Heydər Əliyevin arzuladığı Azərbaycan
Tarix və şəxsiyyət!
Tarixdə şəxsiyyətin rolu...
Bu barədə çox deyilib və çox yazılıb, xeyli müzakirələr də aparılıb.
Yekun fikir isə belə olub:
Tarixdə şəxsiyyətlərin rolu danılmazdır!
Bəzən şəxsiyyətlər tarixi proseslərin gedişinə təsir göstərə, onun istiqamətini müəyyən qədər dəyişə bilirlər!
Azərbaycan tarixində də belə görkəmli insanlar, baş verən proseslərə təsir göstərməyi bacaran şəxsiyyətlər olub.
Onlardan biri də müasir Azərbaycan dövlətinin banisi və qurucusu, xalqımızın Ümummilli Lideri Heydər Əliyevdir.
Heydər Əliyev öz fəaliyyəti ilə tarixin gedişinə təsir edən, tarixdə silinməz izi qalan fenomenal insanlardan olub. Onun Azərbaycan xalqı üçün etdikləri, müasir, müstəqil Azərbaycanın quruculuğuna verdiyi misilsiz töhfələr hamı tərəfindən minnətdarlıqla etiraf olunur.
Əslində, Heydər Əliyevin tərcümeyi-halı həm də doğma Azərbaycanın inkişaf mərhələləri, keçdiyi yol, qazandığı uğurlarının təsdiqi və təsviridir.
Ulu Öndər Heydər Əliyev Azərbaycana 34 il rəhbərlik etmişdir. Bu rəhbərlik illəri bir-birindən əhəmiyyətli dərəcədə fərqlənən iki dövrdən ibarət olmuşdur.
Hər bir dövrün isə öz xarakterik xüsusiyyəti, prinsipial fərqləri mövcuddur. Lakin bu fərqli dövrlərə baxmayaraq, Ümummilli Liderimiz bütün illərdə və hallarda Azərbaycana fədakarlıqla xidmət göstərmiş, mövcud imkanlar dairəsində xalqın sosial rifahının, həyat şəraitinin yaxşılaşdırılmasını, iqtisadiyyatın yüksələn xətlə inkişafını təmin edə bilmişdir.
Ulu Öndər Heydər Əliyev qeyri-adi zəka sahibi, xarizmatik şəxsiyyət olmuşdur. Yüksək təşkilatçılıq bacarığı, nəhəng iş qabiliyyəti, siyasi uzaqgörənlik, üstəlik, yorulmadan çalışması uğurlarının başlıca səbəbləri idi.
SSRİ adlı super dövlət kommunizm ideologiyasına əsaslanırdı. On beş müttəfiq respublikadan təşkil olunan bu qırmızı imperiyada hər şey mərkəzə tabe edilmişdi. Sov. İKP sözdə siyasi partiya olsa da, həqiqətdə dövləti idarə edən qurum, bütün məsələlər barədə son söz deyən, qərar verən orqan sayılırdı.
Ulu Öndər özünəməxsus müdrikliyi və yüksək təşkilatçılıq bacarığı sayəsində həmin dövrdə qeyri-millətlər üçün heç də asan olmayan bir səviyyəyə - Sov. MK Siyasi Bürosu üzvlüyünədək yüksəldi.
Azərbaycana rəhbərliyi dövründə və hələ Sov.İKP MK Siyasi Büro üzvlüyünə namizəd olarkən şəxsi nüfuzundan istifadə edərək mərkəzi büdcədən ölkəmizə daha çox vəsait ayrılmasına nail olurdu. Həmin vəsaitlər isə Azərbaycanın inkişafına yönəldilir, xalqımızın bəhrələnməsinə sərf olunurdu.
***
1969-cu ildə Heydər Əliyev Azərbaycan KP MK-nın birinci katibi seçilərkən Azərbaycan geridə qalmış aqrar respublikalardan idi.
Yeni texnika və texnologiya tətbiq edilmədiyindən neft sənayesində əsaslı geriləmə, tənəzzül yaranmışdı.
Aqrar sektorda vəziyyət daha acınacaqlı idi. Məhsuldarlıq və bütövlükdə ümumi istehsal az olduğundan kəndlinin qazancı da aşağı səviyyədəydi. Bu, insanların güzəranına mənfi təsir göstərirdi.
