XXI əsrdə yeni dünya düzəninin formalaşdığı bir vaxtda Türk dünyası öz gücünü daha da artırır. Malik olduğu resurslar, əhali sayı, coğrafi mövqeyi baxımından Türk dünyası artıq qlobal miqyasda əsas geosiyasi, geoiqtisadi güc mərkəzlərindən birinə çevrilir. Türk dünyası ortaq tarix, dil və mədəniyyətə malik 7 müstəqil dövlət, bir neçə muxtar ərazidən ibarət böyük coğrafi məkandır. Dekabrın 15-nin Dünya Türk Dili Ailəsi Günü kimi qeyd olunması da Türk dünyasının beynəlxalq miqyasda artan gücünün və nüfuzunun ifadəsidir.
Bu fikirləri AZƏRTAC-a açıqlmasında Milli Məclisin deputatı Samir Vəliyev söyləyib.
O xatırladıb ki, bu il noyabrın əvvəlində Özbəkistanda keçirilən BMT-nin Təhsil, Elm və Mədəniyyət üzrə Təşkilatının (UNESCO) 43-cü Baş Konfransında dekabrın 15-i Dünya Türk Dili Ailəsi Günü elan edilib. Baş Konfransda 194 ölkədən 5000-dən çox nümayəndə iştirak edib. İlk dəfə olaraq BMT müstəvisində bu gün - 15 dekabr Dünya Türk Dili Ailəsi Günü qeyd olunur. Bu gün üçün 15 dekabr tarixinin seçilməsi təsadüfi deyil. Belə ki, avropalı türkoloq alim Vilhelm Tomsen türk dilinin ilk yazılı abidələri sayılan “Orxon” kitabələrinin türk dilində yazıldığını 1893-cü il dekabrın 15-də beynəlxalq elmi ictimaiyyətə təqdim etmişdi. Ona görə də, Dünya Türk Dili Ailəsi Gününün bu tarixdə qeyd olunması rəmzi məna daşıyır.
Onun sözlərinə görə, UNESCO-nun məlum toplantısında belə bir günün elan olunması Azərbaycan, Türkiyə, Qazaxıstan, Qırğızıstan, Özbəkistanın birgə müraciətindən sonra əlavə 21 dövlət tərəfindən dəstəklənərək təsdiqlənib.
“Geniş bir ərazidə 200 milyondan çox insanın danışdığı türk dili ailəsi əsrlər boyu ortaq tarix və dəyərlərdən gələn zəngin bir mədəni irsi təmsil edir. Bu əlamətdar gün türk sivilizasiyalarının ortaq mədəni sərvətinin rəmzidir, habelə bu xalqlar arasında mədəni yaxınlaşmaya və dialoqa töhfə verir. Dünya Türk Dili Ailəsi Gününün qeyd olunması türk xalqlarının ortaq mənəvi köklərinin və dəyərlərinin beynəlxalq səviyyədə tanınmasının bariz göstəricisidir. UNESCO-nun müvafiq qərarı, eyni zamanda, türkologiyanın, türk kimliyinin dünyada artan nüfuzunun təsdiqidir”, - deyə S.Vəliyev vurğulayıb.
19 (1)jpg_1771885865.jpg)
jpg_1772466277.jpg)
