24 Noyabr 2021 00:18
473
CƏMİYYƏT
A- A+

Şuşanın azad olunmasında iştirak etsə də, Zəfər gününün sevincini yaşaya bilmədi 

 

Tacəddin Şahəddin oğlu Əzizli qısa, lakin şərəfli ömrünü Vətənin bütövlüyü, torpaqlarımızın düşmən tapdağından xilas edilməsi uğrunda mübarizəyə həsr edərkən ölümü göz altına almışdı. Vətəni yaşatmaq üçün canından keçməyə hazır olan bütün igidlərimiz kimi.

1994-cü ilin avqustunda Salyan rayonunun Sarvan kəndində ziyalı ailəsində dünyaya göz açan Tacəddin ibtidai təhsilini doğulduğu kənddə, orta təhsilini Bakıda, ali təhsilini Ukraynada almış, hərbi xidmətini Qarabağda keçmişdi. Əsgəri xidmət zamanı öhdəsinə düşən işi layiqincə görmüş, hərbi texnikanı, döyüş qaydalarını lazımınca mənimsəmiş, fərqləndiyinə görə dəfələrlə fəxri fərmanlarla təltif olunmuşdu. Komandirləri həmişə ondan razı qalmış, valideynlərinə belə ağıllı, ləyaqətli və vətənpərvər övlad tərbiyə etdikləri üçün təşəkkür məktubları göndərmişlər.

2020-ci ilin iyul ayında erməni qəsbkarlarının Tovuz ətrafında törətdiyi təxribatlar ölkəmizin bütün gəncləri kimi, Tacəddini də silaha sarılmağa sövq etdi. İxtisası üzrə işləyib hər cür maddi təminatı olmasına baxmayaraq, onun üçün Vətən daha öndə idi. Bilirdi ki, ölkənin bu dar günündə onun kimi hərbi işi bilənlərə böyük ehtiyac var.

O, Vətən müharibəsində iştirak etdi. Füzulinin Qaraxanbəyli, Seyidəhmədli kəndlərində gedən döyüşlərə qatıldı, Ələsgərli kəndində şücaət nümayiş etdirdi. Oktyabrın 28-də üç döyüş yoldaşı ilə birlikdə erməni postunu ələ keçirdilər, düşmənin çoxlu sayda canlı qüvvəsini məhv edib 4 avtomobil və xeyli silah-sürsatını qənimət götürdülər. Sonra Cəbrayıl-Hadrut istiqamətində vuruşdu, komandirlərin tapşırıqlarını yüksək səviyyədə yerinə yetirdi, dəfələrlə yaralıların köməyinə yetişdi, ən çətin anlarda yoldaşlarına arxa oldu.

Tacəddinin qismətində Şuşaya qədər irəliləmək də varmış. Şuşanın alınmasında xüsusi şücaət göstərənlərdən biri də o oldu. Amma noyabrın 9-da - müharibənin zəfərimizlə bitməsinə cəmi bir neçə saat qalmış şəhidlik zirvəsinə yüksəldi.

Tacəddin Əzizli ölümündən sonra “Füzulinin azad olunmasına görə”, “Şuşanın azad olunmasına görə”, “Vətən uğrunda” medalları ilə təltif edilmişdir.

 

Seyran CAVADOV,

“Azərbaycan”

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video