Naxçıvan Dövlət Universitetinin Memarlıq və mühəndislik fakültəsinin Energetika mühəndisliyi ixtisasında təhsil alan tələbələr İtaliyada təcrübə keçiblər.

Universitetin Televiziya mətbuat və ictimaiyyətlə əlaqələr bölməsindən AZƏRTAC-a bildirilib ki, Naxçıvan Muxtar Respublikası Dövlət Energetika Xidmətinin hamiliyinə verilmiş Energetika mühəndisliyi ixtisasında təhsil alan tələbələrin təyin olunan proqram çərçivəsində təcrübə qazanmaları diqqətdə saxlanılır. Bu çərçivədə enerji istehsalı prosesləri, yeni texnologiyaların tətbiqi, alternativ və bərpaolunan enerji sahəsində qabaqcıl təcrübə öyrənilir, praktiki biliklərin artırılması üçün inkişaf etmiş xarici ölkələrin təcrübələrindən istifadə edilir. Görülən işlərin davamı olaraq Dövlət Energetika Xidmətindən 3 mühəndis və universitetin Elektroenergetika kafedrasında təhsil alan 6 tələbə və müəllim heyətinin İtaliyaya səfəri təşkil edilib.

Proqrama uyğun olaraq səfərin ilk günü Florensiya şəhəri ilə tanışlıq olub. Səfərin növbəti günündə tələbələr şəhərdə fəaliyyət göstərən "Fimer" şirkətinin təlim mərkəzində olub, yeni texnologiyalardan biri olan invertorlar haqqında mühazirə dinləyiblər. Qarşılıqlı sual-cavab əsasında təşkil edilən mühazirədə tələbələrin sualları ətraflı şəkildə cavablandırılıb. Həmin şirkətin ərazisində yerləşən Günəş-Elektrik Stansiyasına baxış zamanı tələbələr ərazidə quraşdırılan invertorlarla, günəş panelləri və yarımstansiyalarla tanış olub, bu barədə məlumatları maraqla dinləyiblər.

Səfərin üçüncü günündə Roma şəhərindən dəvət olunmuş professor tərəfindən günəş və külək enerji qurğularının iş prinsipi, quruluşu, quraşdırılması, onlar arasındakı məsafələr, panellərin günəşə nəzərən istiqamətləri və digər məsələlərlə bağlı tələbələrə ətraflı məlumat verilib. Onlar həmin şirkətə məxsus olan invertor istehsal edən müəssisədə də təcrübə keçiblər.

Tələbələr səfərin son iki günündə Romada İtaliyanın tarixini əks etdirən abidələrlə, incəsənət muzeyləri ilə tanış olublar.