Axşamlar televiziya ekranı qarşısında və radio dalğalarında hamının qulaq kəsildiyi ən mühüm informasiyalardan biri sinoptiklərin verdiyi hava haqqında məlumat olur: “Sabah havanın yağışlı keçəcəyi, arabir intensiv xarakter alacağı gözlənilir”.
Həmin informasiyanı eşitmək səhəri gün küçələrdə rəngbərəng çətirlər altında gəzənləri görmək üçün kifayətdir. Nə qədər ki, hava xoşdur, qar-yağış yoxdur, ona ehtiyac da olmur. Elə ki, yağış mövsümü gəldi, el arasında deyildiyi kimi, göydən yerə nur yağmağa başladı, çətir ən mühüm aksesuara çevrilir.
Çətirin vətəni hesab edilən Çin və Misirdə onu hakimiyyət və güc simvolu hesab edirdilər. Sonralar şərqdən qədim Yunanıstana, oradan da Romaya keçən çətirlər XVII əsrdə Fransaya gedib çıxıb. Həmin dövrdə çətirlərin yuxarı hissəsi mum sürtülmüş parçadan, dəstəyi isə sümükdən hazırlanırdı. Günəşdən qorunmaq üçün yaradılan çətirdən yağışdan qorunmaq məqsədilə ilk dəfə 1750-ci ildə istifadə edilib. İndi ondan günəşdən qorunmaq üçün demək olar ki, istifadə olunmasa da, yağışlı günlərin ən etibarlı aksesuarı hesab edilir. XIX əsrin ikinci yarısında çətirlər indiki görkəmini almağa başlayıb. Həmin vaxtlar çətirin dəstəyi və milləri metaldan, örtüyü isə xüsusi su keçirməyən materialdan hazırlanırdı.
AZƏRTAC-ın fotomüxbiri, Əməkdar mədəniyyət işçisi İlqar Cəfərovun fotoobyektivi yağışlı günlərin qoruyucu olan çətirləri gündəmə gətirib. Hansısa rakursdan baxanda göbələyi, hansısa rakursdan panamanı xatırladan çətirlər yağışlı havanın əsas atributlarından biridir. Yağışlı havada tünlük küçədə çətirlər mavi səmaya çəkilmiş rəngbərəng çadırı xatırladır. Çətir adi məişət əşyası deyil, həm də bir sıra hallarda iki ürəyin açılmış bir çətir altında döyünməsi, yanaşı addımlayan iki nəfərin könül sirdaşlığıdır. Bir çətir altında ən munis duyğuları da bölüşmək olar...
Artıq təbiətdə payız son günlərini yaşayır. Qışın soyuq nəfəsi getdikcə daha çox hiss olunmağa başlayır. Yağışlı günlərin sayı artır, hətta bəzən ara-sıra qar dənələri də düşür. Bu o deməkdir ki, səhərlər evdən çıxanda havadan asılı olmayaraq çətir götürməyi unutmamaq lazımdır. Hər an yağış yağa, qar səpələyə, nur damlaları əyin-başımızı islada bilər. Soyuq qış, ardınca da yağışlı yaz gəlir. Ona görə də ən yaxşısı başımız üstə açılmış çətirin olmasıdır...
