Ölkəmizin paytaxtı sabahdan başlayaraq 6 gün ərzində dünyanın ən mühüm şəhərsalma platformalarından biri hesab olunan Ümumdünya Şəhərsalma Forumunun 13-cü sessiyasına (WUF13) evsahibliyi edəcək. Artıq 180 ölkədən 32 mindən çox iştirakçının qeydiyyatdan keçməsi rekord göstərici kimi qiymətləndirilir. Bu fakt Azərbaycanın qlobal miqyasda etibarlı tərəfdaş və beynəlxalq dialoq məkanı olduğunu bir daha təsdiqləyir.
Son illər ölkəmiz qlobal təşəbbüslərin fəal iştirakçısına çevrilib. Respublikamızın müxtəlif bölgələrində təşkil olunan beynəlxalq tədbirlər Azərbaycanın müasir infrastruktura və yüksək təşkilatçılıq imkanlarına malik olduğunu nümayiş etdirir.
Prezident İlham Əliyevin ötən ilin oktyabrında keçirilmiş III Azərbaycan Milli Şəhərsalma Forumunun iştirakçılarına müraciətində vurğuladığı kimi, WUF13-ün Bakıda keçirilməsi qərarı Azərbaycanın beynəlxalq urbanizasiya proseslərinə verdiyi töhfənin və etibarlı tərəfdaş kimi qazandığı yüksək etimadın göstəricisidir: "Bu mötəbər tədbir Azərbaycanın ümumdünya urbanizasiya proseslərində rolunu daha da gücləndirəcək, regionun dayanıqlı inkişafına və ümumilikdə qlobal urbanizasiya məqsədlərinə mühüm töhfə verəcəkdir".
Məlum həqiqətdir ki, Azərbaycan dünyanın ən qədim yaşayış məskənlərindən biridir. Burada minilliklər boyu davam edən sivilizasiyanın inkişafının izlərini görmək mümkündür. Bəşər övladının ilk yaşayış yeri, məişəti barədə aydın təsəvvür yaradan Azıx mağarası, Qobustan qayaüstü rəsmləri və digər qədim abidələrdən başlayaraq sonrakı dövrlərdə salınmış bənzərsiz şəhərlər, inşa olunmuş möhtəşəm tikililər Azərbaycan xalqının iqtisadi inkişafından, mənəvi zənginliyindən xəbər verir.
Bu gün ölkəmizdə "Böyük qayıdış" proqramı çərçivəsində həyata keçirilən işlər heyrətamizdir. Vətən müharibəsindən sonra Qarabağa və Şərqi Zəngəzura yolu düşənlər orada erməni vandalizmi nəticəsində xarabalığa çevrilmiş yurd yerlərimizi görə bilərlər. Bu gün isə Azərbaycan dövlətinin qətiyyəti sayəsində Qarabağda və Şərqi Zəngəzurda həyat yenilənir, canlanır. İndi elə bir gün yoxdur ki, keçmiş məcburi köçkünlər daimi yaşamaq üçün yenidən qurulan əzəli yurdlarına dönməsinlər.
Yeri gəlmişkən qeyd edək ki, forum çərçivəsində Qarabağ və Şərqi Zəngəzurda həyata keçirilən yenidənqurma modeli beynəlxalq ictimaiyyətə təqdim olunacaq. Tədbirdə "ağıllı şəhər", "ağıllı kənd", dayanıqlı urbanizasiya və "yaşıl enerji" layihələri qabaqcıl nümunə kimi nümayiş etdiriləcək.
Bu da təsadüfi deyil ki, Azərbaycanın şəhərsalma modelinin təqdimatında Qarabağda və Şərqi Zəngəzurda həyata keçirilən genişmiqyaslı quruculuq layihələri mühüm rol oynayır. İşğaldan azad edilmiş ərazilərdə "ağıllı şəhər" və "ağıllı kənd" konsepsiyalarının tətbiqi, müasir infrastrukturun qurulması və "yaşıl enerji" zonalarının yaradılması ölkənin urbanizasiya sahəsində yeni model ortaya qoyduğunu göstərir. Füzuli, Zəngilan və Laçında beynəlxalq hava limanlarının istifadəyə verilməsi regionun sürətli inkişafının göstəricilərindəndir. Dövlət başçısı İlham Əliyevin qeyd etdiyi kimi, Qarabağ və Şərqi Zəngəzur regionlarında həyata keçirilən quruculuq prosesi təkcə şəhərsalma və infrastrukturun inkişafı deyil, regionda uzunmüddətli sülh və əməkdaşlığın qurulması baxımından xüsusi əhəmiyyət daşıyır. Həyata keçirilən məqsədyönlü layihələr, qurulan yeni əməkdaşlıqlar və formalaşan iqtisadi mühit yerli əhali üçün dayanıqlı yaşam imkanları yaradır və şəhərlərin dayanıqlı inkişafına xidmət edir.
Xəbər verildiyi kimi, mayın 13-də Bakı sakinləri və qonaqlar arasında WUF13 barədə məlumatlılığın artırılması məqsədilə festival keçirilib. İctimai proqram çərçivəsində geniş auditoriyaya interaktiv fəaliyyətlər, maarifləndirici oyunlar, təqdimatlar və ictimai müzakirələr vasitəsilə dayanıqlı şəhər inkişafı, inklüziv şəhər mühiti, innovativ şəhər həlləri və gələcəyin şəhərləri kimi mövzular çatdırılıb. Bakıda keçirilən ictimai proqram WUF13 Festivalının ölkənin müxtəlif şəhərlərində təşkil olunan tədbirlər silsiləsinin yekun mərhələsi idi.
Ölkəmizdə keçirilən digər möhtəşəm tədbirlərdə olduğu kimi, WUF13-də də könüllülər fəal iştirak edəcəklər. Onlar da foruma hazırdırlar - tədbir məkanı, əməliyyat prosesləri, təhlükəsizlik prosedurları, departamentlər üzrə fəaliyyət istiqamətləri, eləcə də tədbir günlərində tətbiq olunacaq əsas qayda və təlimatlarla tanış olublar. Bir qismi isə aidiyyəti fəaliyyət istiqamətləri üzrə vəzifələrin icrasına dəstək göstərməyə də başlayıb.
Zöhrə FƏRƏCOVA,
"Azərbaycan"