Ulu Öndərimiz özünəməxsus enerji və ciddiyyətlə işə başladı. Hər iki sahədə işlər paralel şəkildə aparıldı. Əvvəlcə ümumittifaq fondundan kifayət qədər vəsait ayrılmasına nail olundu. Neft sənayesinin dirçəldilməsi prosesinə start verildi. 1941-1945-ci illərdə Azərbaycan cəbhənin yanacaqla təminatında mühüm rol oynamışdı. Artan tələbatı daim ödəmək üçün neft quyuları şiddətli istismar olunmuşdu. Yeni yataqların kəşfinə, qoyulan investisiyaların artırılmasına, təzə texnologiyanın tətbiqinə isə lazımi diqqət yetirilməmişdi.
Neft sənayesindəki mövcud vəziyyəti dərindən təhlil edən Ulu Öndər Heydər Əliyev sahənin imkanlarından geniş istifadə olunması üçün zəruri addımların ardıcıllıqla atılmasına nail oldu. Azərbaycanda neft-maşınqayırma, kimya sənayesi yaradılaraq sürətlə inkişaf etdi. "Neft daşları"nda istehsalın həcmi xeyli artdı. Beləliklə, yeni, yüksək məvacibli iş yerləri açıldı, dövlət hesabına mənzillər tikilərək neft və neftmaşınqayırma sənayesi sahəsində çalışan vətəndaşların mənzil-məişət şəraiti, sosial rifahı ciddi şəkildə yüksəldildi.
Ümummilli Liderimiz şəxsi nüfuzundan istifadə edərək bir sıra əhəmiyyətli layihələrin Azərbaycana gətirilməsinə nail olurdu. Məişət kondisionerləri zavodunun, Bakı Dərin Özüllər Zavodunun və digər müəssisələrin Azərbaycanda inşası həmin dövrün əhəmiyyətli hadisələrindən sayılırdı.
***
Azərbaycanda kənd təsərrüfatının yeni inkişaf mərhələsinə qaldırılması, bu sahədə baş verən inqilabi dəyişikliklər də Ulu Öndərimizin adı ilə bağlıdır.
Müharibədən sonra Azərbaycan kəndi özünə gələ bilmirdi. Məhsuldarlığın və bütövlükdə istehsalın aşağı olması, kolxoz və sovxozların zəif texniki bazası bu sahəni qeyri-rentabelli vəziyyətə salmışdı.
Ulu Öndər Heydər Əliyev kənd əməkçilərini səfərbərliyə almağı, ittifaq miqyasındakı yeniliklərin kənd təsərrüfatına da gətirilməsini təmin etdi. Məhsuldar toxumçuluğun təmini, mal-qaranın cins tərkibinin yaxşılaşdırılması, daha müasir kənd təsərrüfatı texnikasından istifadə tezliklə öz müsbət nəticəsini verməyə başladı.
Kolxoz və sovxozlar varlandıqca, kənddə çalışanların əməkhaqları artdıqca, Azərbaycan kəndinin də siması əsaslı şəkildə dəyişir, müasirləşirdi. İlbəil abad kəndlərin sayı artır, insanlar daha yaxşı yaşayırdılar. Köhnə, palçıq komalardan yaxasını qurtaran Azərbaycan kəndlisi özünə mişar daşından ikimərtəbəli, yaraşıqlı evlər tikir, məişət şəraitini şəhərdəkinə yaxınlaşdıra bilirdi. Ötən əsrin yetmişinci illərindən etibarən Azərbaycan kəndləri tanınmaz dərəcədə yeniləndi. Evlərdə müasir mebellərdən, kondisionerlərdən istifadə olunur, ailələr özlərinə minik maşınları alır, kəndli balaları ölkə paytaxtına gələrək ali məktəblərdə oxuyurdular. Beləliklə, həm Azərbaycan kəndi tikilərək gözəlləşir, müasirləşir, həm də kənddə yaşayanların mədəni səviyyəsi yüksəlirdi.
