"Huawei" "Watch GT 3 Pro" smart saatı ilə "Band 7" smart qolbağını təqdim edib.

"Watch GT 3 Pro"nun gövdəsi premium materiallardan hazırlanıb və istifadəçi səhhətinin monitorinqi üçün nəzərdə tutulmuş çoxlu sayda sensor ilə təchiz olunub. Saat iki versiyada satışa çıxarılacaq. Onlardan birinin gövdəsi 46, digərininki isə 43 millimetr ölçüyə malikdir. 46 mm-lik modelin gövdəsi titandan, 43 mm-lik isə keramikadan hazırlanıb. Hər iki model yaqut şüşəylə örtülüb. Sözügedən modellər ekran və gövdə ölçülərindən əlavə olaraq çalışma müddətləri ilə də bir-birindən fərqlənirlər. Belə ki, 46 mm-lik ölçüyə sahib model adi istifadə rejimində 14 gün, intensiv istifadə rejimində isə 8 gün çalışa bilir. 43 mm-lik ölçülü model adi istifadə rejimində 7, intensiv istifadə rejimində isə 4 gün çalışır.

Saatlar ürək döyüntüsü tezliyini, qandakı oksigen miqdarını ölçə bilir. Bununla yanaşı, onların elektrokardioqrafiya və termometr sensorları da var. "Watch GT 3 Pro" həmçinin istifadəçinin yuxu keyfiyyətinin və stres səviyyəsinin də monitorinqini apara bilir. Smart saat 100-dən çox idman növünün dəstəyinə sahibdir. Onun vasitəsilə smartfondakı musiqi pleyerini və kameraları idarə etmək olar. Saatın ekranında isə hava proqnozu, zəngli saat, saniyəölçən və s. göstəricilərin əks olunması imkanı reallaşdırılıb. Özündə kontaktsız ödənişlər üçün nəzərdə tutulmuş NFC çipi olan smart saat sürətli şarj texnologiyasını dəstəkləyir.

Şirkətin verdiyi məlumata görə, 10 dəqiqəlik şarj prosesi sayəsində smart saat 25 faiz enerji yığa bilir. "Watch GT 3 Pro" "Harmony OS" əməliyyat sistemi vasitəsilə çalışır.

"Huawei Band 7" qolbağı da uzun müddət ərzində çalışmaq imkanı və çox sayda müxtəlif idman növünü dəstəkləməsi ilə diqqət çəkir. Qolbaq 1.47 düym AMOLED ekran ilə təchiz olunub. Ürək döyüntülərini, qandakı oksigen miqdarını ölçə və istifadəçinin yuxu keyfiyyəti ilə səhhətinin digər göstəricilərini monitorinq edə bilir. Smart qolbaqdakı alqoritmlər istifadəçinin ürəyində yarana biləcək problemlər barədə ona bildirişlər göndərir. "Band 7" kontaktsız ödənişlər üçün NFC çipinə sahibdir və smart qolbaq vasitəsilə smartfondakı musiqi pleyerini və kameraları idarə etmək mümkündür.

Həmçinin smartfonda daxil olmuş mesajlara dərhal cavab vermək, zəngləri qəbul və ya ləğv etmək imkanı da var. Adi rejimdə "Band 7" 14 gün ərzində, intensiv istifadə rejimində isə 10 gün ərzində çalışa bilir. O, həmçinin sürətli şarj texnologiyasını dəstəkləyir və bunun sayəsində reallaşdırılmış 5 dəqiqəlik şarj prosesi çərçivəsində yığılmış enerji miqdarı smart saatın 2 gün ərzində çalışmasına imkan verir. Smart qolbaq suyun 50 metr dərinliyində də işləyə bilir.