Cari ilin ikinci rübü ərzində yeni, yenidən qurulan, istifadə olunmasına icazə verilmiş gücü artırılan və enerji təchizat sxemini dəyişən tikinti obyektinin xarici elektrik enerjisi təchizatı üçün quraşdırılmış elektrik qurğularına Enerji Məsələlərini Tənzimləmə Agentliyi (AERA) tərəfindən verilmiş istismara buraxılış aktlarının sayı birinci rüblə müqayisədə 85 faiz artaraq 63 akt təşkil edib.

Agentlikdən AZƏRTAC-a bildirilib ki, ötən rüb müxtəlif tikinti obyektlərinin elektrik qurğularının ekspertizadan keçirilərək razılaşdırılmış layihə sənədlərinin sayı ilk rüblə müqayisədə 47 faiz artaraq 72 layihə təşkil edib. İkinci rübdə aşkar olunmuş çatışmazlıq səbəbindən elektrik qurğularına aid 16, qaz qurğularına aid 19 layihə sənədinin razılaşdırılmasından imtina olunub. Keçən rüb 26 hesablaşma elektrik sayğacının texniki vəziyyətinə baxış keçirilib, cərəyan transformatorlarının sxemləri və əmsalları yoxlanılaraq möhürlənib, sayğaclar kompüterlə oxunub.

İkinci rübdə razılaşdırılmış layihəyə əsasən tikintisi başa çatdırılmış sənaye qaz qurğularının istismarına icazələrin sayı birinci rüblə müqayisədə 35 faiz azalıb və 162 icazə təşkil edib. Ötən rüb qaz təchizatı üçün layihə sənədləri ekspertiza olunmuş və razılaşdırılmış tikinti obyektlərinin sayı ilk rüblə müqayisədə 11 faiz azalıb və 828 tikinti obyekti təşkil edib. İkinci rübdə qazpaylayıcı şəbəkəyə texniki sənədləşdirmə aparılmadan 2, elektrik şəbəkəsinə isə 2 qeyri-qanuni qoşulma faktı aşkar edilib.

Keçən rüb ərzində tərtib edilmiş inzibati xəta haqqında protokolların sayı 22,5 faiz artaraq 49-a, protokollar üzrə qəbul edilən qərarların sayı isə 59 faiz artaraq 81-ə çatıb.