Ulu Öndər Heydər Əliyevin Azərbaycan kəndinə daha bir töhfəsi üzümçülüklə bağlı digər müttəfiq respublikalar üçün nəzərdə tutulan layihəni ölkəmizə gətirməsi oldu. Belə ki, "Azərbaycan SSR-də üzümçülüyün və şərabçılığın inkişafı haqqıda" Sov.İKP MK-nın, SSRİ Nazirlər Sovetinin qərarının icrası ölkəyə böyük vəsait qoyulması ilə nəticələndi. Qərara əsasən, az müddət ərzində kəndlərdə geniş üzüm plantasiyaları salındı, emal müəssisələri tikildi, yeni qəsəbələr inşa olundu. Üzümçülüyün və şərabçılığın inkişafı Azərbaycanın iqtisadi cəhətdən xeyli varlanmasına, kəndlilərin sosial rifahının əsaslı şəkildə yüksəlməsinə şərait yaratdı.
***
Ulu Öndər Heydər Əliyev gənclərdən də diqqət və qayğısını heç zaman əsirgəməyib. Müasir, firavan Azərbaycan quruculuğunu qarşıya məqsəd qoyan Ümummilli Liderimiz yeni nəsil kadrların hazırlanmasına xüsusi diqqət yetirirdi. Çünki yaxşı bilirdi ki, bacarıqlı, savadlı və səriştəli kadrlar olmadan qarşıya qoyulan vəzifələri uğurla həyata keçirmək mümkün deyildir. Odur ki, Azərbaycanın bu gününə və gələcəyinə xidmət göstərəcək kadrların hazırlanması və yetişdirilməsi üçün bir sıra gərəkli işlər gördü.
Ulu Öndərin rəhbərliyi dövründə ölkəmizdə bir sıra yeni təhsil ocaqları açıldı, ali və orta ixtisas təhsili məktəblərinə qəbulun həcmi artırıldı. SSRİ dövründə Rusiyada bir çox nadir ixtisaslar üzrə ali məktəblər fəaliyyət göstərirdi. Ulu Öndər Heydər Əliyev hər il yüzlərlə, bütövlükdə rəhbərliyi dövründə isə minlərlə azərbaycanlı gənci dövlət hesabına həmin institutlara göndərərək orada müxtəlif ixtisaslara yiyələnmələrinə şərait yaratdı. Həmin gənclər həm sovet, həm də müstəqillik illərində doğma vətənlərinə xidmət göstərərək ölkəmizin inkişafında fəal iştirak etdilər.
Ən mühüm məsələlərdən biri hərbi kadrların hazırlanması sahəsində görülən işlər idi. Sovet dövründə müsəlman respublikalardan olan çağırışçıları müasir silahların olduğu hərbi hissələrə deyil, inşaat batalyonlarında xidmətə salırdılar. Onların hərbi məktəblərə qəbuluna da müəyyən süni maneələr yaradılırdı. Ümummilli Liderimiz əvvəlcə Bakıda C.Naxçıvanskinin adını daşıyan hərbi təmayüllü məktəbin açılmasını təmin etdi. Sonra Bakıdakı ali hərbi məktəblərə azərbaycanlı gənclərin qəbulu üçün kvota ayırtdırdı. Eyni zamanda SSRİ məkanındakı hərbi məktəblərə təhsil almağa göndərilən azərbaycanlıların sayı da xeyli yüksəldi.
Hərbi ixtisaslara yiyələnərək SSRİ-nin müxtəlif guşələrindəki hərbi hissələrində xidmət edən azərbaycanlılar Ermənistan-Azərbaycan müharibəsi başlayanda geriyə dönərək vətənin müdafiəsində döyüşərək xüsusi şücaət göstərdilər.
***
Ümummilli Liderimizin Azərbaycana birinci rəhbərliyi dövründə sözün həqiqi mənasında inqilabi dəyişikliklər baş verdi. Azərbaycan başdan-başa yenidən tikilib quruldu. Ölkə paytaxtı Bakı xeyli böyüdü və gözəlləşdi, yeni mikrorayonlar salındı, məktəblər, mədəniyyət ocaqları inşa edilərək öz qapılarını xalqın üzünə açdı.
