanmışdır ki, dünya universitetlərinin reytinqinin əks olunduğu cədvəldə yer alan GDU-nun nüfuzu ilbəil yüksəlir. Ən nüfuzlu reytinq təşkilatlarından olan "Times Higher Education" (THE) tərəfindən keçirilən "THE Impact Ranking"   və "Round University Ranking"in 2024-cü il üçün reytinqinin nəticələri onu göstərir ki, Gəncə Dövlət Universiteti  potensialını gündən-günə artırır.
Sonra mediatur iştirakçıları ayrı-ayrı auditoriyalarda imtahan prosesi ilə tanış olmuş və  müasir kameralar vasitəsilə imtahanların gedişini izləmək üçün yaradılan müşahidə otağına baş çəkmişlər. İmtahanların gedişi və təşkili ilə bağlı fikirlərini bölüşən müşahidəçilər tələbələrin bilik və bacarıqlarını nümayiş etdirməsi üçün yaradılan şəraiti yüksək qiymətləndirmişlər.

Sabir ƏLİYEV,
 "Azərbaycan"