31 Dekabr 2011 01:12
304
SİYASƏT
A- A+

Əməkdaşlığın inkişaf perspektivləri müzakirə olunmuşdur

 

Azərbaycanın Ukraynadakı səfiri Eynulla Mədətli Lvov şəhərinə səfər etmişdir.  Səfir Lvov vilayəti Dövlət Administrasiyasının rəhbəri M.Kostyuk və şəhərin meri A.Sadovoy ilə görüşmüşdür. Görüşlərdə Lvov vilayəti ilə Azərbaycan arasında elmi, mədəni, iqtisadi əlaqələrin genişləndirilməsi məsələləri müzakirə edilmişdir.

Lvov şəhər və vilayət rəhbərliyi regionun investisiya imkanları, xüsusilə kurort-turizm sahəsində mövcud potensial barədə məlumat verərək Azərbaycan sərmayəçilərinin bu imkanlardan istifadə etmələrinin ölkələrimiz arasında münasibətlərin daha da genişləndirilməsinə əhəmiyyətli töhfə verəcəyini vurğulamışdır. Qeyd olunmuşdur ki, Azərbaycandan olan sərmayəçilər üçün əlverişli investisiya mühiti təmin ediləcəkdir.

Bundan əlavə, şəhər meriyasında təntənəli şəraitdə Lvovun ən nüfuzlu təhsil ocaqlarından olan Dövlət Bədən Tərbiyəsi Universitetinin qurucularından biri, tibb elmləri doktoru, professor, Ukraynanın əməkdar bədən tərbiyəsi və idman xadimi, həmyerlimiz Məmməd Cəfərova Azərbaycan Prezidenti İlham Əliyevin sərəncamı ilə verilmiş "Əməkdar bədən tərbiyəsi və idman xadimi" fəxri adının şəhadətnaməsi və nişanı təqdim olunmuşdur. Azərbaycan Tibb Universitetinin məzunu olan professor M.Cəfərov 1946-cı ildən etibarən həyatını Lvov şəhəri ilə bağlamış, Dövlət Bədən Tərbiyəsi Universitetinin anatomiya və biokimya kafedrasının yaradıcısı və uzun illər ərzində dəyişməz rəhbəri, fakültə dekanı kimi Ukraynada və bütünlükdə keçmiş SSRİ-də bədən tərbiyəsi və idmanın inkişafına əvəzsiz xidmətlər göstərmişdir. Yüzlərlə elmi əsərin və dərsliklərin müəllifi, SSRİ Maarif Nazirliyi Ali Attestasiya Komissiyasının üzvü olan M.Cəfərovun elmi nailiyyətləri Azərbaycanda da geniş tətbiq olunmuş, respublikamızda idmanın və bədən tərbiyəsinin elmi əsaslar üzərində inkişafına əhəmiyyətli töhfələr vermişdir.

 

Zeynal AĞAZADƏ,

AzərTAc-ın xüsusi müxbiri

 

Kiyev

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video