KD Küveyt dinarı:

Dünyanın ən bahalı valyutası Küveyt dinarı Küveyt dövlətinin rəsmi pul vahididir. 1961-ci ildə Körfəz rupisini əvəz edən dinar 1966-cı ildən yeganə valyutaya çevrilib. Küveyt dinarının dəyərinin yüksək olması ölkənin sürətlə inkişaf edən iqtisadiyyatı ilə əlaqəlidir. Əsginaslar xüsusi dizaynla hazırlanıb. Hətta görmə əngəlli insanlar əsginasları üzərindəki simvollara toxunmaqla asanlıqla tanıya bilərlər. Hazırda 1 Küveyt Dinarı 3,32 ABŞ dollarıdır.

Funt sterlinq:    

Böyük Britaniyanın milli valyutası olan funt sterlinq məzənnədə dəyəri ilə ikinci sırada yer alır. Pul vahidinin adı “Libra” sözünü ifadə edir. Bu söz ingilis dilindən tərcümədə tərəzi mənasını verir. Sterlinqin işarəsi ( ) də məhz “Libra” sözünün baş hərfi olan “L”-dən götürülüb. Bu pul sikkə şəklində ilk dəfə 1489-cu ildə İngiltərə kralı VII Henrinin hakimiyyətdə olduğu zaman ortaya çıxıb. İngiltərədə bankın yaranmasından sonra 1694-cü ildən kağız əsginaslar dövriyyəyə buraxılıb. 2002-ci ildən Avropa Birliyində olan bir çox ölkələr vahid pul valyutası kimi avroya keçsələr də, Birləşmiş Krallıq funt sterlinqi milli valyuta kimi saxlayıb.

Avro:

Avropa Birliyinə daxil olan ölkələrin iqtisadi və pul siyasətini daha yaxşı əlaqələndirmək üçün ötən əsrin sonlarında plan hazırlandı. Vahid pul sistemi həmin ölkələr arasında ticarət münasibətlərinin daha asan həyata keçirilməsini təmin etməli idi. Bunun nəticəsi olaraq Avropa İttifaqının pul vahidi olan avro 1999-cu ildə yarandı. Avro əvvəlcə nağdsız istifadə şəklində təqdim edildi. Lakin 2002-ci ildən etibarən sikkə və kağız əsginaslar istehsal edilərək Avropa Birliyinin 12 üzv ölkəsinin yeganə valyutası statusunu qazandı. Birliyə üzv olmayan bəzi ölkələr də avrodan istifadə etməyə başladılar. Hazırda avro 19 ölkənin rəsmi valyutasıdır.

Dollar:

Mövcudluğu Amerikadan başlayan dolların ilk nümunə sikkəsi 1792-ci ildə buraxılmışdı. Bu sikkə Peru və Meksikada istifadə edilən İspan dollarına bənzəyirdi. Lakin bir müddət sonra ABŞ-da mövcud olan digər valyutalar dövriyyədən çıxarıldı. Dolların ilk əsginasları 1861-ci ildə nəşr olunmuşdu. Həmin əsginaslar yaşıl rəngdə olduğu üçün “yaşıl pul” kimi də tanınırdı. Dollar 1944-cü ildə ABŞ-ın rəsmi valyutası kimi qəbul edildi. Bununla da dünyanın ən dominant valyutalarından birinə çevrildi. Hər bir kağız pulun üzərinə “In God We Trust” (Biz Allaha inanırıq) şüarının əlavə edilməsi haqqında qanun qəbul edildikdən sonra bugünkü əsginasların dizaynı 1963-cü ildə hazırlanıb. Hər sikkə və əsginasda təsvir edilən şəxslər Amerika tarixi üçün xüsusi önəm kəsb edən şəxsiyyətlərdir. 

Aydan XƏLİLOVA,

“Azərbaycan”