Azərbaycan mədəniyyəti, elmi sürətlə inkişaf etdi. Yeni teatrlar yaradıldı, tamaşalar qoyuldu. Bəstəkarlarımızın musiqi əsərləri, yazdıqları baletlər ittifaqın, habelə dünyanın məşhur konsert salonlarında səsləndirildi, səhnələrdə qoyuldu.
Təkcə zəhmət adamları deyil, yazıçılarımız, bəstəkarlarımız yüksək dövlət mükafatlarına, Sosialist Əməyi Qəhrəmanı adına layiq görüldülər. Xalqımız daha yaxşı yaşamağa başladı, mədəni səviyyəsini yüksəltdi.
Azərbaycan on beş respublika arasındakı aşağı mövqeyindən öncül yerə çıxdı.
Ulu Öndərimiz SSRİ-nin rəhbərlərindən biri kimi Moskvaya işləməyə aparılanda abad, inkişafda olan bir ölkə qoyub getdi. Moskvada Sov.İKP Siyasi Bürosunun üzvü, SSRİ Nazirlər Soveti sədrinin birinci müavini kimi işlədiyi dövrdə Azərbaycanı, xalqımızı unutmadı, daim köməyini, dəstəyini göstərdi.
M.Qorbaçovun SSRİ rəhbərliyinə gəlişindən, "yenidənqurma" adlı ittifaq miqyaslı oyunbazlıqdan sonra vəziyyət büsbütün dəyişdi, qırmızı imperiyanın çöküşü başladı. Ulu Öndər Heydər Əliyevin böyük siyasətindən müvəqqəti ayrılması Azərbaycana da təsirsiz ötüşmədi.
Nəhəng imperiya çalxalanmağa, mərkəzlə müttəfiq respublikalar arasındakı bağlar qırılmağa başladı. Ölkəni mitinq və tətillər dalğası bürüdü, iqtisadiyyat pozuldu, qıtlıq, ərzaq növbələri yarandı, sabaha inam itdi...
Qarabağ probleminin yenidən meydana atılması, milli ədavətin gücləndirilməsi, belə bir dövrdə respublikaya maymaq, qorxaq və qətiyyətsiz adamların başçılıq etməsi vəziyyəti daha da mürəkkəbləşdirdi. "Cızığından çıxmış" Azərbaycanı cəzalandırmaq üçün Moskva tərəfindən 20 Yanvar faciəsi törədildi, sovet ordusu Azərbaycana gələrək dinc əhalini küçələrdə gülləbaran etdi.
Azərbaycanın faciəli günləri başladı, erməni-sovet ordusu vasitəsilə torpaqlarımız işğala məruz qaldı.
Özlərini "demokrat" adlandıran, milli-azadlıq hərəkatının dalğalarında iqtidara gələn AXC-Müsavat cütlüyü fəlakətli vəziyyəti daha da dərinləşdirdi. Heç bir idarəetmə təcrübəsi və səriştəsi olmayanlar, şəxsi maraqlarını dövlət mənafeyindən üstün tutanlar naşılıqları ucbatından Azərbaycanı bir dövlət kimi məhvolma həddinə çatdırdılar. Ölkə keçmişdəki kimi kiçik xanlıqlara bölünmə ərəfəsində idi.
Bu məqamda Azərbaycan xalqı özünün ən müdrik qərarını verdi: sınanmış oğlunu, dünya şöhrətli siyasətçisini yenidən ölkə rəhbərliyinə dəvət etdi!
Ulu Öndər xalqının çağırışına biganə qala bilmədi!
Vətən dar günündə ümidini ona bağlamışdı!
Bu müqəddəs ümidi doğrultmaq lazım idi!
Geriyə qayıtdı, topsuz, tüfəngsiz, ordusuz...
Özü ilə zəngin təcrübəsini, dərin biliyini, bir də vətən sevgisi ilə döyünən ürəyini gətirdi!
***
1993-cü ilin 15 iyununda Ulu Öndər Heydər Əliyev faktiki olaraq ölkəyə rəhbərliyə başladı.
Lakin o, qurulu, abad Azərbaycanı qoyaraq Moskvaya getmişdi. Qayıtdığı dövrün Azərbaycanı isə ümummilli böhrana düşərək boğulan, torpaqları kəndbəkənd işğala məruz qalan, iqtisadiyyatı pozulan, dağılan, insanları isə ümidsiz bir vəziyyətdə idi.
