Həkim əməyinə verilən dəyər insan sağlamlığına xidmət edir

Azərbaycanın səhiyyə sistemində yeni islahatlar həyata keçirilir və tibb işçilərinin əməkhaqları artırılır. Bütün bunlar ictimaiyyət, xüsusilə də səhiyyə işçiləri tərəfindən böyük rəğbət və məmnunluqla qarşılanır. On minlərlə tibb işçisinin sosial rifahının yaxşılaşdırılmasına xidmət edən əməkhaqqı artımı, eyni zamanda, onların əməyinə verilən yüksək qiymətin əyani təzahürüdür. Xüsusilə ilkin səhiyyə və reanimasiya xidmətlərində çalışan mütəxəssislər bu qərarın gündəlik fəaliyyətlərinə əlavə stimul verəcəyini vurğulayırlar. 

Sumqayıt Uşaq Xəstəxanasının poliklinika şöbəsinin müdiri Könül MƏMMƏDLİ qəzetimizə bildirib ki, yeni əməkhaqqı sistemi ilkin və ambulator səhiyyənin gücləndirilməsinə mühüm stimul verəcək: “Tibb işçilərinin əməkhaqlarının artırılması ilə bağlı həyata keçirilən yeni islahatı səhiyyə sistemimizin inkişafı baxımından mühüm və vaxtında atılmış addım hesab edirəm. Bu qərar minlərlə tibb işçisinin sosial rifahına birbaşa təsir etməklə yanaşı, səhiyyədə insan kapitalının qorunmasına və peşəkar kadrların motivasiyasının yüksəldilməsinə xidmət edir”.

Könül Məmmədli qeyd edib ki, poliklinika xidmətində çalışan tibb işçiləri əhalinin səhiyyə sistemi ilə ilkin təmasının əsas iştirakçılarıdır. Uşaqların profilaktik müayinəsi, xəstəliklərin erkən aşkarlanması, dinamik müşahidə, valideynlərin maarifləndirilməsi və zəruri hallarda ixtisaslaşdırılmış tibbi xidmətə yönləndirilməsi gündəlik fəaliyyətimizin mühüm hissəsidir. Buna görə ambulator xidmət göstərən həkimlərin əməyinin yeni əməkhaqqı mexanizmində xüsusi nəzərə alınmasını olduqca əhəmiyyətli hesab edirik. Yeni yanaşmanın üstün cəhətlərindən biri əməkhaqqının yalnız vəzifəyə görə deyil, eyni zamanda iş yükü, fəaliyyət və keyfiyyət göstəriciləri nəzərə alınmaqla formalaşdırılmasıdır. Bu, tibb işçisinin əməyinin daha obyektiv qiymətləndirilməsinə, sağlam peşəkar rəqabətin və məsuliyyət hissinin güclənməsinə imkan yaradacaq.

Birinci vitse-prezident Mehriban xanım Əliyevanın təşəbbüsü və Prezident İlham Əliyevin dəstəyi ilə reallaşan bu qərarın əhəmiyyətindən danışan Könül Məmmədli deyib ki, Azərbaycanda səhiyyə işçilərinin sosial müdafiəsinin gücləndirilməsi dövlət siyasətinin mühüm istiqamətlərindən biridir. “Biz bu qayğını yalnız əməkhaqqı artımı kimi deyil, həm də üzərimizə qoyulan daha böyük etimad və məsuliyyət kimi qəbul edirik. Əsas vəzifəmiz bu etimadı vətəndaşlara, xüsusilə uşaqlarımıza göstərilən tibbi xidmətin keyfiyyətini daha da yüksəltməklə doğrultmaqdır. Bu mühüm qərara görə dövlətimizin başçısı Prezident İlham Əliyevə və Birinci vitse-prezident Mehriban Əliyevaya kollektivimiz adından təşəkkürümüzü bildiririk”, - deyə həkim qeyd edib.

Sumqayıt Uşaq Xəstəxanasının Anesteziologiya-reanimatologiya şöbəsinin müdiri həkim-reanimatoloq Səbinə Hacıyeva isə bildirib ki, tibb işçisinin əməyinin qiymətləndirilməsi həm də insan həyatına verilən dəyərdir: “Tibb işçilərinin əməkhaqlarının artırılması ilə bağlı qəbul edilən qərarı böyük məmnunluq və minnətdarlıq hissi ilə qarşıladıq. Bu təşəbbüs səhiyyə işçilərinin sosial rifahının yaxşılaşdırılması ilə yanaşı, onların son dərəcə məsuliyyətli əməyinə dövlət səviyyəsində verilən yüksək qiymətin ifadəsidir. Anestezioloq-reanimatoloq kimi fəaliyyət göstərən həkimlər üçün bu qərarın xüsusi mənəvi əhəmiyyəti var. Reanimasiya xidməti gecə-gündüz fasiləsiz fəaliyyət, yüksək peşəkarlıq, operativ qərarvermə və böyük məsuliyyət tələb edir. Xüsusilə uşaqların həyatının xilas edilməsi uğrunda aparılan mübarizədə bəzən saniyələr belə həlledici olur. Belə bir sahədə çalışan həkimin əməyinin və məsuliyyətinin əməkhaqqı sistemində daha dolğun nəzərə alınması bizə əlavə stimul verir”.

Səbinə Hacıyeva qeyd edib ki, Birinci vitse-prezident Mehriban xanım Əliyevanın tibb işçilərinin maddi rifahının yaxşılaşdırılması ilə bağlı təşəbbüsünün Prezident İlham Əliyev tərəfindən dəstəklənməsi səhiyyəyə və bu sahədə çalışan insanlara göstərilən diqqətin növbəti nümunəsidir: “Əməkhaqlarının artırılması yalnız sosial məsələ deyil. Bu, həkimin peşəsinə bağlılığını gücləndirən, məsuliyyətini və motivasiyasını yüksəldən, nəticə etibarilə isə tibbi xidmətin keyfiyyətinə müsbət təsir göstərən mühüm addımdır. Biz tibb işçiləri göstərilən bu diqqət və qayğını gündəlik fəaliyyətimizdə daha böyük məsuliyyətlə, pasiyentlərimizə daha yüksək səviyyədə xidmət göstərməklə doğrultmağa çalışacağıq. Dövlətimizin insan sağlamlığına və səhiyyə işçilərinin əməyinə verdiyi yüksək dəyərə görə Prezident İlham Əliyevə və Birinci vitse-prezident Mehriban Əliyevaya dərin minnətdarlığımızı bildiririk”.

Təhminə VERDİYEVA,

“Azərbaycan”