Sentyabrın 28-də Milli Məclisin Mədəniyyət komitəsinin iclası keçirilmişdir. Komitənin sədri Nizami Cəfərov Mədəniyyət komitəsinin ötən dövrdəki fəaliyyəti barədə məlumat vermiş, yeni qanun layihələrindən danışmışdır.  

Komitə sədri qeyd etmişdir ki, payız sessiyasında parlamentin müzakirəsinə çıxarılacaq yeni qanun layihələrindən biri də  "Azərbaycan muğam sənətinin qorunması və inkişaf etdirilməsi haqqında" Azərbaycan Respublikası qanununun layihəsidir. O demişdir ki, bu qanunun qəbulunda məqsəd muğam sənətinin ictimai əlaqələr sistemindəki yerini və hüquqi vəziyyətini müəyyənləşdirmək, azərbaycanlıların mədəni irsinin tərkib hissəsi olan və tarixən ifa etdikləri Azərbaycan muğamlarının hüquqlarının qorunması, öyrənilməsi, tədqiqi, tədrisi, təbliği və inkişaf etdirilməsi ilə bağlı yaranan münasibətləri tənzimləməkdir. Qanun Azərbaycan xalqının tarixən yaratdığı və şifahi ənənədə mövcud olmuş, eyni zamanda ədəbi abidələr, əlyazmalar, vallar, lent yazıları, kinolentlər və digər mənbələrdə əksini tapmış, eləcə də hazırda peşəkar xanəndələr və çalğıçılar tərəfindən ifa olunan, təhsil müəssisələrində tədris edilən və araşdırılan Azərbaycan muğam sənəti nümunələrinə şamil ediləcək. Qanun layihəsi 4 fəsil 9 maddədən ibarətdir.

Müzakirələr zamanı komitənin sədr müavini Rafael Hüseynov, deputatlar Jalə Əliyeva, Sahibə Qafarova, Leyla Abdullayeva, xalq artsitləri  Arif Babayev, Əlibaba Məmmədov, Milli Konservatoriyanın rektoru Siyavuş Kərimi və başqaları qanun layihəsi barədə fikirlərini bölüşmüş, rəy və təkliflərini bildirmişlər.

Fikir mübadiləsinin yekununda qanun layihəsinin Milli Məclisin payız sessiyasında müzakirəyə çıxarılması məqsədəuyğun sayılmışdır.