"Huawei" "HarmonyOS 3.0" əməliyyat sistemini təqdim edib. Böyük miqyasa sahib olmayan sistem özündə bəzi vizual dəyişikliklər ilə artıq mövcud olan funksiyaların yaxşılaşdırılmış versiyalarını birləşdirir. Sözügedən əməliyyat sistemində mövcud olan "Super Device" adlı funksiya çoxlu sayda intellektual cihazın dəstəyini əldə edib və beləliklə, daha çox smartfon və planşet modelində aktiv olacaq. 
Onun vasitəsilə cihazları sürətli şəkildə bir-birinə qoşmaq mümkündür. Bu halda cihazlar genişmiqyaslı vahid ekosistemə qoşulurlar. "HarmonyOS" ilə çalışan smart televizorlarda pult vasitəsilə televizorlardakı səsgücləndiricilər, xarici səsgücləndiricilər və ya naqilsiz qulaqlıqlar arasında sürətli keçidin reallaşdırılması imkanı da istifadəyə verilib. Onun vasitəsilə çalışan smart saatlar isə müxtəlif idman təchizatı ilə sinxronlaşdırıla bilər. Bundan əlavə, avtomobillərdəki ekranlara smartfondakı bütün işlək ekranları köçürtmək mümkün olacaq. Bu da öz növbəsində avtomobil ekranında istənilən lazımi tətbiqin istifadəsinə imkan verir. Artıq cihazda yaradılan qovluqların ölçülərini və hətta formalarını da dəyişmək mümkündür.
"HarmonyOS 3.0"da olan digər yenilik isə tətbiqlərin ikon rəngləri, kateqoriya və ya funksiyalar üzrə smart çeşidlənməsidir. Həmçinin istifadəçilər əməliyyat sisteminin daxilində özlərinin 3D avatarlarını yarada və onları insanlarla ünsiyyətdə istifadə edə bilərlər.
Tərtibatçılar "HarmonyOS 3.0"ın optimizasiyasına xüsusi diqqət ayırıblar. Belə ki, yeni əməliyyat sistemi cihazın texniki tərəfini çox yükləmir və daha axıcı çalışır. "Android 12"də olduğu kimi,"HarmonyOS 3.0" da öz ayarlarında konfidensiallıq mərkəzini əldə edib. Sözügedən bölmə əlavə təhlükəsizliyin təmin olunması üçün nəzərdə tutulub. İstifadəçi bu bölmə vasitəsilə hansı tətbiqlərin cihazın kamerasından və ya mikrofonundan istifadə etdiyini müəyyənləşdirə biləcək.
"HarmonyOS 3.0" ilk beta versiyası "Huawei P50" və "Mate 40" flaqman smartfon seriyalarında artıq aktivdir. Yeni əməliyyat sistemini 2021-ci ildə satışa çıxarılmış "Huawei MatePad Pro 12.6" planşetinin istifadəçiləri də nəzərdən keçirə bilərlər. Əməliyyat sisteminin yeni versiyasının beta testi hələ ki, yalnız Çində aktivdir.