Prezident İlham Əliyevin VII çağırış Milli Məclisin ilk iclasındakı nitqi dünyada sülhün, əmin-amanlığın, demokratiyanın, insan haqlarının bərpa edilməsinə bir daha çağırış, gələcəyimiz üçün yol xəritəsidir. Çıxışdakı fikirlər xalqın milli mənafeyinin, mübarizəsinin, ruhunun ifadəsidir. Vətən müharibəsinin ildönümü ərəfəsində söylənilənlər, qələbəmizə verilən qiymət qürurvericidir. 

Dövlət başçısı çıxışında bildirdi ki, İkinci Qarabağ müharibəsi, suverenliyimizin tam bərpa edilməsi dünya miqyasında tarixi hadisədir. Azərbaycan xalqı güclü iradə, birlik göstərərək 30 il davam edən işğala son qoydu. Dövlətimiz öz gücünü göstərdi. Əlbəttə, bu ifadələr hər birimizin ürəyindəndir, çünki otuz il düşmən tapdağı altında qalan, viran edilən, xarabazarlığa çevrilən Qarabağ torpaqlarında bu gün xoşbəxt həyatın təmin edilməsi, möhtəşəm bərpa quruculuq işləri, insanların ata-baba yurduna köçürülməsi və orada mənalı həyatın başlaması gələcək üçün zəmanətdir. 

Prezident İlham Əliyev öz çıxışında qələbələrimizə, uğurlarımıza önəm verməklə bərabər, həm də qarşıda duran aydın vəzifələri müəyyənləşdirdi. Bu, ilk növbədə hərbi gücümüzün artırılmasıdır. Qeyd edildi ki, İkinci Qarabağ müharibəsi, antiterror əməliyyatı arxada qalsa da, dünyada gedən proseslər, yeni münaqişələr, müharibə ocaqlarının yaradılması, eyni zamanda Ermənistanda yüksələn revanşizm meyilləri bizi hərbi quruculuq işlərinə daha böyük diqqət yetirməyə vadar edir. Ölkə rəhbəri bildirdi ki, bəzi dünya dövlətləri Azərbaycanın qələbələrini həzm edə bilmir. Təcavüzkar Ermənistanı silahlandırmaqla, ona dəstək verməklə Cənubi Qafqazda sabitliyin pozulmasına cəhdlər göstərilir. Bu gün dünyada kim güclüdür, o, haqlıdır prinsipinin üstünlük təşkil etməsi və böyük dövlətlərin gücə arxalanması Azərbaycanın da hərbi qüdrətinin artırılmasını zəruri edir. 

Əlbəttə, bu istiqamətdə ölkədə çox böyük işlər görülüb. Prezidentin rəhbərliyi ilə ordu quruculuğu uzun illərdir uğurla davam etdirilir. Müasir silahlar alınır, kadr ehtiyatı yaradılır, yeni hərbi təlimlər keçirilir, əsgər və zabitlərin peşəkarlığının artırılması üçün mühüm tədbirlər görülür. Sözsüz ki, bu da düşmənin məqsədlərinin gözündə qoyulması baxımından çox vacibdir. Prezident İlham Əliyev daim sülhün, əmin-amanlığın tərəfdarı olub və bu gün də bu xoş ənənə davam edir. Təəssüf ki, böyük dövlətlər, xüsusilə Ermənistan kimi təcavüzkar ölkəyə dəstək verənlər bu çağırışları hələ də lazımınca qiymətləndirmirlər və onun sülhə gəlməsinə maneələr törədirlər. Dövlətimizin başçısı çıxışlarında dəfələrlə qeyd edib ki, biz heç bir ölkənin diktəsi ilə işləmirik, müstəqil siyasət yürüdürük, xalqın mənafeyi, xoşbəxtliyi, gələcək inkişafı bizim üçün hər şeydən önəmlidir və bu istiqamətdə mühüm işlər görülür. 

Vətən müharibəsinin ildönümünü qeyd edərkən biz qürurumuzu gizlədə bilmirik və gizlətməməliyik. Xalqımız birdir, ordumuz güclüdür və Prezidentimizin dediyi kimi, biz gücümüzə arxalanmalıyıq. İkinci Qarabağ savaşı və onun nəticələri bizdə qürur doğurduğu kimi, həm də bu günümüz üçün yeni imkanlar açır. Ölkə rəhbəri dəfələrlə bildirib ki, Vətən müharibəsindən sonra yeni dövr, yeni reallıqlar yaranıb. Suverenliyimizin tam bərpa edilməsi ölkə qarşısında yeni imkanlar, üfüqlər açır.

Bu gün nəinki ordu quruculuğuna, hərbi potensialımızın gücləndirilməsinə böyük önəm verilir, eləcə də işğaldan azad olunmuş ərazilərdə görülən abadlıq, tikinti işləri qələbələrimizin  dəyərinə yeni dəyər qatır. İşğaldan azad olunmuş ərazilərdə quruculuq işlərinin sürətləndirilməsi - yeni yolların, tunellərin çəkilməsi, abadlıq işlərinin görülməsi qarşıda duran ən başlıca vəzifələrdən biridir. Sözsüz ki, bunun üçün ölkə iqtisadiyyatı güclü olmalı, maliyyə imkanları səfərbər edilməlidir. Sevindirici haldır ki, həmin torpaqlarda çox möhtəşəm işlər görülür. Son illərdə 19 milyard manatdan çox vəsaitin sərf olunması göstərir ki, Azərbaycan iqtisadiyyatı davamlıdır, inkişafdadır və həmin ərazilərin cənnətə çevrilməsi həm dövrün tələbi, həm də rəhbərin qarşıya qoyduğu məqsəd, ali arzu və istəkdir. 

Vətən müharibəsində qazanılan qələbə Azərbaycan xalqının yaddaşına əbədi həkk olunub. Bu hadisədən başlayan tarix ağrılarımızı, acılarımızı, demək olar ki, yox edərək Azərbaycanın gələcəyinə yeni üfüqlər açıb. Sözsüz ki, bu qələbəni təmin edən Ali Baş Komandan, güclü ordumuz, xalqımızın birliyi və mütəşəkkilliyidir. Cənab Prezident də son nitqində birliyimizə, həmrəyliyimizə çox böyük önəm verərək bildirdi ki, bizim gələcəyimiz, uğurlarımız birliyimizdən, səfərbər olmağımızdan, qarşıya qoyulan vəzifələrin uğurla həyata keçirilməsindən asılıdır. Bu, hər bir vətəndaş üçün istiqamət proqramıdır. Xalqını, torpağını sevən, övladlarının gələcəyi üçün çalışan, bu istəkdə olan hər kəs bu vəzifələrin aliliyini dərindən dərk etməli, qiymətləndirməli və öz mübarizliyini, imkanlarını əsirgəməməlidir. 

Tahir RZAYEV,

Milli Məclisin Aqrar siyasət komitəsinin sədri