Brüsseldə asayiş keşikçiləri də etiraz aksiyasına başladı

Belçikanın paytaxtı Brüsseldə polis əməkdaşları etiraz aksiyası keçiriblər.  Küçələrə çıxan minlərlə polis iş şəraitinin yaxşılaşdırılmasını tələb ediblər. Nümayiş həmkarlar ittifaqlarının tələbi ilə polis əməkdaşı Tomas Monjuanın təxminən üç həftə əvvəl qeydiyyatda olan radikal  islamçı tərəfindən öldürülməsindən sonra təşkil edilib.
"CQSP" polis həmkarlar ittifaqının sözçüsü Eddi Quainonun dediyinə görə, bu, ehtiyac duyulduğu resurslara görə polisin hakimiyyətə qarşı qəzəbinin ifadəsidir: "Bu həm də Tomasın qətli üzərində düşünmək vaxtıdır və əlbəttə ki, polisin dinlənilməsi üçün bir fürsətdir".
Etirazçılardan biri isə insanların polislərə hörmətlə yanaşmamasından şikayətlənir: "Əhali artıq bizə hörmət etmir. İşləyəndə problemlərlə üzləşirik, zorakılıqdan əziyyət çəkirik, işimizi görməyə mane olurlar, bu, artıq qəbuledilməzdir".
Nümayiş paytaxtda baş verən iğtişaşlardan sonra Belçika polisinin üzləşdiyi  tənqidlər fonunda baş tutub. Noyabrın 27-də onlarca gənc futbol üzrə dünya çempionatının matçından sonra şəhərin mərkəzini dağıdıb. Hüquq-mühafizə orqanlarının əməkdaşları da öz növbəsində siyasətçiləri fəaliyyətsizlikdə günahlandırıblar. Brüsseldə və digər şəhərlərdə Belçika üzərində qazanılan gözlənilməz qələbə ölkə əhalisinin təxminən 5 faizini təşkil edən geniş Mərakeş etnik icmasının nümayəndələrinin şiddətli reaksiyasına səbəb olub .
Belçikanın paytaxtında onlarca aqressiv gənc avtomobilləri, elektrik skuterləri və zibil qutularını çevirərək yandırıb, vitrinləri sındırıb.
Polis kütləni dağıtmaq üçün təzyiqli sudan və gözyaşardıcı qazdan istifadə edib. Təxminən 10 nəfər saxlanılıb.
Talanlarla əlaqədar polis şəhərin mərkəzini bağlayıb, metro və tramvayların hərəkəti dayandırılıb. Antverpendə, Lyejdə, Niderlandın Amsterdam, Haaqa və Rotterdam şəhərlərində də iğtişaşlar baş verib.

R.CƏFƏROV,
"Azərbaycan"