Paytaxtımız 31 oktyabr - 2 noyabr tarixləri arasında mühüm bir mədəniyyət tədbirinə evsahibliyi etdi. Oktyabrın 31-də Heydər Əliyev Mərkəzində "ART Weekend" festivalının rəsmi açılışı oldu. Festival Heydər Əliyev Fondu və IDEA İctimai Birliyi Azərbaycan Respublikasının Mədəniyyət Nazirliyinin tərəfdaşlığı ilə təşkil edilmiş, bir sıra ölkələrdən olan incəsənət və mədəniyyət xadimləri burada bir araya gəlmişdilər.
Festival günlərində paytaxtın müxtəlif sərgi salonları, muzeylər, təhsil ocaqları və ayrı-ayrı tarixi-mədəni məkanlarında sərgi, görüş, performanslar təşkil olundu. Festivalın Heydər Əliyev Mərkəzindəki açılış tədbirində isə "Mənim dənizlərim, mənim okeanlarım" ("My Seas, My Oceans") sərgisinin və məşhur kolumbiyalı rəssam-heykəltaraş Fernando Boteronun əsərlərindən ibarət "Bədii formanın təntənəsi" ("The Triumph of Form") sərgisinin təqdimatı keçirildi.
Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla xanım Əliyevanın təşəbbüsü ilə Bakı tarixində ilk dəfə, böyük "Art Weekend" festivalına evsahibliyi etdi. Tədbirin miqyası barədə ümumi təsəvvür yaratmaq üçün təkcə bir faktı qeyd edək ki, festival çərçivəsində paytaxtımızda 40-a yaxın incəsənət tədbiri keçirildi.
Ekoloji düşüncə ilə yaradıcılıq arasında körpü
Bütün dünyada belə festivallara getdikcə artan maraq incəsənətin müasir çağırışlara uyğunlaşmasından irəli gəlir. Müasir dövrdə incəsənət yalnız muzeylərin divarları arasında qapanıb qalmır - o, şəhərin ritminə, gənclərin enerjisinə, ictimai düşüncəyə sirayət edir. Bu baxımdan Leyla xanımın təşəbbüsü və təşkilatçılığı sayəsində Azərbaycanda da baş tutan "ART Weekend" festivalı ölkəmizin mədəni həyatında xüsusi yenilikdir. Festivalın məqsədi həm yerli, həm də beynəlxalq səviyyədə müasir incəsənətin təqdimatı, yaradıcı sənətkarların tanıdılması və ictimaiyyətin mədəniyyətlə daha sıx təmasda olmasını təmin etməkdir. Bu layihə məzmun etibarilə həm də ekoloji düşüncə ilə yaradıcılıq arasında körpü qurmağı, incəsənəti həm estetik, həm də sosial mesaj daşıyıcısına çevirməyi hədəfləyir.
Festival Azərbaycan gənclərinin yaradıcılıq potensialının üzə çıxarılmasına, müasir incəsənətin daha geniş auditoriyaya tanıdılmasına böyük kömək göstərir, xüsusilə gənc rəssamlar, dizaynerlər, fotoqraflar və performans sənətçiləri üçün platforma yaradır. Bakını regional mədəniyyət mərkəzlərindən birinə çevirir, incəsənət vasitəsilə ekoloji və sosial məsuliyyət ideyalarını yayaraq populyarlaşdırır.
"ART Weekend" təkcə sərgilərdən ibarət deyil - bu, multidisiplinar yaradıcılıq məkanıdır. Tədbir, adətən, bir neçə gün davam edir və müxtəlif istiqamətləri əhatə edir. Burada müasir rəssamlar öz əsərləri ilə sosial və ekoloji mövzulara toxunurlar. Canlı performanslar, eksperimental musiqi və teatr elementləri vasitəsilə tamaşaçılara dinamik təcrübə təqdim olunur. Gənc dizaynerlər ekoloji materiallardan istifadə etməklə innovativ yanaşmalarını nümayiş etdirirlər. Yerli və xarici kuratorlar, sənətşünaslar və sənətkarlar incəsənətin yeni tendensiyaları, yaradıcılıq bazarının inkişafı və mədəni diplomatiya barədə fikirlərini bölüşürlər, bu da ustad dərsləri, mədəniyyət mövzularında polemikalar kimi çox müsbət təsirlər yaradır. Bu format sayəsində "ART Weekend", sadəcə, bir sərgi deyil, həm də düşüncə və dialoq platforması kimi çıxış edir.
