"Müharibə sonrası iqtisadi inkişaf və dövlətlərarası əməkdaşlığın davam etdirilməsi regionda uzunmüddətli sülhün təmin olunması üçün vacib addımlardır. Azərbaycanın Qarabağ və Şərqi Zəngəzurda start verdiyi iqtisadi inkişaf, regional iqtisadiyyatı gücləndirən layihələr, eləcə də qonşu dövlətlərlə olan ticarət əlaqələri sabitliyin zəmanətidir".
Bu fikirləri Azərbaycan qəzetinə açıqlamasında Milli Məclisin deputatı Müşfiq Cəfərov bildirib. Onun sözlərinə görə, artıq Cənubi Qafqaz regionunda gərginlik dövrü bitməkdədir, amma bu, heç də əbədi sabitlik anlamına gəlmir. Ermənistan Azərbaycanın sülh çağırışlarına dəstək verərək, qarşılıqlı maraqları və təhlükəsizlik məsələlərini ön planda tutaraq, daha sülhsevər və konstruktiv yanaşmalar həyata keçirə bilər.
Deputat qeyd edib ki, Azərbaycan öz gücünü və təsirini artırmaqla, həm regionda, həm də beynəlxalq aləmdə daha böyük rol oynamağa başlayıb: "Yalnız davamlı diplomatik səylərlə Cənubi Qafqazda real sülhün və sabitliyin təmin olunması mümkündür. Azərbaycan və Ermənistan arasında imzalanacaq sülh sazişi hər iki ölkənin və bütövlükdə Cənubi Qafqazın gələcəyinə əhəmiyyətli təsir göstərəcək. Bu, siyasi, hərbi və iqtisadi sahələrdə yeni bir başlanğıc yarada bilər, amma bu prosesin tam olaraq müsbət nəticələnməsindən, hər iki tərəfin sülhə və qarşılıqlı əməkdaşlığa doğru atacağı davamlı və inamlı addımlarından asılı olacaq".
Müşfiq Cəfərov qeyd edib ki, gələcəkdə sülh sazişi həm də beynəlxalq güclərin regionda daha aktiv rol almasına, iqtisadi inkişafın sürətlənməsinə və yeni əməkdaşlıq formatlarının yaranmasına yol aça bilər. Ötən ilin dekabr ayından etibarən Azərbaycan və Ermənistan arasında postmünaqişə dövründə normallaşma prosesində əhəmiyyətli irəliləyiş əldə edilib və cari il avqustun 8-də keçirilmiş tarixi Vaşinqton sammiti ilə ən yüksək səviyyəyə çatıb. "Nəticə etibarilə regionda sülh de-fakto bərqərar olub. Bu gün Azərbaycan və Ermənistan ən dinc və sabit dövrünü yaşayırlar. Hər iki tərəf hökumət, parlament və vətəndaş cəmiyyəti səviyyələrində müxtəlif istiqamətlər üzrə konkret tədbirlərin həyata keçirilməsi istiqamətində irəliləyir", - deyə deputat bildirib.
R.CƏFƏRLİ,
"Azərbaycan"
19 (1)jpg_1771885865.jpg)
jpg_1772466277.jpg)
