Məlum olduğu kimi, bu ilin yanvar ayında ABŞ-ın Yel və Kolumbiya universitetləri Beynəlxalq Ekoloji Fəaliyyətin Nəticələrinin İndeksi (Environmental Performance Index) üzrə aparılmış beynəlxalq araşdırmanın yekunları barədə hesabat yayıb.

ABŞ universitetlərinin  açıqladığı beynəlxalq hesabatın meşələrlə bağlı məsələlər bölümündə qiymətləndirmə 3 komponent üzrə aparılıb. Bunlar meşələrin ehtiyatlarının vəziyyəti, örtüyünün dəyişməsi və meşə itkiləridir. Azərbaycan 132 dövlət arasında son 10 ildə bu göstəricilərə görə ən yüksək nəticə əldə edib.

Ekologiya və Təbii Sərvətlər Nazirliyinin Ekologiya və təbiətin mühafizə siyasəti şöbəsinin müdiri Rasim Səttarzadə bu faktı belə şərh etdi: "Bu yüksək qiymət hamımızı sevindirdi. Çünki Azərbaycan azmeşəli ölkə olmağına baxmayaraq, görülmüş işlərin miqyası böyükdür və onlar öz layiqli qiymətini alıb. Bu qiymətləndirmədə yeni meşə əkinləri nəticəsində meşə ilə örtülü sahələrin ümumi ölkə ərazisinin 11,4 faizindən 11,8 faizinədək artırılması aparıcı rol oynayıb. Qiymətləndirmə zamanı eləcə də mövcud meşə fondu torpaqlarının meşə ilə örtülü ərazilərinin 2,6 faiz çoxaldılması, sənaye qırıntılarının dayandırılması, regionların qazlaşdırılması, meşələrin mühafizəsi və qorunması tədbirlərinin gücləndirilməsi nəzərə alınıb. Bu amillərə habelə KİV və QHT-lərlə birgə ictimaiyyət arasında aparılmış təbliğat tədbirləri hesabına qırıntı hallarının ilbəil azalması daxildir".

Azərbaycanda son illərdə həqiqətən də meşələrin mühafizəsi, bərpası, yeni meşə və yaşıllıqların salınması məqsədilə bir sıra ciddi tədbirlər görülüb. Toxum tədarükü, əkin materiallarının yetişdirilməsi, meşələrin bərpası, yeni meşə massivlərinin salınması sahəsində göstəricilər bir neçə dəfə artıb, meşə fonduna daxil olmayan ərazilərdə müvafiq işlər aparılıb.

R.Səttarzadə bunları təsdiqləyən bir sıra rəqəmlər də göstərdi. Belə ki, əgər 2002-ci ildə cəmi 7750 hektar sahədə əkin, səpin və təbii bərpaya kömək tədbirləri aparılmışdırsa, 2011-ci ildə bu rəqəm artıq 10504 hektar  olub. Ümumilikdə, 2003-2011-ci illər ərzində 91176 hektardan artıq sahədə meşəbərpa işləri görülüb. Bunun 33157 hektarında yeni meşələr salınıb. Meşəsalma ilə bağlı idarəetmə sisteminin effektivliyinin artırılması məqsədilə Abşeron, Quba, Kür və Giləzi regional meşə tingliyi müəssisələri yaradılıb.  Bununla yanaşı, şəhərsalma prosesinə məruz qalmış çətin meşəbitmə şəraitinə malik ərazilərdə sözügedən müəssisələr tərəfindən yeni yaşıllıq massivləri yaradılıb. Yaşıllıq ərazilərinin artırılması üçün Bakı şəhəri və Abşeron yarımadasında, həmçinin magistral avtomobil yollarının kənarında 6 milyon ədəd ağac və kol bitkiləri əkilib.

Son illər ölkədə ətraf mühit sahəsində aparılan islahatlar və fəaliyyətin qiymətləndirilməsinin təhlili ekoloji problemlərin həlli istiqamətində sürətlə həyata keçirilən tədbirlərin effektiv olduğunu və bu işlərin istiqamətinin düzgün seçildiyini göstərir.

"Azərbaycan"