Avropa Parlamenti Avropa İttifaqı (Aİ) ilə ABŞ arasında 2025-ci ilin iyulunda razılaşdırılmış ticarət sazişinin təsdiqlənməsi prosesini dayandırmaq qərarına gəlib. Bu qərar ABŞ Prezidenti Donald Trampın Qrenlandiya ilə bağlı mövqeyi fonunda bir sıra Avropa ölkələrinə qarşı əlavə gömrük rüsumları tətbiq edəcəyini bəyan etməsindən sonra qəbul olunub.
AZƏRTAC xəbər verir ki, Avropa Parlamentinin Beynəlxalq Ticarət Komitəsinin sədri Bern Lanj bildirib ki, Avropa Parlamenti Aİ–ABŞ ticarət sazişinə baxılmasını rəsmi şəkildə dayandırıb və hələlik yeni iclasın tarixi müəyyən edilməyib. Onun sözlərinə görə, Beynəlxalq Ticarət Komitəsi saziş üzrə bütün işləri dondurmaq qərarı verib.
Bern Lanj vurğulayıb ki, yaranmış vəziyyət ciddi narahatlıq doğurur: “Bizim suverenliyimiz və ərazi bütövlüyümüz təhlükə altındadır. Heç nə olmamış kimi davam etmək mümkün deyil. Qrenlandiya, Danimarka və Avropalı müttəfiqlərə qarşı davam edən və getdikcə artan təhdidlər, xüsusilə də tarif təhdidləri qarşısında saziş üzrə işləri dayandırmaqdan başqa seçimimiz yoxdur”.
Qeyd edək ki, Aİ–ABŞ ticarət sazişinin hüquqi mətninin araşdırılması, eləcə də üzv dövlətlərlə danışıqların aparılması Avropa Parlamentində məhz Beynəlxalq Ticarət Komitəsinin səlahiyyətinə daxildir.
Avropa Parlamentində Avropa Xalq Partiyası (EPP), Sosialistlər və Demokratlar (S&D) və “Renew Europe” qruplarının rəhbərləri də Donald Trampın Qrenlandiya ilə bağlı açıqlamalarına və səkkiz Avropa ölkəsinə qarşı əlavə gömrük rüsumları tətbiq etmək qərarına reaksiya veriblər. Onlar bu şəraitdə ticarət sazişinin təsdiqlənməsinin mümkün olmadığını bildiriblər.
Xatırladaq ki, Donald Tramp 2025-ci ilin iyulunda Şotlandiyada Avropa Komissiyasının sədri Ursula Fon der Lyayen ilə görüşdən sonra Aİ ilə ABŞ arasında ticarət danışıqlarının uğurla başa çatdığını elan etmişdi. Onun sözlərinə görə, saziş Avropa İttifaqı ölkələrinin Amerika məhsullarına tətbiq edilən gömrük rüsumlarından imtina etməsini, ABŞ-ın isə Avropa məhsullarına 15 faiz vergi tətbiq etməsini nəzərdə tutur. Bu ticarət sazişinin qüvvəyə minməsi üçün Avropa Parlamentinin razılığı mütləqdir. Hazırkı qərarla isə sazişin gələcəyi qeyri-müəyyən olaraq qalır.
jpg_1769078065.jpg)
19 (1)jpg_1771885865.jpg)
