Beynəlxalq idman aləminin ən populyar yarışlarından olan Olimpiya oyunları ilk dəfə Yunanıstanda, İdalı Heraklın (Zevsin oğlu Herakl ilə qarışdırılmamalıdır) şərəfinə təşkil edilib.

Belə ki, rəvayətə əsasən anası Reya yeni doğulmuş Zevsi kahinlərə verir. Həmin kahinlərdən beşi Krit adasında yerləşən İda şəhərindən Olimpiyaya gəlir. Həmin vaxt Olimpiyada artıq Kronosun şərəfinə ucaldılmış məbəd var idi. Hamını qaçış yarışlarında məğlub edən Herakl cır zeytun ağacının budağı ilə mükafatlandırılır. Herakl həm də yarışların Olimpiyaya gəlmiş idalı qardaşların sayına görə beş ildən bir (bütün illər sayılır) keçirilməsinin əsasını qoyur. Lakin sonra oyunların keçirilməsinə son qoyulur. Oyunlar bir də e.ə. 776-ci ildə bərpa edilir.

Qədim Yunanıstanda Olimpiya oyunlarının yaranmasından söz düşəndə oyunların əsası bir növ dinə sitayiş, ibadət nəzəriyyəsinə əsaslandırılırdı. Burada stadion, teatr və məbəd müqəddəs yer sayılıb.

Marafon qaçışı da ilk dəfə Yunanıstanda yaranaraq dünyaya  yayılıb. E.ə. 490-cu ildə İran ordusu Naksos adasını, Evbeya adalarında Karistos və Eretriya şəhərlərini tutaraq Afinadan 42 km aralı Marafon düzənliyinə gəlib çatır. Bu döyüşdə İran ordusu böyük itkilər verir. Yunan döyüşçülərindən biri Fiddipid bu qələbə xəbərini Marafon düzənliyindən Afinaya qədər 42 km qaçaraq çatdırıb. Lakin onun ürəyi partlayaraq ölüb. Marafon qaçışı da ilk dəfə Yunanıstanda həmin döyüşçünün şərəfinə yaranıb.