Astara təkcə tərəvəzi, çayı ilə deyil, həm də sitrus meyvələri ilə tanınır. Rayonda hazırda 1900 hektar bar veren sitrus və subtropik bağları var. Həmin bağlardan hər il orta hesabla 25 min tondan çox məhsul yığılır.

Sitrus və subtropik meyvəçilik gəlirli sahələrdən biridir. Limon, narıngi, feyxoa, kivi və digər məhsullar alıcı sarıdan heç vaxt korluq çəkmir. Odur ki, istər fermer, istərsə də fərdi təsərrüfatlarda çalışanların sitrus meyvəçiliyinin inkişafına marağı çox olur. Rayonumuzun Kijəbə qəsəbəsinin, Şüvi, Siyaku, Maşxan, Təngərüd və digər kəndlərin ərazisində sitrus bağları salınıb. Həmin kəndlərdə yaşayanlar öz həyətyanı təsərrüfatlarında da sitrus ağacları əkmişlər.

Bu il yayın quraq keçməsinə baxmayaraq, sitrus bağlarının suvarılması, becərilməsi və ziyanverici xəstəliklərə qarşı mübarizə yaxşı təşkil edilmişdir. Çəkilən zəhmət isə öz bəhrəsini vermişdir. Əvvəlki illərdən fərqli olaraq  bağlarda daha bol məhsul yetişdirilmişdir. Yığım başlanandan bağlardan 10 min tondan çox məhsul yığılmışdır. Daha 10 min tondan da çox limon, feyxoa, narıngi, kivi və digər məhsulların yığımı gözlənilir. Yığılan məhsullar rayondakı bazarlarda, Bakıda keçirilən kənd təsərrüfatı məhsulları yarmarkalarında satılır. Paytaxt alıcıları Astarada yetişdirilən sitrus meyvələrinə daha çox maraq göstərir, keyfiyyətli, dadlı olduğuna görə razılıq edirlər. Bu da səbəbsiz deyil. Ekoloji cəhətdən təmiz sitrus həm də dadlıdır. Bir çox xəstəliklərin müalicəsində limonun, feyxoanın, kivinin rolu danılmazdır. Odur ki, regionların sosial-iqtisadi inkişafı 2-ci Dövlət Proqramına uyğun olaraq, rayonda yeni sitrus bağları salınır, həyətyanı təsərrüfatlarda təzə ağaclar əkilir.

Allahverən MAHMUDOV,

Astara RİH başçısının aqrar məsələlər üzrə müavini