Bu yaramaz rəftarla rəsmi Paris alovun üstünə yanacaq tökür

Fransa hökuməti yüksək yaşayış bahalığına görə Martinik adasında davam edən nümayişlərə qarşı yeganə cavab kimi təzyiq və zorakılığa əl atır. Bunu repressiyaya məruz qalmamaq üçün soyadını açıqlamağa ehtiyat edən "Afro-Karib dənizi xalqlarının və resurslarının müdafiəsi ittifaqı"nın (RPPRAC) fransalı nümayəndəsi Meluane deyib.

Fransızlar tərəfindən XVII əsrdə işğal edilən Martinikdə etirazlar bu il sentyabrın əvvəlindən keçirilir. Ada sakinləri yaşayış bahalığına və ərzaq qiymətlərinin hədsiz dərəcədə qaldırılmasına etiraz etmək üçün supermarketlərin qarşısında nümayişlər keçirirlər. Qida qiymətlərinin materik Fransa ilə müqayisədə 40 faiz baha olduğu Martinikdə etiraz aksiyaları zamanı 30-dan çox adam saxlanılıb.

Adanın səlahiyyətliləri sentyabrın 19-dan 23-dək paytaxt Fort-de-Fransın bəzi hissələrində və Le Lamentin şəhərində komendant saatı elan edib, Paris isə CRS polis xüsusi təyinatlılarını bu ərazilərə yerləşdirib.

Meluane deyib ki, 2009-cu ildə Martinikdə yaşayış bahalığına görə baş verən etiraz aksiyaları iştirakçılarının tələbləri indiyədək diqqətdən kənarda qalıb: "2009-cu ilin böyük tətilindən təxminən 15 il sonra biz təkcə Martinikdə deyil, həm də Qayana, Qvadelupa, Reunion və digər xarici ərazilərdə əhalinin vəziyyətinin pisləşdiyini gördük.  Maaşlar yaşayış dəyərinə qətiyyən uyğun gəlmir".

Meluane qeyd edib ki, RPPRAC iyulun 1-də yüksək qiymətlərə görə supermarketlər şəbəkəsinin nümayəndələrinə xəbərdarlıq məktubu göndərib, lakin sözügedən şirkətlər çox cüzi endirimlə razılaşıb və həm də bu barədə çox gec məlumat veriblər. Məktuba cavab verilməsinin gecikməsi ada sakinləri tərəfindən hörmətsizlik əlaməti kimi qəbul edilib. Bundan sonra sentyabrın 1-də Martinikdə yaşayış bahalaşmasına qarşı nümayişlər keçirilib.

Onun sözlərinə görə, etirazçılar supermarket şəbəkələrinin nümayəndələri ilə görüşməyi, həmçinin adadakı qiymətlərin Fransadakı qiymətlərlə müqayisə olunmasını tələb ediblər.

Yığıncaqda Martinik prefekti Jan-Kristof Buvye, supermarketlər şəbəkəsinin nümayəndələri və RPPRAC-ın rəhbəri Rodriq Petito iştirak ediblər, lakin ada sakinlərinin tələbləri nəzərə alınmayıb.

"Hökumətin yeganə cavabı isə təzyiq oldu. Yəni jandarmlar, ümumi təhlükəsizlik qüvvələri və ordu hadisə yerində olub, nümayişçilərə qarşı gözyaşardıcı qazdan istifadə edilib, talan başlayıb", - Meluane bildirib.

RPPRAC nümayəndəsi yaşayış xərcləri ilə bağlı danışıqlarda yerli hakimiyyət orqanları tərəfindən şəffaflığın olmamasını tənqid edib və həmçinin yüksək xərclərlə əlaqədar Martinikdə başlanmış hərəkatın genişləndirilməsi istəyini ifadə edib.

Soyadını açıqlamaq istəməyən RPPRAC-ın fransalı koordinatoru Lindi isə bildirib ki, yaşayış minimumu ilə bağlı tələblərin hələ də konkret həlli yoxdur.

O qeyd edib ki, insanlar küçələrə axışır, çünki qiymətlər materik Fransadakı kimi deyil. Martinikdə qiymətlər çox yüksəkdir.

Lindi Parisin adada atdığı destruktiv addımları tənqid edib. Bu dağıdıçı rəftarla Fransa "oda yanacaq qatır". İttifaqın əlaqələndiricisi ürək ağrısı ilə deyib: "Bizim xahişimiz odur ki, qiymətlər Fransadakı qiymətlərə uyğun olsun. Bu gün isə bizi çəzalandırmaq üşün təhlükəsizlik qüvvələrini göndərirlər. Dinc şəkildə normal qiymətə ərzaq alıb yeyə bilmək üçün mübarizə aparan insanlara - uşaqlara, qadınlara, ahıllara və əlillərə qarşı gözyaşardıcı qazdan istifadə edilir. Və bu, qəsdən edilir". 

O əlavə edib ki, gözyaşardıcı qazdan istifadə edilməsinə baxmayaraq, nümayişlər həmişə dinc şəraitdə keçirilib.

Rizvan CƏFƏROV,

"Azərbaycan"