Ümummilli Liderimiz ölkəni fəlakətdən qurtarmaq, arzuladığı yeni, müstəqil Azərbaycanı qurmaq üçün dərhal fəaliyyətə başladı. Sutkanın 18 saatını dayanmadan çalışır, bir neçə istiqamətdə fəaliyyət göstərirdi.
Əvvəlcə atəşkəs barədə razılıq əldə olundu və beləliklə, yeni ərazilərin işğalının qarşısı alındı. Ölkədəki anarxiya, qanunsuzluq və başıpozuqluq hallarının aradan qaldırılması üçün təsirli tədbirlər görüldü. Qanunsuz silahlı dəstələr ləğv edildi, əhalidəki külli miqdarda silah-sursat toplanıldı.
Ölkədə daimi və dönməz sabitlik yarandı.
Lakin Azərbaycanın düşmənlərinə xidmət edən qüvvələr bununla barışmaq istəmirdilər. İki dəfə - 4 oktyabr 1994-cü və 13-18 mart 1995-ci illərdə dövlət çevrilişi cəhdləri törədildi.
Ulu Öndər həyatını təhlükə qarşısında qoyaraq heç bir halda postunu tərk etmədi.
Xalqa müraciət edərək insanları dövləti və dövlətçiliyi qorumaq üçün meydanlara səslədi.
Bir neçə saat ərzində minlərlə insan dahi rəhbərlərinin səsinə səs verərək küçələrə axışdılar, bədxah və düşmən qüvvələrə qarşı müdafiə cəbhəsi yaratdılar.
Hər iki dövlət çevrilişi cəhdi iflasa uğradı, təşkilatçılar qanun məsuliyyətinə cəlb edilərək cəzalarını aldılar.
Quruculuq sahəsində isə görüləsi işlər hədsiz dərəcədə çox idi.
Bir milyondan artıq insan qaçqın və məcburi köçkün vəziyyətinə düşərək çadır şəhərciklərində, ictimai binalarda köməksiz vəziyyətdə qalmışdı. Dövlət büdcəsində ciddi vəsait çatışmazlığı vardı. Ulu Öndər Heydər Əliyev beynəlxalq təşkilatlar və dost ölkələrə müraciət edərək binəsib insanlara humanitar yardım göstərilməsinə nail oldu, sonra isə bu sahəyə sistemli dövlət yardımını təşkil etdi.
AXC-Müsavat cütlüyünün görə bilmədiyi işi, Azərbaycan neftinin dünya bazarına çıxarılması və büdcəyə neft gəlirlərinin gətirilməsi prosesinə start verdi. Neft danışıqlarının uğurlu alınması üçün bu işə o dövrdə ARDNŞ-in vitse-prezidenti vəzifəsində çalışan İlham Əliyev cəlb edildi. Neft danışıqları çətin və mürəkkəb şəraitdə keçirilsə də, nəticə uğurlu oldu. Sonradan Azərbaycanın dövlət maraqları tam təmin olunan "Əsrin müqaviləsi" adlandırılan neft kontraktı bağlandı. Bakı-Tbilisi-Ceyhan əsas neft ixracı boru kəmərinin tikintisinə başlanıldı.
***
Azərbaycan "Dövlət müstəqilliyi haqqında Konstitusiya Aktı" qəbul etsə də, əslində, müstəqillik deklorativ xarakter daşıyırdı. Həqiqi müstəqilliyə nail olmaq üçün də çox iş görülməliydi.
Bazar iqtisadiyyatı münasibətlərinə keçmək, buna zəruri hüququ baza yaratmaq vacib idi. Az bir vaxtda baş müəllifi Ulu Öndər Heydər Əliyev olan yeni Konstitusiya layihəsi hazırlandı və ümumxalq səsverməsi yolu ilə qəbul olundui. Dövlət əmlakının özəlləşdirilməsi üzrə iki dövlət proqramı qəbul olunaraq icra edildi. Azərbaycan kəndinin yeni istehsal münasibətlərinə keçirilməsi də zəruri idi. Ən çətin problemlərdən biri olan aqrar islahatların aparılması da uğurla başa çatdı, torpaq əsl sahiblərinə qaytarıldı.
