22:55 28 Sentyabr 2021
ONLINE XƏBƏR LENTİ
Tarix Muzeyi: Azərbaycanda neft sənayesi fotolarda
BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

“Greentech Summer Camp 2021” təlimi keçirilib
 
ANA SƏHİFƏ / İQTİSADİYYAT
15:38 08.07.2021

İyulun 7-8-də Energetika Nazirliyi ilə “Masdar” və BP şirkətləri arasında mövcud əməkdaşlıq çərçivəsində “Greentech Summer Camp 2021” adlı təlim proqramı təşkil edilib.

AZƏRTAC xəbər verir ki, təlim proqramı Energetika Nazirliyi yanında Bərpaolunan Enerji Mənbələri Dövlət Agentliyinin tabeliyindəki Qobustan Hibrid Elektrik Stansiyasında həm fiziki, həm də onlayn təşkil edilməklə hibrid formada keçirilib. Proqramın əsas mövzusunu bərpaolunan enerji mənbələrindən istifadə, günəş və külək enerjisi, dənizdə külək enerjisi, hidrogen enerjisi, elektroliz vasitəsilə “yaşıl hidrogen”in istehsalı, hidrogen yanacaq elementlərinin əsasları və “yaşıl enerji” texnologiyalarının tətbiqi təşkil edib. Bərpaolunan Enerji Mənbələri Dövlət Agentliyi, “Masdar” və BP şirkətlərinin mütəxəssislərinin məruzələri təqdim edilib və müzakirələr aparılıb.

Təlimin ikinci günündə iştirakçılara sertifikatlar təqdim edilib. Təqdimetmə mərasimində energetika nazirliyinin aparat rəhbəri Zaur Məmmədov, BP şirkətinin Yaxın Şərq və Xəzər regionunda kommunikasiya və xarici əlaqələr üzrə vitse-prezidenti Bəxtiyar Aslanbəyli və “Masdar” şirkətinin baş meneceri Husain Al Meer də iştirak ediblər.

Z.Məmmədov təlim proqramının iştirakçılarını təbrik edib və qarşıdakı fəaliyyətlərində uğurlar arzulayıb. Bildirilib ki, bərpaolunan enerji mənbələrindən istifadənin genişləndirilməsi Prezident İlham Əliyev tərəfindən 2030-cu ilə qədər ölkəmizdə sosial-iqtisadi inkişaf kursunun, eləcə də təmiz ətraf mühitə nail olmağın mühüm prioritetlərindən biri kimi müəyyənləşdirilib: “Azərbaycanın elektroenergetika sistemində bərpaolunan enerjinin qoyuluş gücü olaraq payını 30 faizə çatdırmaq hədəfi, özəl, o cümlədən xarici investisiyaların cəlbi ilə əlaqədar görülən tədbirlər, xüsusilə də azad edilmiş ərazilərin “yaşıl enerji zonası”na çevrilməsi ilə bağlı planlar beynəlxalq şirkətlərlə enerji əməkdaşlığının inkişafı üçün böyük imkanlar yaradır. Bu əməkdaşlıq çərçivəsində təhsil müəssisələri və əlaqədar qurumlar üçün məlumatlandırma və təcrübə mübadiləsi tədbirlərinə də xüsusi önəm verilir ki, hazırkı iki günlük təlim proqramı bunun bariz nümunəsidir”.

BP-nin vitse-prezidenti Bəxtiyar Aslanbəyli bildirib: “Biz çox məmnunuq ki, Azərbaycan hökuməti dünyanın az karbonlu enerjiyə olan ehtiyacını qarşılamaq üçün qlobal səyləri fəal dəstəkləyir və ölkədə davamlı bərpa olunan enerji sektorunun inkişafı istiqamətində geniş işlər aparır. Azərbaycanın uzunmüddətli və etibarlı tərəfdaşı kimi ölkənin bərpa olunan enerji sahəsində beynəlxalq bilikləri bölüşmək və təcrübə mübadiləsi aparmaq səylərini həmişə dəstəkləmişik. Düşünürük ki, bu fəaliyyətlər Azərbaycanla enerji sahəsində olan əməkdaşlığımızı genişləndirmək və ölkənin enerji keçidinə dəstək vermək üçün yeni imkanlar açır. Eyni zamanda, bu, BP-nin insanlar və planetimiz üçün enerji haqqında təsəvvürləri yenidən formalaşdırmağa yönəlmiş yeni məram, hədəf və strategiyasına da uyğundur. Hədəfimiz 2050-ci ilə qədər və ya daha tez “xalis sıfır” emissiyaya nail olmaq və dünyanın da bu hədəfə çatmasına yardım etməkdir, yeni strategiyamızın müəyyənləşdirdiyi işlər isə bizi bu hədəfə çatdıracaq.”

"Azərbaycan və Birləşmiş Ərəb Əmirlikləri iqtisadiyyatlarımızın neft və qaza əsaslandığı ümumi irsi bölüşsələr də, bu gün ölkələrimiz anlayırlar ki, şaxələndirilmiş enerji balansına investisiyalar yalnız düzgün etik seçim deyil, həm də ağıllı iqtisadi strategiyadır. İqlim dəyişikliyinin nəticələrinin yumşaldılması üçün lazım olan investisiyalar Azərbaycan iqtisadiyyatının inkişafına və şaxələndirilməsinə, bilik və bacarıqların toplanmasına kömək edəcək, həmçinin bizim hamımıza təsir edən qlobal problemin həllinə əməli töhfə verəcəkdir. Masdar 2006-cı ildən etibarən iqlim dəyişikliyi probleminin həllində fəal rol oynayır və Azərbaycanın bərpa olunan energetika sahəsini inkişaf etdirməyə, enerji mənbələrini şaxələndirməyə və davamlı inkişafı stimullaşdırmağa kömək etmək üçün dünyanın 30-dan çox ölkəsində topladığımız təcrübədən istifadə etmək bizim üçün böyük şərəfdir” - deyə “Masdar” şirkətinin aktivlərin idarə edilməsi və texniki xidmətlər üzrə baş meneceri Husain Al Meer bildirib.

Təlim proqramında ADA Universitetinin, Bakı Ali Neft Məktəbinin, Azərbaycan Texniki Universitetinin və Azərbaycan Dövlət Neft və Sənaye Universitetinin tələbələri, həmçinin Energetika Nazirliyi, Ekologiya və Təbii Sərvətlər Nazirliyi, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi, SOCAR, BP, “Masdar” şirkəti və “Azərenerji” ASC-nin nümayəndələri iştirak ediblər.



NƏŞRLƏRİMİZ
Reklam
Reklam


HAVA PROQNOZU
VALYUTA
InvestAZ
ARXİV
TƏQVİM