Bakı yaradıcı mərkəzə çevrilir
Leyla xanım Əliyevanın böyük zəhməti sayəsində başa gəlmiş bu festival, ilk növbədə, Azərbaycan cəmiyyətində müasir incəsənətin qəbuluna və dəyərləndirilməsinə mühüm təsir göstərir. Ənənəvi mədəniyyətlə müasir yaradıcılıq arasında körpü rolunu oynayan bu tədbir yeni estetik baxış formalaşdırır. Gənc sənətçilərə beynəlxalq səviyyədə tanınmaq imkanı yaradır. İncəsənəti şəhər həyatına gətirərək Bakını yaradıcı mərkəzə çevirir. Mədəni turizmin inkişafına təkan verir. Ətraf mühit, sosial məsuliyyət və insan təbiətinin harmoniyası kimi mövzuları sənət dili ilə cəmiyyətə çatdırır. Belə festivallar digər tərəfdən də Azərbaycanın yumşaq gücünün - mədəniyyət diplomatiyasının təsirli bir alətidir. Burada iştirak edən xarici sənətçilər və qonaqlar ölkəmizi müasir, yaradıcı və açıqfikirli bir mədəniyyət məkanı kimi tanıyır və tanıdırlar.
Leyla xanımın təşəbbüsü ilə gerçəkləşən bu cür festivallar yalnız incəsənəti nümayiş etdirmir, həm də gəncləri düşünməyə, hiss etməyə və dəyişməyə çağırır. Onları həm sosial-ekoloji dəyərlərə, həm də mədəni məsuliyyətə yönəldir. O, incəsənəti sosial dəyişikliklərin katalizatoru kimi görür və bu baxımdan "ART Weekend" həm estetik, həm də vətəndaşlıq məzmunu daşıyır. Leyla xanım Əliyeva festivalın açılışında, bu çərçivədə nümayiş olunan "Əcdadlar" sərgisi kimi mədəni tədbirlərdə şəxsən iştirak etməklə başqaları üçün də nümunə yaradır, onun belə tədbirlərdə iştirakı, müasir incəsənətə marağı cəmiyyət üzvləri arasında xoş bir davranış elementinə çevirir.
Bu günlərdə Azərbaycan Respublikasının Birinci vitse-prezidenti, Heydər Əliyev Fondunun rəhbəri Mehriban Əliyevanın təşəbbüsü ilə Mədəniyyət Nazirliyinin tabeliyində olan musiqi məktəbləri üçün alınmış yeni musiqi alətlərinin də nümayişi keçirildi. Musiqi məktəblərinin inkişafına, gənc istedadların daha keyfiyyətli təhsil almalarına və musiqi mədəniyyətinin gələcək nəsillərə ötürülməsinə xidmət edən bu layihənin təqdimatı mərasimində də Leyla xanım Arzu Əliyeva və Alena Əliyeva ilə birgə iştirak etdilər. Layihə çərçivəsində Bakı ilə yanaşı, regionlardakı bir sıra musiqi məktəbləri üçün 11 adda 70-dən çox musiqi aləti alınıb. Bu musiqi alətləri həm yerli ustaların əl işləri, həm də musiqi alətlərinin istehsalı sahəsində dünyanın aparıcı ölkələrindən sifariş olunan nümunələrdir.
Bütün bu nümunələr 2007-ci ildən etibarən Heydər Əliyev Fondunun vitse-prezidenti kimi fəaliyyət göstərərək bu vəzifədə Azərbaycanın mədəni, elmi və sosial sahələrdə inkişafına yönəlmiş çoxsaylı layihələrə rəhbərlik edən Leyla xanım Əliyevanın fondun fəaliyyət istiqamətlərinin formalaşmasında və beynəlxalq əlaqələrinin genişlənməsində mühüm rol oynadığını göstərir.
Uğurlu nəticələr yaradan layihələr
Onun təşəbbüsləri, əsasən, humanitar yardım, təhsil, mədəniyyətin qorunması və sosial rifahın yaxşılaşdırılmasına yönəlib. Heydər Əliyev Fondunun həyata keçirdiyi bir çox layihə Leyla Əliyevanın şəxsi təşəbbüsü və rəhbərliyi altında gerçəkləşmiş və böyük nəticə vermişdir. Bu layihələrdən bir neçəsinə nəzərə salaq:
"Xocalıya ədalət!" beynəlxalq kampaniyası - 2008-ci ildə Leyla Əliyevanın təşəbbüsü ilə başlanmış bu kampaniya Xocalı soyqırımı haqqında dünya ictimaiyyətində məlumatlılığın artırılması məqsədinə yönəlib. Kampaniya çərçivəsində müxtəlif ölkələrdə sərgilər, konfranslar, aksiyalar keçirilmiş, sənədli filmlər və nəşrlər hazırlanmış, dünyanın bir neçə ölkəsinin parlamentlərində Xocalı soyqırımı rəsmən tanınmışdır.