Ulu Öndərin ən böyük xidmətlərindən biri də Azərbaycan cəmiyyətinin demokratikləşdirilməsi yolunda atdığı qətiyyətli addımlardır. Yeni Konstitusiyanın qəbulundan sonra vətəndaş cəmiyyətinin formalaşması, insan hüquqlarının qorunması, mətbuat və söz azadlığının bərqərar olunması istiqamətində mühüm işlər görüldü, AXC-Müsavat cütlüyü özlərini "demokrat" saysalar da, mətbuata azadlıq verməyə cəsarətləri çatmadı. Əksinə, onların dövründə mətbu orqanlar dəfələrlə təzyiqlərə məruz qaldı, jurnalistlər döyüldü, təhqir olundu. Bu cəsarəti də Ulu Öndərimiz öz üzərinə götürdü. 6 avqust 1998-ci ildə mətbuata senzura nəzarətini birdəfəlik aradan qaldıran fərman imzaladı. Beləliklə, mətbuat senzura buxovundan azad edildi.
Ulu Öndər Heydər Əliyev jurnalistlərin soaial müdafiəsinin yüksəldilməsi sahəsində də gərəkli işlər gördü. Bir sıra qəzetlərin mətbəələrə olan borcları dövlət hesabına ödənildi. Mətbu orqanların təsis olunması əhəmiyyətli dərəcədə asanlaşdırıldı və sadələşdirildi. Azərbaycan jurnalistləri Ümummilli Liderimizin bu qayğılarına cavab olaraq onu "Jurnalistlərin dostu" adına layiq gördülər.
Artıq Azərbaycan müstəqil daxili və xarici siyasət yürüdən dövlətə çevrilmişdi. Əsas məsələlərdən biri Ermənistan-Azərbaycan Dağlıq Qarabağ probleminin həlli idi.
Lakin ömür Ulu Öndərimizə möhtəşəm planlarını yerinə yetirməyə möhlət vermədi. O, Azərbaycanın yeni inkişaf yolunu müəyyənləşdirərək görüləcək bütün işlərin ağırlığını siyasi varisi cənab İlham Əliyevin çiyinlərinə qoyaraq əbədiyyətə qovuşdu!
Azərbaycan xalqı sevimli rəhbərinin və xilaskarının vəsiyyətinə əməl edərək cənab İlham Əliyevi dövlət başçısı seçdi.
Beləliklə, Ulu Öndərimizin arzusunda olduğu yeni Azərbaycanın quruculuğu missiyasını da Prezident İlham Əliyev yerinə yetirməli oldu.
***
Prezident İlham Əliyev xalqın ona göstərdiyi etimadı layiqincə doğrultmaq üçün ilk günlərdən gərgin və məhsuldar fəaliyyətə başladı.
Hakimiyyətin ilk anlarından sabitliyi pozmaq üçün meydana atılanları dərhal yerində oturtdu, onlara müstəqil Azərbaycanın etibarlı əldə olduğunu anlatdı.
Həmin dövrdə Azərbaycanda iqtisadi çətinliklər hökm sürürdü. İşsizlik baş alıb gedir, kəndlər boşalır, bölgələrə elektrik enerjisi fasilələrlə verilir, qaçqın və məcburi köçkünlər çadır şəhərciklərində, ictimai binalarda ağır vəziyyətdə yaşayırdı. Əksər yaşayış məntəqələri qazlaşdırılmamışdı və Azərbaycan qonşu Rusiyadan mavi yanacaq alırdı.
Cənab İlham Əliyev seçkiqabağı təbliğatında xalqa öz vədlərini bəyan etmişdi: İşsizlik ən aşağı səviyyəyə endiriləcək, hər bir yaşayış məntəqələrində daim elektrik enerjisi olacaq, bütün kəndlər və qəsəbələr qazlaşdırılacaq, çadır şəhərciklərində bir nəfər qaçqın və məcburi köçkün qalmayacaqdır.
