Dövlət Statistika Komitəsi məlumatlarının istifadəçiləri ilə əlaqələri möhkəmləndirmək üçün vaxtaşırı müxtəlif mövzularda treninqlər keçirir. Bu günlərdə komitədə keçirilən treninq demoqrafiya mövzusunda idi: "2009-cu il əhalinin siyahıyaalınmasının nəticələri əsasında siyahıyaalmalararası dövrdə (2000-2008-ci illərdə) əhalinin sayı və tərkibi haqqında məlumatların yenidən hesablanması metodu".

Demoqrafiya və sosial statistika şöbəsi müdirinin müavini Rza Allahverdiyev bildirdi ki, ölkədə əhalinin siyahıyaalınması hər 10 ildən bir keçirilir. Bunun üçün ölkə Prezidenti fərman imzalayır. Lakin siyahıyaalmalararası müddətdə də əhalinin sayı və tərkibi haqqında məlumatlar hazırlanır və istifadəçilərə çatdırılır. Demoqrafiya  statistikası sahəsində mövcud olan sistemlərdən danışarkən natiq qeyd etdi ki, əhalinin təbii və miqrasiya hərəkəti barədə məlumatları Statkomun Baş Hesablama Mərkəzi şəhər və rayon statistika idarələrindən alır. Əhalinin miqrasiya hərəkəti barədə sözügedən idarələrə Daxili İşlər Nazirliyinin şəhər və rayon pasport xidmətləri məlumat verir. Təbii hərəkət - doğum və ölüm, nikahlar və boşanmalar haqqında məlumat isə Ədliyyə Nazirliyinin qeydiyyat orqanlarından daxil olur. Üstəlik, doğum və ölüm haqqında məlumatlar Səhiyyə Nazirliyinin məlumatları əsasında dəqiqləşdirilir.

Treninqdə Statistik Məlumatların Elmi-Tədqiqat və Layihə-Texnoloji Mərkəzinin direktoru Saleh Mövlamov əhalinin təbii hərəkəti üzrə qlobal məlumat şəbəkələrindən geniş söhbət açdı. Deyilənlər Azərbaycanın  66 rayonundan birinə - Masallıya aid rəqəmlər əsasında slaydda əyani göstərildi. Statistik məlumatların tədbirdə iştirak edən istifadəçilərinin sualları da ətraflı cavablandırıldı.

"Azərbaycan"