Elmi-texnoloji məsələlərdə ən önəmli məqamlardan biri etika və təhlükəsizlik mədəniyyətidir. Gələcəyin texnologiyaları yalnız texniki biliklə deyil, həm də məsuliyyətlə idarə olunmalıdır. Süni intellekt, nüvə texnologiyaları və enerji sistemləri kimi sahələrdə etik davranış, məlumatların qorunması və beynəlxalq standartlara əməl olunması qlobal etimadın əsasını təşkil edir. Bu, həm elmi diplomatiyanın, həm də texnoloji tərəqqinin ayrılmaz hissəsidir.
Bu fikirləri AZƏRTAC-a müsahibəsində Dünya Azərbaycanlı Alimlər Birliyinin həmsədri, Atom Enerjisi üzrə Beynəlxalq Agentlikdə (AEBA) çalışmış həmvətənimiz, Nobel Sülh mükafatçısı Bəxtiyar Siracov söyləyib.
Azərbaycan elmini dünya arenasında təqdim etmək barədə danışan Bəxtiyar Siracov bu prosesin bir neçə strateji istiqamətinin olduğunu diqqətə çatdırıb.
“Azərbaycanın qlobal miqyasda elmi nüfuzunun artırılması üçün strategiyalar haqqında danışarkən qeyd etməliyəm ki, elmimizi beynəlxalq səviyyəyə çıxarmaq üçün digər mühüm strategiyalarla yanaşı, aşağıdakı istiqamətlər də prioritetlər sırasında yer almalıdır:
- İnsan kapitalına yatırım - Gənc alimlər üçün beynəlxalq təcrübə proqramları, birgə doktorantura layihələri və dünya səviyyəli tədqiqat mərkəzlərinə çıxış imkanları yaradılmalıdır. Bu, həm bilik mübadiləsini, həm də elmi diplomatiyanı gücləndirər.
- Elm-sənaye inteqrasiyası - Universitetlər, texnoparklar və özəl sektor arasında sıx əməkdaşlıq qurmaqla tədqiqatların nəticələri real məhsullara və texnoloji innovasiyalara çevrilə bilər. Elmi fəaliyyətin iqtisadi dəyəri artdıqca, elm də cəmiyyətin vacib sütunlarından birinə çevriləcək.
- Qlobal əməkdaşlıq və elmi diplomatiya - Azərbaycan alimləri beynəlxalq platformalarda daha fəal iştirak etməlidirlər. Elm bu gün ən güclü diplomatiya alətlərindən biridir. Biz həm regionda, həm də beynəlxalq miqyasda “elm vasitəsilə sülh” modelinin fəal tərəfdarı olmalıyıq”, - deyə o qeyd edib.