Dövlət büdcəsinə neft pulları daxil olduqca vəziyyət sürətlə dəyişirdi. Prezident İlham Əliyev cari işləri perspektiv problemlərin uğurlu həlli ilə məharətlə əlaqələndirirdi. Bakı-Tbilisi-Ərzurum qaz kəmərinin ardınca Bakı-Tbilisi-Qars dəmir yolunun istifadəyə verilməsi, “Şimal-Cənub”, “Şərq-Qərb” nəqliyyat dəhlizlərinin işə salınması, Azərbaycanın logistika mərkəzinə və Avropanın mavi yanacaqla təminatında etibarlı tərəfdaşa çevrilməsi ölkənin iqtisadi qüdrəti ilə yanaşı, siyasi nüfuzunu da əhəmiyyətli şəkildə yüksəltdi.
Azərbaycan ən əvvəl özünün enerji təhlükəsizliyini təmin etdi. Bu gün ölkəmiz dünya bazarına təkcə neft və təbii qaz deyil, elektrik enerjisi də çıxarır.
Cənab İlham Əliyev verdiyi bütün vədləri ləyaqətlə yerinə yetirmişdir. Ölkə üzrə qazlaşdırma 95 faizdən yüksəkdir. Artıq Azərbaycan alternativ elektrik enerjisi istehsalına başlamışdır və sürətlə yeni, bərpaolunan elektrik enerjisi istehsalı qurğuları inşa edir.
Ölkənin bütün magistral yolları yenidən qurularaq genişləndirilmiş, kəndarası yollar asfaltlanmış, gediş-gəliş xeyli asanlaşmışdır.
İndiyədək 116 məcburi köçkün qəsəbəsi salınaraq 300 mindən çox insan rahat mənzillərə köçürülmüşdür.
Paytaxt Bakı yenidən tikilib qurulmuş, təzə küçələr və parklar salınmış, dünyanın ən gözəl şəhərlərindən birinə çevrilmişdir.
Kənddə sahibkarlığın inkişafı Azərbaycan kəndinin simasını büsbütün dəyişmişdir. İnsanlar özlərinə bir-birindən yaraşıqlı, gözəl evlər tikmiş, sosial rifahlarını xeyli yaxşılaşdırmışlar.
Bu qayğıdan jurnalistlər də kənarda qalmamışlar. Dövlət öz hesabına yeni yaşayış binaları tikib təmir edərək qələm sahiblərinin ixtiyarına vermişdir.
Azərbaycan həm də turizm diyarına çevrilmişdir. Ölkəyə dünyanın hər yerindən gələn turistlərin sayı ilbəil artır. Çoxsaylı istirahət mərkəzləri, çoxulduzlu hotellər, unikal mətbəximiz gələn qonaqları hədsiz dərəcədə razı salır.
***
Müzəffər Ali Baş Komandan cənab İlham Əliyev Ulu Öndərimizin ən böyük arzusunu və vəsiyyətini də şərəflə yerinə yetirdi.
44 günlük Vətən müharibəsində Ermənistan ordusunu dəmir yumruğu ilə məhv etdi, düşməni qarşısında diz çökdürərək kapitulyasiya aktını imzalatdırdı!
İndi isə Qarabağın bərpası, dirçəldilməsi prosesi sürətlə davam edir. Bu sahədə Birinci vitse-prezident Mehriban xanım Əliyevanın da fəaliyyəti ürəkaçandır. Onun Şuşada Heydər Əliyev Fondunun dəstəyi ilə reallaşdırdığı layihələr qürur və sevinc doğurur.
Böyük qayıdışa ciddi hazırlıq görülür. Şəhərlərin baş planları tərtib olunur, yeni, bir-birindən maraqlı layihələr reallaşdırılır. Şuşaya, Laçına, Kəlbəcərə yeni yollar çəkilir, dəmir yolu xətləri təzədən salınır. Kənd təsərrüfatının dirçəldilməsi, sənaye parklarının tikintisi diqqət mərkəzindədir. Kəndlinin bol suvarma suyu ilə təminatı üçün yeni su anbarları yaradılır, köhnələri təmir olunur, təzə kanallar çəkilir, artezian quyuları qazılır. Müasir tipli, "ağıllı" kənd və qəsəbələrin yaradılması da diqqət mərkəzindədir.
