Bu gün hər bir azərbaycanlı azad, müstəqil dövlətin vətəndaşı olması ilə fəxr edir, sonsuz qürur hissi keçirir. Bu müstəqillik igid və qeyrətli oğullarımızın canı, qanı bahasına  əldə edilib. Mən bir ana kimi ikiqat qürur hissi keçirirəm ki, müstəqilliyimizin qazanılmasında və möhkəmlənməsində oğlum Elgizin də payı var. Erməni işğalçıları müstəqilliyimizin ilk illərində torpaqlarımıza təcavüz edəndə o da silaha sarılaraq düşmənlə savaşa yollandı. Ağır döyüşlərin birində qəhrəmancasına həlak olaraq şəhidlik zirvəsinə yüksəldi...

Oğlum Elgizin Vətənin azadlığı uğrunda göstərdiyi şücaətlər layiqincə qiymətləndirildi: ulu öndər Heydər Əliyevin sərəncamı ilə ona ən yüksək fəxri ad - Azərbaycanın Milli Qəhrəmanı adı verildi.

Vaxtilə təhsil aldığı orta ümumtəhsil məktəbi indi Elgizin adını daşıyır. Bu məktəbin şagirdləri, eləcə də müəllim kollektivi müntəzəm olaraq mənimlə görüşür, problemlərimlə maraqlanır, qayğı yükümü azaltmağa çalışırlar. Onun ruhuna yüksək ehtiram göstərilməsi bir şəhid anası kimi mənim ağrılarımı azaldır, yarama məlhəm qoyur.

Ulu öndərin siyasi kursunun layiqli davamçısı olan möhtərəm Prezident İlham Əliyev tərəfindən də torpaqlarımızın azadlığı uğrunda canlarını fəda edən şəhidlərimizin adı uca tutulur, onların ailə üzvlərinə hər cür hörmət və ehtiram göstərilir.

Dövlət müstəqilliyimizin 25-ci ildönümü ərəfəsində Prezident İlham Əliyevin sərəncamı ilə Azərbaycanın Milli Qəhrəmanlarının ailəsinə verilən təqaüdün 30 faiz artırılması  dövlət qayğısının daha bir təzahürüdür.

Qumru KƏRİMOVA,

Azərbaycanın Milli Qəhrəmanı Elgiz Kərimovun anası,

Bərdə rayonu