Fransız müstəmləkəçiliyinə qarşı barışmaz mübarizə Martinikdə də davam edir. Adada bir aydan artıqdır davam edən etiraz aksiyaları barədə Fransa mətbuatında az yazılır. Yalnız Paris etirazları yatırtmaq üçün adalara xüsusi polis kontingenti göndərmək qərarına gələndə Avropa mediası bu barədə yazmağa başlayıb.

Son günlər Martinikdə yerli sakinlər qiymət artımına qarşı dinc etiraz aksiyası keçirirlər. Taksi sürücüləri və ticarətçilərdən sonra yük avtomobilləri  sürücüləri də bahalığa qarşı etiraz nümayişinə qoşulublar. Yerli sakinlər adada yaşamağın həddən artıq çətin olmasından şikayətlənirlər.

Media xəbər verir ki, sakinlər yük avtomobilləri sürücülərinin tətilinə dəstək verərək qiymət artımını pisləyiblər. Bildirilir ki, şəhərlərarası strateji marşrutların əksəriyyəti bağlanıb. Yük avtomobilləri sürücüləri vəziyyətin dəyişmədiyi, tələblərinin eşidilmədiyi təqdirdə etirazlarını davam etdirəcəklərini söyləyiblər.

Səhiyyə sektoru da yeni tətillər planlaşdırıb. Həmkarlar İttifaqları sakinləri qeyri-müəyyən müddətə tətil etməyə çağırıb. 

Martinik İcraiyyə Şurasının sədri postkolonial iqtisadi sistemin sona çatdığını bildirərək yerli istehsala üstünlük verməyin vacibliyini vurğulayıb. 

Əhali Fransanın kolonial siyasətinə, hüquqlarının kobud şəkildə pozulmasına, kəskin sosial duruma qarşı çıxır, Parisdən müstəmləkəçilik siyasətinə son qoyulmasını və müstəqillik tələb edir. 

Fransa hökumətinin Martinik torpaqlarında istifadə etdiyi zəhərli maddələr kənd təsərrüfatı torpaqlarını yararsız hala salıb, əhalinin sağlamlığına ciddi ziyan vurub. Məhz bunların nəticəsidir ki, Martinik dünyada ən çox onkoloji xəstəliklərdən əziyyət çəkən ərazidir. 

Martinikdəki etirazlar Fransa hökumətini  repressiya aparatının sərt alətini - xüsusi təyinatlı polis qüvvələrini adaya göndərməyə sövq edib. Hər şey Yeni Kaledoniyada olduğu kimidir…

Euronews telekanalı xəbər verir ki, 1959-cu ildə Fransada Əlcəzair üsyanını qanla yatırdığına görə qadağan olunmuş həmin xüsusi təyinatlılar adaya gəliblər. Həmin hadisədən sonra xüsusi təyinatlılardan yalnız son çarə kimi istifadə olunub, məsələn, 2009-cu ildə Qvadelupada iğtişaşların yatırılması zamanı.

Polis gözyaşardıcı qazdan istifadə edib. Bütün bunlar vətəndaşları kəskin etiraz addımları atmağa məcbur edir, hətta yollarda avtomobillərə od vurulur.

Qeyd edək ki, Emmanuel Makron hakimiyyətə gəldikdən sonra Fransada, eləcə də onun müstəmləkəsi olan dənizaşırı departament və ərazilərdə sosial və siyasi gərginlik xeyli artıb. Fransanın iqtisadi böhranlarla, "Sarı jiletlilər" kimi ictimai hərəkatlarla və qeyri-populyar islahatlarla üzləşdiyi dönəmində dənizaşırı ərazilər də tarixi bərabərsizliklə, daha da ağırlaşan problemlərlə qarşılaşıb.

Son illərdə Yeni Kaledoniya, Qvadelupa, Martinik, Reunyon və Mayot kimi ərazilərdə yaşayış səviyyəsinin bahalığına, ictimai xidmətlərə çıxışın və iqtisadi perspektivlərin olmamasına qarşı nümayişlər daha da çoxalıb, əhali  yüksək işsizlik, zəif infrastruktur və təhlükəsizlik problemləri ilə üzləşib.

R.CƏFƏROV,

"Azərbaycan"