Havaların yağmurlu keçməsi taxılçıların işinə yarayır

Səfalı təbiəti ilə seçilən Göygölün insanları işgüzardır. Yəqin elə bunun nəticəsidir ki, göygöllü fermerlər kənd təsərrüfatının bütün sahələri üzrə hər il yüksək göstəricilər əldə edirlər. Bununla həm özlərinin dolanışıqlarını təmin edirlər, həm də ölkəmizin aqrar sektorunun inkişafına töhfələr verirlər.

Götürək taxılçılığı. Rayon taxılçıları əvvəlki illərdən fərqli olaraq keçən il daha çox məhsul istehsalına nail oldular. Belə ki, 7125 hektar sahədən 22117 ton taxıl biçildi. Hər hektardan 31 sentner taxıl əldə edən təsərrüfat sahibləri məhsuldarlıq üzrə əvvəlki ilin göstəricisini arxada qoydular.

Taxılçılar bu il də bol taxıl yetişdirmək üçün bütün qüvvələrini səfərbərliyə almışlar. Şum və səpin işləri optimal müddətdə aparılmışdır. Fermerlər 7020 hektarda payızlıq səpin aparmışlar ki, onun da 4474 hektarı buğda, 2546 hektarı arpadır. Əkilmiş taxılın 2505 hektarı suvarılan, 4515 hektarı dəmyə əraziləridir.

Taxılçılıqda məhsuldarlığı yüksəltmək üçün fermerlər yemləmə gübrələrinin vaxtında verilməsini diqqət mərkəzində saxlayırlar. İndiyədək taxıl sahələrinə 77,7 ton ammonium nitrat, 487,3 ton karbamid gübrəsi verilmişdir. Bundan başqa, sahələri ziyanvericilərdən və müxtəlif xəstəliklərdən qorumaq üçün də tədbirlər görülür.

Qeyd etmək lazımdır ki, son vaxtlar havaların yağmurlu keçməsi rayon ərazisində suvarma suyuna olan tələbatı qismən təmin etmişdir. Əsasən, Gəncəçay və Qoşqarçay çaylarında suyun həcmi xeyli çoxalmışdır ki, bu da rayonda payızlıq taxıl əkinlərinin suvarılmasını xeyli yaxşılaşdırmışdır.

Hazırda rayonda taxılçılıqda zəngin təcrübə toplamış onlarla fermer var. Onlardan biri Taleh Hüseynovdur. Fermer keçən il 56 hektar sahədən 253 ton taxıl götürmüşdür. Hər hektardan məhsuldarlığı 45 sentnerə çatdıran Taleh bu göstərici ilə rayonda birinci olmuşdur. Amma o, tək deyil. Keçən il Altay Ələkbərov 189 hektardan 690, Fuad Zalov 195 hektardan 705,9, Rafail Mustafayev 103 hektardan 370 ton taxıl biçmişdir. Lakin fermerlər bunları son hədd hesab etmirlər.

Sabir ƏLİYEV,

"Azərbaycan"