Leyla xanım Əliyevanın fəal iştirakı ilə Heydər Əliyev Fondu uşaq evləri, internat məktəbləri və uşaq bağçalarının yenidən qurulması, aztəminatlı ailələrə dəstək proqramları kimi layihələri uğurla həyata keçirməkdədir. Leyla xanım Heydər Əliyev Fondunun vitse-prezidenti kimi Azərbaycanda tarixi abidələrin bərpası, eləcə də Azərbaycan mədəniyyətinin dünyada təbliği istiqamətində mühüm layihələrin icrasında yaxından iştirak edir. Onun təşəbbüsü əsasında bir sıra ölkələrdə Azərbaycan mədəniyyət günləri və sərgiləri təşkil edilmişdir.
Leyla xanımın fəaliyyətinin mühüm bir hissəsi də rəhbəri olduğu Ətraf Mühit Naminə Beynəlxalq Dialoq - IDEA (International Dialogue for Environmental Action) təşkilatı ilə bağlıdır. Bu təşkilat 2011-ci ildə təsis edilmişdir. IDEA-nın əsas məqsədi gənclər arasında ekoloji maarifləndirməni artırmaq, biomüxtəlifliyin qorunması və ətraf mühitin davamlı inkişafını təmin etməkdir. IDEA ötən illər ərzində nadir heyvan növlərinin, xüsusilə Qafqaz bəbiri, Qızıl qartal və digər növlərin qorunması proqramlarını uğurla həyata keçirmişdir. Təşkilat ağacəkmə aksiyaları, gənclər üçün ekoloji təhsil proqramları, təlimlər və beynəlxalq forumlar təşkil etmiş, Bakıda və regionlarda ən yüksək standartlara uyğun ictimai çimərliklər yaratmış, "Abad həyət" kimi layihələrlə məhəllələrin, həyətlərin abadlaşdırılması, yaşıllaşdırılması, vətəndaşlarımızda ekoloji savadlılığın, ətraf mühitlə bağlı məsuliyyət hissinin gücləndirilməsində misilsiz işlər görmüşdür.
Ekoloji diplomatiyanın mühüm platforması
Leyla xanım Əliyevanın IDEA layihəsi regionda ekoloji diplomatiyanın mühüm platformalarından birinə çevrilmişdir. Qurum BMT, UNESCO və digər beynəlxalq təşkilatlarla sıx əməkdaşlıq əlaqələrinə malikdir.
Leyla xanım Əliyeva Azərbaycanın gənclər diplomatiyasının da aparıcı simalarından biri kimi tanınır. O, həmçinin uzun illərdir "Bakı" jurnalının baş redaktoru kimi Azərbaycan mədəniyyətinin və incəsənətinin böyük bir qitədə tanıdılmasına töhfə verir, bu jurnal xalqlar arasında mədəni körpü rolunu oynayır. Bundan əlavə, Leyla xanım Rusiya Azərbaycanlı Gənclər Təşkilatının həmtəsisçisidir. Təşkilatın fəaliyyəti gənclər arasında dostluq, qarşılıqlı anlaşma və mədəni mübadiləni gücləndirməyə yönəlib.
Xeyirxahlıq, mərhəmət, sosial qayğıya ehtiyacı olan insanlara dəstək, cəmiyyət üçün maksimum faydalı olmaq Leyla xanım Əliyevanın xarakteridir. O, kimsəsiz uşaqlar, ahıllar, əlilliyi olan şəxslər üçün sosial layihələrin həyata keçirilməsində fəal iştirak edir. Çoxmillətli ölkə olan Azərbaycanda multikultural dəyərlərin yayılmasında, tolerantlıq ənənələrinin daha da möhkəmlənməsində Leyla xanımın müstəsna xidmətləri vardır. Onun fəaliyyəti həm Azərbaycanda, həm də beynəlxalq səviyyədə layiqincə qiymətləndirilmiş, müxtəlif yüksək mükafatlara layiq görülmüşdür. Ən böyük mükafatsa bəşəri missiya yerinə yetirən Leyla xanım kimi şəxsiyyətlərin özlərinin şəxsi keyfiyyətlərindən aldıqları mükafatdır.
Leyla xanım Əliyeva ölkəmiz və dünyamız üçün faydalı fəaliyyəti ilə Azərbaycanı tarixinin ən qüdrətli mərhələsinə yetirmiş Prezident İlham Əliyevin həyata keçirdiyi siyasətə mühüm töhfələr verir, insanlar üçün Vətənə və dünyaya sevginin parlaq nümunəsini yaradır.
İradə ƏLİYEVA,
"Azərbaycan"
jpg_1764922515.jpg)
