Sentyabrın 8-də Yeni Azərbaycan Partiyasının (YAP) Mərkəzi Aparatında YAP Sədrinin müavini – Mərkəzi Aparatın rəhbəri Tahir Budaqov ilə Çin Kommunist Partiyası Mərkəzi Komitəsinin (ÇKP MK) üzvü, Beynəlxalq əlaqələr şöbəsinin müdiri, nazir Lyu Haysinin rəhbərlik etdiyi nümayəndə heyəti arasında görüş keçirilib.
YAP-dan AZƏRTAC-a bildirilib ki, görüşdə Azərbaycan Respublikasının Prezidenti, Yeni Azərbaycan Partiyasının Sədri İlham Əliyev ilə Çin Xalq Respublikasının Sədri, Çin Kommunist Partiyasının Baş katibi Si Cinpinin məqsədyönlü siyasəti nəticəsində iki ölkə arasında münasibətlərin dostluq və hərtərəfli strateji tərəfdaşlıq müstəvisində uğurla inkişaf etdiyi vurğulanıb.
Konstruktiv siyasi dialoq şəraitində Azərbaycan-Çin əlaqələrinin iqtisadi-ticari, nəqliyyat-logistika, təhsil, turizm, mədəni-humanitar, rəqəmsal texnologiyalar, yaşıl enerji və digər sahələrdə genişləndiyi qeyd olunub.
Hər iki ölkənin qlobal əhəmiyyətli təşəbbüslərlə çıxış etdiyi vurğulanaraq “Bir kəmər, bir yol” və Zəngəzur dəhlizi layihələrinin geostrateji əhəmiyyəti və perspektivləri diqqətə çatdırılıb. Çinin Azərbaycanın Şanxay Əməkdaşlıq Təşkilatı ilə əlaqələrinin inkişafına dəstəyinin dostluq və tərəfdaşlıq nümunəsi olduğu bildirilib.
Azərbaycan-Çin hərtərəfli strateji tərəfdaşlığının ikitərəfli münasibətlərlə yanaşı, Qlobal Cənubda əməkdaşlığın təşviqi baxımından mühüm əhəmiyyət daşıdığı vurğulanıb. Hər iki ölkənin bir-birinin müstəqilliyinə, ərazi bütövlüyünə və suverenliyinə dəstəyi, separatizmin bütün forma və təzahürlərinə qarşı mövqeyi diqqətə çatdırılıb.
YAP ilə ÇKP arasında əlaqələrin inkişafının dövlətlərarası münasibətlərin mühüm tərkib hissəsi olduğu vurğulanıb. Qarşılıqlı səfərlərin, fikir və təcrübə mübadiləsinin əməkdaşlığın qiymətləndirilməsi və gələcək istiqamətlərin müəyyənləşdirilməsində əhəmiyyəti qeyd edilib. 2024-cü ilin noyabrında YAP nümayəndə heyətinin Çinə səfəri zamanı imzalanmış Əməkdaşlıq Memorandumundan irəli gələn vəzifələrin icrasının strateji tərəfdaşlığın möhkəmlənməsinə töhfə verdiyi bildirilib.
2026-cı il mayın 11-15-də YAP nümayəndə heyətinin Çinə səfəri çərçivəsində keçirilən görüşlər məmnunluqla xatırlanaraq qarşılıqlı səfərlərin davam edəcəyinə və əməkdaşlıqda yeni nailiyyətlərin əldə olunacağına əminlik ifadə edilib.
Gənclərin ictimai-siyasi həyatda, dövlət idarəçiliyində və partiya fəaliyyətində fəal iştirakının əhəmiyyəti vurğulanaraq bu sahədə ixtisaslaşmış təhsil müəssisələri arasında əməkdaşlığın önəmi qeyd olunub.
Görüşdə partiyalararası əməkdaşlığın gələcək istiqamətləri və qarşılıqlı maraq doğuran digər məsələlər ətrafında fikir mübadiləsi aparılıb.
jpg_1790976482.jpg)
