USAID-in son illərdəki fəaliyyətinin yoxlanılması qaranlıq məqamlara aydınlıq gətirəcək
"Ərazi bütövlüyünü və suverenliyini bərpa etmiş Azərbaycana qarşı Qərb dövlətləri və institutlarının qərəzli münasibəti davam edir. Bu işdə Avropa Şurasının Parlament Assambleyası, Avropa Parlamenti ilə yanaşı, ABŞ-nin USAID adlanan Beynəlxalq İnkişaf Agentliyi də fəallığı ilə seçilir".
Bu sözləri "Azərbaycan" qəzetinə Milli Məclisin deputatı Kamran Bayramov deyib. O bildirib ki, USAID təsis olunduğu gündən humanitar fəaliyyət ilə deyil, ölkəsinin müxtəlif lobbi təşkilatlarının maraqlarının ifadəçisi kimi tanınıb. Dövlət Departamentinə bağlı bu təşkilatın aparıcı üzvlərinin bir çoxunun ABŞ kəşfiyyatının əməkdaşları olduğu da heç kimə sirr deyil. Bu təşkilatın əsl məqsədi çoxdan ifşa olunub. Məqsəd ayrı-ayrı dövlətlərin daxili işlərinə qarışmaq, bunun üçün özünə həmin ölkələrdə dayaq nöqtələri formalaşdırmaqdır. Bu qərəzli qurum müxtəlif QHT-lərə, media mənsublarına maliyyələr ayırmaqla onları asılı vəziyyətə gətirir, sonra isə öz maraqlarını həmin təşkilatlar vasitəsilə həyata keçirməyə çalışır, ölkələrin daxilindəki proseslərə bu yolla təsir göstərir. "Bizim ölkəmiz də istisna deyil. USAID dəfələrlə Azərbaycanı irqi ayrı-seçkilikdə ittiham edib, öz rəhbərinin dili ilə böhtanla dolu, humanitar fəaliyyətin ruhuna zidd olan bəyanatlar səsləndirib, hazırda məhkəməsi gedən müharibə cinayətkarında ittiham olunanların azadlığa buraxılması barədə çağırışlar edib. Bu təşkilat ABŞ-Azərbaycan münasibətlərinə ciddi zərər vurmaqla yanaşı, regionumuzda gərginlik yaratmağa çalışıb. Ermənistanın hərbiləşdirilməsinə cəhd göstərir. Rəsmi Bakı isə dəfələrlə ermənipərəst təşkilatın anti-Azərbaycan mövqeyini, səsləndirdiyi bəyanatları sərt tənqid edib, ABŞ rəhbərliyinə bununla bağlı öz mesajlarını çatdırıb. Heç də təsadüfi deyil ki, ötən ilin oktyabrında Milli Məclisin bir qrup deputatı da xarici işlər naziri Ceyhun Bayramova müraciət edərək USAID-in ölkəmizdəki fəaliyyətinə son qoyulmasını xahiş edib", - deyə o əlavə edib.
Deputat qeyd edib ki, ABŞ-nin Dövlət İdarəetməsinin Səmərəliliyi Departamentinin rəhbəri USAID-i kəskin tənqid edərək, onu "ölməli cinayətkar təşkilat" adlandırıb, Amerikaya nifrət edən radikal solçu marksistlərin yuvası kimi təsvir edib. Onun nəticəsidir ki, təşkilatın rəsmi internet və sosial media səhifələri bağlanıb, bir çox işçisi işdən kənarlaşdırılıb.
K.Bayramov düşünür ki, bu qurumun son illərdəki fəaliyyətinin yoxlanılması hələ çox qaranlıq məqamlara aydınlıq gətirəcək, bir çox cinayətlərin üstünü açacaq.
Əsmər QARDAŞXANOVA,
"Azərbaycan"
