Texnoloji inkişafın sürətlənməsi insanlarda onurğa, boyun və digər dayaq-hərəkət sistemi xəstəliklərinin artmasına gətirib çıxarıb. Buna səbəb kompüter arxasında, telefonda keçirilən zamandır. Bu baxımdan boyun ağrıları da artmaqdadır.
Britaniyalı neyrocərrah Entoni Qoşun sözlərinə görə, dik vəziyyətdə oturarkən və ya dayanarkən başın boyuna saldığı mexaniki yük təxminən 12 funt (5,4 kq) təşkil edir. Bu, boyun üçün heç bir problem yaratmır. Lakin bütün dünyada milyardlarla insan günün böyük hissəsini bədəni əyilmiş vəziyyətdə keçirir. Kompüterdə işləyərkən və smartfonlara baxarkən boynumuza düşən çəki köklü şəkildə dəyişir.
Həkimin sözlərinə görə, aşağıya doğru baxılan vəziyyətdə başın boyuna saldığı yük təxminən 60 funta (27,2 kq) qədər artır. Beləliklə, boynumuz olduqca böyük bir gərginliyə tab gətirməyə çalışır.“Boyunla bağlı bəzi problemlər yaşlandıqca dayaq-hərəkət sistemimizdə baş verən dəyişikliklərin təbii nəticəsidir. Bu dəyişikliklər boyun nahiyəsindəki dəstəkləyici toxumaların elastikliyinin azalmasına və sərtliyinin artmasına səbəb olur. Buna görə də 40 yaşdan yuxarı şəxslərdə onurğa MRT nəticəsi tam normal olmur. Hər kəsdə fəqərələr arasında yerləşən və amortizasiya rolunu oynayan disklərdə müəyyən dərəcədə aşınma müşahidə olunur. Həmçinin boynun arxa hissəsindəki oynaqlar da bir qədər qalınlaşır və sərtləşir”, - deyə E.Qoş bildirib.
Həkim əlavə edib ki, elektron cihazlardan istifadə edərkən bədənin "əyildiyi" bir duruş formalaşdırırıq. Belin yuxarı hissəsi qabarıq şəkildə əyilir, çənə və baş isə çiyinlərlə düz xətt üzrə durmaq əvəzinə irəliyə doğru uzanır. Bu vəziyyət həm boyun əzələlərində, həm də onurğanın yuxarı hissəsindəki fəqərə oynaqlarında ciddi gərginlik yaradır. İnsanların təxminən 60-80%-i həyatları boyu boyun ağrısından əziyyət çəkir və onların təxminən yarısı bu problemi tez-tez və ya təkrarlanan hal kimi yaşayırlar. Bu problemlər onurğanın yuxarı hissəsində artan sərtlik və hərəkətliliyin məhdudlaşması hissi ilə başlaya, daha sonra isə güclənən və davamlı narahatlıq hissinə çevrilə bilər.
Tədqiqatlar göstərir ki, boyun və yuxarı bel ilə bağlı problemlər daha erkən yaşlarda ortaya çıxmağa başlayıb. Məsələn, son üç onillikdə uşaqlarda və yeniyetmələrdə skolioz halları artıb. Bu tibbi vəziyyət onurğada anormal əyriliyin yaranması ilə xarakterizə olunur və başı düz vəziyyətdə saxlamaq məqsədilə boyun əzələlərinin gərginləşməsinə və kompensasiyaedici fəaliyyət göstərməsinə səbəb olur.
Həkim boyun problemlərinin qarşısını almaq üçün daha çox hərəkət etməyi və ekrana fasilərlə baxmağı və gün ərzində müəyyən boyun hərəkətləri etməyi tövsiyə edib.
