Dünən Milli Məclisin Sosial-siyasət komitəsinin iclası keçirilib. İclasda beş qanuna təklif olunan dəyişikliklər müzakirə edilib.

İclasda çıxış edən adı çəkilən komitənin sədri Hadı Rəcəbli deyib ki, "Sosial müavinətlər", "Bədən tərbiyəsi və idman", "Sosial sığorta", "İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta" haqqında qanunlara və İnzibati Xətalar Məcəlləsinə dəyişikliklər olunması təklif edilir. İnzibati Xətalar Məcəlləsinin İcbari sığorta müqaviləsinin bağlanmaması maddəsinə təklif olunan müddəada qeyd olunur ki, "İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta haqqında" qanuna əsasən müvafiq riskləri icbari qaydada sığorta etdirmək vəzifəsi müəyyən edilmiş fiziki və ya hüquqi şəxslər tərəfindən sığortaçı ilə icbari sığorta müqaviləsinin bağlanmamasına görə, fiziki şəxslər 500, vəzifəli şəxslər 1500, hüquqi şəxslər 5 min manat cərimə olunacaq. Bu dəyişiklik qanunun tələblərinə əsasən sığorta olunanlar və sığortalıların hüquqlarının qorunması ilə əlaqədar inzibati məsuliyyətin gücləndirilməsi məqsədini daşıyır.

"Bədən tərbiyəsi və idman haqqında" qanuna isə idman mərc oyunları ilə bağlı yeni müddəa daxil olur. Müzakirələrdən sonra təklif olunan bütün dəyişikliklər Milli Məclisin plenar iclasına tövsiyə olunub. Komitə sədri onu da bildirib ki, bu sessiyada "Uşaqların istirahətinin təşkili haqqında" yeni qanun layihəsi hazırlanaraq müzakirə ediləcək.

"Azərbaycan"