Suriya hakimiyyət orqanları Ərəb Dövlətləri Liqasının (ƏDL) təklif etdiyi dinc tənzimləmə planını qəbul etmişdir. Bu barədə "Frans Press" agentliyi xəbər verir. ƏDL-in planı ölkənin bütün yaşayış məntəqələrindən qoşun bölmələrinin çıxarılmasını, məhbusların həbsdən azad edilməsini, habelə dinc əhaliyə qarşı zorakılığın dayandırılmasını nəzərdə tutur. Bundan əlavə, Suriya hakimiyyət orqanları ƏDL-ə və xarici KİV-yə ölkədə baş verənlər barədə doğru məlumat verməyi öhdəsinə götürür.

Qətərin Baş naziri və xarici işlər naziri Şeyx Həməd bin Casim Sani bununla bağlı demişdir: "Biz razılaşmanın əldə olunmasına sevinirik. Plan həyata keçdikdən sonra isə daha çox sevinəcəyik".

Öz növbəsində, ABŞ bildirmişdir ki, Suriyada zorakılığın dayandırılmasına yönəldilmiş bütün səyləri dəstəkləyir. Amma Vaşinqton əvvəlki kimi hesab edir ki, Prezident Bəşşar Əsəd legitimliyini itirmişdir və vəzifəsindən getməlidir. Ağ evin rəsmi nümayəndəsi Cey Karninin dediyinə görə, "ABŞ-ın Əsədə münasibəti dəyişməz qalır".

Xatırladaq ki, bu ilin martından bəri Suriyada hökumət əleyhinə kütləvi çıxışlar davam edir. Nümayiş iştirakçıları Prezident Əsədin istefaya çıxmasını və ölkədə siyasi islahatların keçirilməsini tələb edirlər. Hakimiyyət nümayişçilərə qarşı sərt tədbirlər görür. Hüquq-müdafiə təşkilatlarının məlumatına əsasən, hökumət qoşunları ilə etiraz aksiyalarının iştirakçıları arasında toqquşmalar nəticəsində 3 min nəfərdən çox adam həlak olmuşdur.

"Röyter" agentliyinin verdiyi xəbərə görə, dünən Suriyanın hökumət qoşunları Homs şəhərində qalmışlar. Əsgərlər və tanklar şəhərin məhəllələrini atəşə tuturlar. Nəticədə Bab Əmro rayonunda azı 3 nümayişçi öldürülmüşdür.