Havaların soyuması, normadan artıq qarın yağması nəticəsində Şimal bölgəsində yaranan fəsadları aradan qaldırmaq üçün yerlərdə operativ tədbirlər görülmüşdür və hazırda bu istiqamətdə işlər davam etdirilir.

Sumqayıtda əlaqədar təşkilatlar gücləndirilmiş iş rejiminə keçmişlər. Şəhər icra hakimiyyətində yaradılan qərargaha hər saat məlumatlar verilir. Bakı istiqamətində küçə və prospektlər ardıcıl olaraq təmizlənir. Küçələrdə, eləcə də mikrorayon və məhəllələrdə  yarana biləcək neqativ halları aradan qaldırmaq üçün xüsusi komissiyalar yaradılmış, kommunal xidmətlər də daxil olmaqla bütün idarə və təşkilatlar işə cəlb edilmişlər.

İlk növbədə soyuq havanın hökm sürdüyü günlərdə şəhərdə gediş-gəlişi təmin etmək üçün küçələrə qum və duz tökülür. Buz bağlamış səkiləri isə mənzil istismar sahələrinin işçilərindən ibarət xüsusi briqadalar təmizləyirlər. Nəqliyyat Nazirliyinin Sumqayıt Şəhər Departamenti, Dövlət Yol Patrul Xidmətinin əməkdaşları, Enerji Satışı İdarəsinin, qaz təsərrüfatının məsul işçiləri küçələrdən əl-ayaq yığışana qədər hərəkətə və əhalinin yaşadığı mənzillərin qızdırılması məsələlərinə nəzarət edirlər.

Onu da qeyd edək ki, əvvəlki illərdən fərqli olaraq qışın daha soyuq və şaxtalı keçməsinə baxmayaraq, şəhərdə elə bir ciddi hadisə qeydə alınmamış, əhali fasiləsiz qaz və işıqla təmin edilmişdir.

Qubada yağan qarın hündürlüyü 45 santimetri keçmiş, bəzi ərazilərdə isə daha artıq olmuşdur. Xınalıq, Qırız və daha bir neçə kəndə gedən yol bağlanmışdır. Hazırda rayonun əsas yollarına duz və qum tökülür. Havaların isinməsindən istifadə edən əlaqədar təşkilatlar yollardakı qarın təmizlənməsilə məşğuldur. Bakı və Qusar istiqamətində qarın təmizlənməsi davam etdirilir.  

Akif ƏLİYEV,

"Azərbaycan"