Yanvarın 10-da Azərbaycan xarici işlər nazirinin müavini Xələf Xələfov ölkəmizdə səfərdə olan Finlandiyanın ATƏT Parlament Assambleyasındakı nümayəndə heyətinin rəhbəri İlkka Kanerva ilə görüşmüşdür.

Xarici İşlər Nazirliyinin mətbuat xidmətindən AzərTAc-a bildirmişlər ki, finlandiyalı deputat Azərbaycana səfərlərinin mühüm əhəmiyyət kəsb etdiyini vurğulayaraq səfər proqramının zəngin olduğunu demişdir. Respublikamızın mühüm geostrateji məkanda yerləşdiyi, böyük iqtisadi imkanlara malik olduğu və beynəlxalq arenada özünəməxsus yer tutduğunu xüsusi qeyd edən qonaq Azərbaycanın onun ölkəsi üçün həm ikitərəfli, həm də beynəlxalq təşkilatlar çərçivəsində əməkdaşlıq baxımından böyük maraq kəsb etdiyini bildirmişdir.

X.Xələfov isə Cənubi Qafqaz və Xəzər regionlarının bir çox aspektlər baxımından dünya ictimaiyyətinin diqqət mərkəzində olduğunu demişdir.

Qonağa Ermənistan-Azərbaycan, Dağlıq Qarabağ münaqişəsi barədə məlumat verən nazir müavini ATƏT-in Minsk qrupunun problemin sülh yolu ilə həlli istiqamətində səylərinin lazımi nəticə vermədiyini və Ermənistanın Azərbaycan torpaqlarının işğalını davam etdirməsi ilə yanaşı, azərbaycanlı qaçqın və məcburi köçkünlərin doğma yurd-yuvalarına hələ də qayıda bilmədiklərini demişdir. Münaqişənin həll olunmamış qalmasının bütün regionun sabitliyinə və inkişafına mane olduğunu diqqətə çatdıran X.Xələfov Ermənistanın beynəlxalq hüquqa hörmətsizlik göstərməkdə davam etdiyini, danışıqlarda qeyri-konstruktiv mövqe tutduğunu və ATƏT-in Minsk qrupunun buna göz yummasının yolverilməz olduğunu bəyan etmişdir. Nazir müavini müasir dövrdə sərhədlərin zorla dəyişdirilməsinin və dövlətlərin ərazilərinin işğal edilməsinin qəbuledilməz olduğunu bir daha vurğulamışdır.