Təsərrüfat sahibləri soyuducu anbarların sayının artırılmasını istəyirlər

Şəmkir ölkənin böyük kənd təsərrüfatı rayonlarındandır. Burada kənd təsərrüfatının digər sahələri kimi, meyvəçiliyin də inkişafı diqqət mərkəzində saxlanılır.

Meyvəçilik Şəmkirdə kənd təsərrüfatının ixtisaslaşmış sahələrindəndir. Hazırda rayondakı 4480,4 hektar meyvə və giləmeyvə bağlarının 3212,6 hektarı barverəndir. Cari ildə həmin sahələrdən 78154,4 ton məhsul götürülmüşdür. Rayonda həm bağların ildən-ilə genişləndirilməsi, həm də meyvə növlərinin artırılması üçün sahibkarlara hər cür dəstək verilir. Bu sahədə sahibkarlıq fəaliyyətinin dəstəklənməsi, iqtisadi dəyəri yüksək layihələrin həyata keçirilməsinin təşviqi yerli xammal ehtiyatlarından istifadənin genişləndirilməsinə yol açır.

Şəmkirdə meyvəçiliklə məşğul olan təsərrüfatların problemlərinin həlli istiqamətində operativ tədbirlər həyata keçirilir. Rayon rəhbərliyi mütəmadi olaraq yerli sahibkarlarla görüşlər keçirir, təsərrüfatlarda yaradılan şəraitlə tanış olur, onların arzu və istəklərini dinləyir. Keçirilən görüşlərdə aqrar sahədə aparılan islahatlar, kənd təsərrüfatına dövlət dəstəyi, intensiv bağçılığın inkişafı üçün görülən tədbirlər və aqrar sahənin digər aktual məsələləri ətrafında fikir mübadiləsi də aparılır. Son vaxtlar keçirilən görüşlərdə ən çox qaldırılan məsələ məhsulun saxlanması üçün soyuducu anbarların az olması ilə bağlıdır. Təsərrüfat sahibləri bu vacib məsələnin həlli ilə bağlı arzu və təkliflərini də bildirirlər.