06 Sentyabr 2021 19:39
651
İDMAN
A- A+

“Tokio-2020”: Azərbaycan paralimpiyası möhtəşəm qələbələrlə zirvələri fəth etdi  

Milli paralimpiya komandamız Tokioda (Yaponiya) keçirilən XVI Yay Paralimpiya Oyunlarını 14-ü qızıl, 1-i gümüş və 4-ü bürünc olmaqla 19 medalla başa vurdu. Azərbaycan 163 ölkənin qatıldığı bu Oyunlarda qazanılan nəticələrə əsasən 10-cu pillədə qərarlaşdı. Paralimpiyamız bununla öz tarixində görünməmiş böyük qələbələrə, tarixi rekorda imza atdı və Azərbaycan paralimpiyası idmanın ən yüksək zirvələrini fəth etmək gücünü dünyaya göstərdi.

Bu qələbələr Azərbaycanın həm də paralimpiyanın inkişaf etdiyi bir ölkə olduğunu bir daha sübut etdi. Eyni zamanda, ölkəmizdə paralimpiyanın inkişafına göstərilən hərtərəfli dövlət dəstəyinin və bu dəstəyə qarşılıq idmançılarımızın yenilməz mübarizə əzminin məntiqi nəticəsi oldu.

Sentyabrın 6-da Prezident İlham Əliyevin Tokioda keçirilən XVI Yay Paralimpiya Oyunlarında ən yüksək nəticələrə görə əlilliyi olan idmançıları və onların məşqçiləri üçün mükafatların müəyyən edilməsi, eləcə də milli Paralimpiya komandamızın üzvlərinin təltif olunmasına dair sərəncamlar imzalaması da paralimpiyaçılara göstərilən yüksək diqqətin, onların qələbələrinə verilən böyük dəyərin bir təzahürüdür.

Hələ ötən əsrin 90-cı illərində ümummilli lider Heydər Əliyevin təşəbbüsü və xeyir-duası ilə formalaşan milli paralimpiya hərəkatı elə ilk vaxtlardan dövlət qayğısı ilə əhatə olunub. Bu qayğı, idmanımızı, paralimpiyamızı Zəfər yoluna səfərbər edən dövlət siyasəti Prezident İlham Əliyev tərəfindən yüksək səviyyədə davam etdirilir. Əlilliyi olan şəxslərin sosial müdafiəsinin gücləndirilməsi ilə yanaşı, əlilliyi olan şəxslərin idmana marağının artırılması, idmana cəlbi və paralimpiyanın inkişafı sahəsində ardıcıl və kompleks tədbirlər görülüb və görülməkdə davam edir.

Belə mühüm tədbirlərdən biri kimi, 2008-ci ildə Prezident İlham Əliyev və birinci xanım Mehriban Əliyevanın iştirakı ilə Sumqayıt şəhərində MDB məkanında ilk dəfə olaraq beynəlxalq standartlara uyğun Paralimpiya İdman Kompleksinin açılışı olub. Hazırda Əmək və Əhalinin Sosial Müdafiəsi Nazirliyinin tabeliyindəki Sosial Xidmətlər Agentliyinin nəzdində fəaliyyət göstərən bu kompleks paralimpiyaçılarımızın böyük qələbələrə nail olmaları üçün yüksək səviyyədə təlim-məşq prosesi keçmələrində mühüm rola malikdir. Tokioda Yay Paralimpiya Oyunlarında parlaq qələbələr qazanan idmançılarımızın böyük əksəriyyəti də bu Kompleksdə hazırlıq prosesi keçib.

Dövlət başçısı paralimpiyaçılarımızı daim diqqət mərkəzində saxlayaraq onlarla tez-tez görüşür, paralimpiyanın yüksək nailiyyətlər əldə etmələri üçün hər bir qayğını göstərir. Tokioda XVI Yay Paralimpiya Oyunları zamanı da bunun bir daha şahid olduq: Tokioda hər bir qələbə qazanan idmançımız Prezident İlham Əliyev və birinci xanım Mehriban Əliyeva tərəfindən təbrik edildi ki, bu da hər şeydən öncə paralimpiyaçılarımız üçün onları növbəti və daha böyük zəfərlərə ruhlandıran güclü mənəvi dəstək oldu.

Prezident İlham Əliyevin tapşırığı ilə Əmək və Əhalinin Sosial Müdafiəsi Nazirliyi tərəfindən əlilliyi olan şəxslər arasında idmanın təbliğinə, onların idmana aktiv şəkildə cəlb edilməsinə yönələn tədbirlər həyata keçirilməklə yanaşı, Milli Paralimpiya Komitəsinə illik əsasda maliyyə dəstəyi də ayrılır. Əmək və Əhalinin Sosial Müdafiəsi Nazirliyinin İctimaiyyətlə əlaqələr və kommunikasiya şöbəsindən AZƏRTAC-a bildirilib ki, son üç ildə bu vəsaitin məbləği 2 dəfə artırılaraq 2,2 milyon manatı ötüb.

Qeyd edək ki, bundan əvvəlki 6 Yay Paralimpiya Oyunlarında (Atlanta, Sidney, Afina, Pekin, London, Rio de Janeyro) milli paralimpiya komandamız cəmi 9 qızıl medal qazanmışdısa və 7 nəfər Paralimpiya çempionu olmuşdusa, tək Tokio Paralimpiya Oyunlarında qazandığı qızıl medalların sayı 14 olub. Digər tərəfdən, Azərbaycan yığması yeni dünya və paralimpiya rekordu müəyyən etdi, 2 idmançı dünya rekordunu, 1 idmançı isə paralimpiya rekordunu təzələdi. İlk dəfə olaraq bir idmançımız üçqat Paralimpiya çempionumuz kimi adını tarixə yazdı. Maraqlı və həm də fərəhli məqamlardan biri də Azərbaycan paralimpiya yığmasının cüdoçularının cüdonun ana vətəni sayılan Yaponiyada bütün rəqiblərini üstələyərək qələbə qazanmaları oldu. Həmçinin Azərbaycan “Tokio-2020” Paralimpiya Oyunlarını 10-cu pillədə başa vurdu ki, bu da indiyədək ölkəmizin bu Oyunlarda tutduğu yerlərdən (Atlantada yer tutmayıb, Sidneydə 60-cı, Afinada 45-ci, Pekində 38-ci, Londonda 27-ci, Rio de Janeyroda 47-ci yer) əhəmiyyətli dərəcədə yüksəkdir.

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video