Respublikaçılar Partiyasının ABŞ prezidentliyinə namizədi Donald Tramp seçki yarışında  əsas rəqibi olan vitse-prezident Kamala Harrisi qüsurlu və müsahibə vermək qabiliyyətinə malik olmayan şəxs hesab edir.
Tramp Vaşinqtonda gənclərin problemlərinə həsr olunmuş konfransda deyib: "Onun çox müsahibə verməməsinə təəccübləndim. Amma məncə, Harrisdə bu yaxşı alınmır. Ancaq düşünürəm ki, o, pis alınsa da, sadəcə müsahibələr versə, daha yaxşı olardı. Bu, daha yaxşı olardı, çünki indi insanlar izləyirlər. İndi də görürük ki, o, qüsurlu insandır. Bizim isə ABŞ prezidenti vəzifəsini icra edən daha bir qüsurlu insana ehtiyacım yoxdur, bizdə artıq belə bir insan var". 
Hazırda ABŞ prezidenti  demokrat Co Baydendir.
Tramp Harrisin avqustun 29-da yayımlanan CNN telekanalına müsahibəsini də şərh edib. Respublikaçıya görə, Harrisə suallar verən jurnalist “son dərəcə çevik” idi və həssas mövzulardan qaçırdı.
Tramp əmin olduğunu bildirib ki, Harris seçki yarışı zamanı bir çox məsələlərdə mövqeyini dəyişib və qismən respublikaçıların fikirləri ilə eyni olan bəzi fikirlər söyləməyə başlayıb. O, zarafatla ABŞ vitse-prezidentinə 2016-cı il seçki kampaniyasının əsas siyasi şüarı - MAGA ("Amerikanı yenidən möhtəşəm edək") yazılmış qırmızı papaq göndərməyi təklif edib.
ABŞ-da prezident seçkiləri noyabrın 5-də keçiriləcək. 
Baydenin Demokrat Partiyasını təmsil edəcəyi güman edilirdi, lakin Trampla iyun debatındakı uğursuz çıxışından sonra Demokratlar arasında Baydenin mübarizədən əl çəkməsi çağırışları daha da gücləndi. İyulun 21-də o, yarışdan çıxmaq qərarına gəldi və Harrisin ölkənin ən yüksək dövlət vəzifəsinə namizədliyini dəstəklədi. Harris, Minnesota qubernatoru Tim Uoltsu vitse-prezident postuna namizəd kimi seçib. Tramp Respublikaçılar Partiyasından prezidentliyə namizəd kimi irəli sürülüb və vitse-prezidentliyə senator Devid Vensi seçib.

"Azərbaycan"