8 Noyabr tarixinin əhəmiyyətini qiymətləndirmək çox çətindir, çünki söhbət sadəcə hərbi qələbədən deyil, həm də ədalətin, milli ruhun və Azərbaycan xalqının birliyinin təntənəsindən gedir.
Bu barədə AZƏRTAC-ın müxbiri ilə söhbətdə Milli Məclisin Ailə, qadın və uşaq problemləri komitəsinin sədri Hicran Hüseynova bildirib.
“Prezidentin Azərbaycan Milli Elmlər Akademiyasındakı çıxışında qeyd etdiyi kimi, biz böyük Zəfərin beşinci ildönümünü qürurla qeyd etməklə yanaşı, həm də onun mənasını və əhəmiyyətini bütün dünyaya çatdırmalıyıq. Xalqımızın qəhrəmanlığından və dözümlülüyündən, Azərbaycanın öz hüquqlarını necə müdafiə etməsindən, doğma torpaqlarını necə geri almasından və iradəsinin gücünü bütün dünyaya nümayiş etdirməsindən danışmaq bizim borcumuzdur”, - deyə o vurğulayıb.
Onun sözlərinə görə, elm, mədəniyyət və incəsənət nümayəndələrinin, eləcə də dövlət qurumları və ictimai təşkilatların bu hadisələrlə bağlı xatirələrin yaşaması və milli özünüdərki möhkəmləndirməsi üçün birgə çalışması vacibdir.
“Biz bu Qələbənin təsadüfi olmadığını, çox böyük cəsarət, inam və fədakarlıq sayəsində əldə edildiyini gənclərin dərk etməsi üçün maarifləndirmə işlərini gücləndirməliyik. Gənclər Azərbaycanın hansı yolla Zəfərə getdiyini bilməli və anlamalıdırlar”, - deyə komitə sədri qeyd edib.
Hicran Hüseynova vurğulayıb ki, məhz mədəniyyət və incəsənət xalqın hisslərinin dərinliyini, yaddaşını və qürurunu çatdırmağa, qəhrəmanların şücaətini və Zəfərin dəyərini gələcək nəsillərin qəlbində əbədiləşdirməyə qadirdir.
jpg_1764922515.jpg)
