Rayon icra hakimiyyətinin və Azərbaycan Aşıqlar Birliyinin (AAB) birgə təşkilatçılığı ilə Azərbaycan aşıq sənətinin görkəmli nümayəndəsi, Əməkdar mədəniyyət işçisi Aşıq Pənah Pənahovun 100 illik yubleyinə həsr edilmiş tədbir keçirilib.
Tədbir çərçivəsində ustad sənətkarın qəbirüstü abidəsi ziyarət olunub, xatirəsi ehtiramla yad edilib. Salyan Dövlət Kukla Teatrının foyesində sənətkarın şəxsi əşyalarından ibarət təşkil edilən sərgidəki eksponatlar iştirakçılara ustad aşığın həyatına və sənət fəaliyyətinə nəzər salmaq imkanı verib. Ustad sənətkarın həyat və yaradıcılığını əks etdirən videoçarxın nümayişindən sonra çıxış edən rayon icra hakimiyyətinin başçısı Rüstəm Xəlilov Azərbaycan xalqının zəngin mədəni irsindən, milli-mənəvi dəyərlərimizin qorunub saxlanılmasında və gələcək nəsillərə çatdırılmasında aşıq sənətinin əhəmiyyətindən danışıb. Vurğulayıb ki, Azərbaycan aşıq sənətinin inkişafında mühüm xidmətləri olan sənətkarların həyat və yaradıcılığının öyrənilməsi, onların zəngin irsinin qorunması və gələcək nəsillərə çatdırılması xüsusi əhəmiyyət daşıyır: “Bu baxımdan Əməkdar mədəniyyət işçisi Aşıq Pənah Pənahovun 100 illik yubileyinin qeyd olunması dövlətimizin onun sənətinə və milli mədəniyyətimizə verdiyi töhfələrə ehtiramının ifadəsidir”.
AAB-nin sədri, Əməkdar elm xadimi Məhərrəm Qasımlı XX əsr aşıq sənətinin görkəmli nümayəndələrindən olan Aşıq Pənahın təkcə Azərbaycanda deyil, ölkəmizin hüdudlarından kənarda da tanındığını, əsərlərinin indi də sevilə-sevilə oxunduğunu bildirib.
Tədbirdə sənətkarın ömür yoluna və yaradıcılığına ehtiram ifadə olunub, onun Azərbaycan aşıq sənətinin inkişafına verdiyi töhfələr minnətdarlıqla xatırlanıb. Bədii-musiqili hissədə “Cəngi” milli nəfəs alətləri kollektivi, Əməkdar mədəniyyət işçisi Ağamurad Şirvanlı, Əməkdar artist Zakir Əliyev, eləcə də Əli Tapdıqoğlu, Rövşən Əziz, Məhərrət Habiloğlu, Elxan Astaralı, Qəlbinur İbrahimli və başqaları ustad aşığın şeirlərinə bəstələnmiş mahnıları səsləndiriblər.
Seyran CAVADOV,
“Azərbaycan”
jpg_1792531899.jpg)