Ulu Öndər Heydər Əliyevin məşhur kəlamı hamının dilinin əzbəridir və hər birimizin qəlbini qürur hissi ilə doldurur: "Mən həmişə fəxr etmişəm, bu gün də fəxr edirəm ki, mən Azərbaycanlıyam!"
Ümummilli Liderimiz təkcə Azərbaycanlı olması ilə fəxr etmirdi. O, Azərbaycanı bütün varlığı ilə sevir, onun yüksəlişi, qüdrətlənməsi, dünyada nüfuzunun artması və müstəqilliyinin əbədiliyə çevrilməsi üçün mümkün olanları edirdi.
Ulu Öndərimiz Azərbaycanı azad və müstəqil görmək istəyirdi.
Ulu Öndərimiz Azərbaycanın ərazi bütövlüyünün bərpa olunmasını istəyirdi.
Ulu Öndərimiz Azərbaycanı müasir, demokratik, gözəl, abad ölkə kimi görmək istəyirdi.
Ulu Öndərimiz Azərbaycan vətəndaşlarının xoşbəxt, firəvan, alnıaçıq və üzügülər yaşamasını istəyirdi.
Müzəffər Ali Baş Komandanımız, Prezidentimiz İlham Əliyev bütün bu istək və arzuları gerçəkliyə çevirdi.
Azərbaycanı Cənubi Qafqazın ən güclü dövləti etdi.
Azərbaycanın dünyada nüfuzunu qat-qat artırdı.
Qüdrətli ordu yaratdı, ərazi bütövlüyümüzün bərpasına nail oldu.
Bu gün isə Azərbaycanı Zəfər yolu ilə dayanmadan irəli aparır!..
Bəxtiyar SADIQOV
Digər Xəbərlər
QƏZETİN ÇAP VERSİYASI
XƏBƏR LENTİ Bütün xəbərlər
Azərbaycan nefti bahalaşıb
19 Mart
Sabahdan Azərbaycanda 7 günlük Novruz tətili başlayır
19 Mart
Mövcud hava şəraiti ilə bağlı sürücülərə müraciət edilib
19 Mart
Braziliyada hiss edilən temperatur 62 dərəcə Selsini keçib
19 Mart
Ümumdünya Buxara Yəhudiləri Konqresinin nümayəndə heyəti Qırmızı qəsəbəyə səfər edib...
19 Mart
Türkiyə və Rusiya prezidentləri arasında telefon danışığı olub
19 Mart
Türkiyə Prezidenti: Bu yay İraq sərhədimizin təhlükəsizliyini tam təmin edəcəyik
19 Mart
Füzuli şəhəri növbəti sakinlərinə qovuşdu
19 Mart
Azərbaycanın Birinci vitse-prezidenti Mehriban Əliyeva İlaxır çərşənbə ilə bağlı paylaşım edib...
19 Mart
Vladimir Putindən inamlı qələbə
19 Mart
DİQQƏT ÇƏKƏNLƏR
Dostluqdan müttəfiqliyə14 Mart 2024
Azərbaycan islamofobiya ilə mübarizədə öndə gedir12 Mart 2024
Prezident İlham Əliyev və Prezident Kasım-Jomart Tokayev mətbuata bəyanatlarla çıxış ediblər YENİLƏN...11 Mart 2024
Mərhəmətin zərif rəmzi08 Mart 2024
Yüksək beynəlxalq etimadın növbəti nümunəsi07 Mart 2024
ÇOX OXUNANLAR
Hücum diplomatiyasından hücum taktikasına14 Mart 2024
Azərbaycan və Qazaxıstan enerji sahəsində də birgə addımlayır13 Mart 2024
Kasım-Jomart Tokayev: Qazaxıstan və Azərbaycan əməkdaşlığın yeni dövrünə qədəm qoyur10 Mart 2024
Azərbaycan beynəlxalq "yaşıl enerji" mərkəzinə çevrilir10 Mart 2024
Xoşbəxt qadın güclü cəmiyyətin təməlidir08 Mart 2024
Albaniya Azərbaycanın dəstəyini yüksək dəyərləndirir06 Mart 2024
OXUCU MƏKTUBLARI
NƏŞRLƏRİMİZ
BAŞ REDAKTORDAN
Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!