"Qədim Şəmkir şəhərinin arxeoloji-memarlıq: tədqiqi, qorunması və təbliği"  mövzusunda elmi-praktik seminar keçirilmişdir. Şəmkirdə keçirilən seminarda  rayon icra hakimiyyətinin, AMEA-nın Arxeologiya və Antropologiya İnstitutunun, "Qədim Şəmkir Şəhəri" Dövlət Tarix-Mədəniyyət qoruğunun nümayəndələri iştirak etmişlər.
Seminardan əvvəl "Qədim Şəmkir şəhəri" Dövlət Tarix-Mədəniyyət qoruğunun arxeoloji qazıntı işləri gedən Narınqala hissəsinə ekskursiya təşkil olunmuşdur. Burada iştirakçılara qoruğun tarixi, eyni zamanda arxeoloji qazıntılar zamanı aşkar olunan maddi-mədəniyyət nümunələri haqqında ətraflı məlumat verildikdən sonra AMEA-nın Arxeologiya və Antropologiya İnstitutunun əməkdaşı, tarix elmləri doktoru Tarix Dostiyev 2006-cı ildən bu günədək aparılan elmi-tədqiqat işlərindən və arxeoloji qazıntıların gedişatından ətraflı söhbət açmışdır. Ekskursiya zamanı tədbir iştirakçıları qoruqda sərgilənən artefaktlarla yaxından tanış olmuşlar. Onlara artefaktların tarixi, istehsal üsulu və məişətdə istifadə qaydaları haqqında məlumat verilmişdir.
Sonra qoruğun inzibati binasında seminar öz işinə başlamışdır. AMEA-nın Arxeologiya və Antropologiya İnstitutunun direktoru, tarix üzrə fəlsəfə doktoru, dosent Fərhad Quliyev çıxış edərək qoruqların Azərbaycanın mədəni irs tarixində əhəmiyyətindən, onların qorunması və təbliği sahəsində dövlətin göstərdiyi diqqət və qayğıdan danışmışdır. "Qədim Şəmkir şəhəri" Dövlət Tarix-Mədəniyyət qoruğunun direktoru Nurlan Həsənov isə qoruğun yaranması və fəaliyyəti, eyni zamanda gələcək perspektivlərindən söz açmışdır. 
Elmi-tədqiqat ekspedisiyasının rəhbəri Tarix Dostiyev arxeoloji qazıntılar zamanı aşkar olunmuş maddi-mədəniyyət nümunələrinin qorunması və təbliği sahəsində həyata keçirilən mühüm layihələr, 2024-cü ilin elmi tədqiqatlarının nəticələri haqqında fikirlərini seminar iştirakçılarının diqqətinə çatdırandan sonra, onları maraqlandıran suallar cavablandırılmışdır.

Sabir ƏLİYEV,
"Azərbaycan"