"Amnesty İnternational" beynəlxalq hüquq-müdafiə təşkilatı Liviya Milli Keçid Şurasını (MKŞ) hərbi cinayətlər törətməkdə şübhəli bilir. Təşkilatın saytında dərc olunmuş 107 səhifəlik hesabatda MKŞ qüvvələrinin bu ilin aprelindən iyul ayınadək törətdiyi cinayətlər açıqlanmışdır. Məsələn, hesabatda Müəmmər Qəzzafinin 10 tərəfdarının qətlə yetirildiyi, habelə hökumət qoşunlarının əsir götürülmüş əsgərlərinin işgəncəyə məruz qalması halları barədə məlumat verilir. Bundan əlavə, üsyançılar Saxaranın şimalındakı Afrika qəbilələri nümayəndələrinə münasibətdə ksenofobiyada ittiham edilirlər. Hesabatda bildirilir ki, liviyalılar dəfələrlə zənciləri qarət etmişlər.

Eyni zamanda təşkilatın hesabatında qeyd olunur ki, Liviyanın yeni hakimiyyətinin məsuliyyət daşıdığı cinayətlərin miqyası Qəzzafi rejiminin qəddarlığı ilə heç cür müqayisə oluna bilməz. MKŞ-nin nümayəndələri bu ittihamları rədd etmişlər. Keçid hökumətinin ədliyyə naziri Məhəmməd Əlağinin dediyinə görə, Qəzzafi əleyhdarlarının hərəkətlərini hərbi cinayət adlandırmaq düzgün deyil, çünki MKŞ-nin tərəfdarları hərbçi deyil, üsyançıdırlar. Eyni zamanda Əlaği Qəzzafi əleyhdarlarının müəyyən səhvlərə yol verdiklərini etiraf etmişdir.

Hesabatda həmçinin Qəzzafi rejiminin törətdiyi cinayətlərin geniş siyahısı açıqlanır. Söhbət Liviyada vətəndaş müharibəsi zamanı törədilmiş cinayətlərdən gedir. Hüquq müdafiəçilərinin məlumatına əsasən, Qəzzafinin tərəfdarları bir çox silahsız nümayişçini qətlə yetirmiş və yaralamış, minlərlə adamı oğurlamışdır. Bundan əlavə, onlar qadağa olunmuş kasset bombalarından istifadə etmiş və dinc sakinləri top atəşinə tutmuşlar.