"Vətən, bayraq üçün əzmkarlıq göstərəcək komanda yaratmaq arzusundayıq"

Futbol üzrə milli komandamızın baş məşqçisi Fernandu Santuş dünən mətbuat konfransı keçirib. Əvvəlcə media önündə millinin heyətini açıqlayan portuqaliyalı mütəxəssis daha sonra jurnalistlərin suallarını cavablandırıb. O qeyd edib ki, əzmkar və mübariz komanda qurub, rəqiblərin qarşısına çıxacaq, Azərbaycanın uğurları naminə çalışacaq.
70 yaşlı mütəxəssis yığmanın aparıcı üzvü Mahir Emrelinin heyətdə yer almamasına aydınlıq gətirib: "O, hazırda zədəlidir. 50 nəfərin olduğu siyahıdan seçim etmək məcburiyyətində idim. İndiki durumda yalnız 24 nəfəri heyətə cəlb etdim. Amma bu o demək deyil ki, digərləri növbəti oyunlarda meydana çıxa bilməyəcəklər. Mahirlə yanaşı, bir neçə futbolçunu da eyni səbəbdən milli komandaya çağırmadım. Fikrimcə, onların yoxluğu komandamızın oyununa mənfi təsir göstərməyəcək".
O bildirib ki, komanda üzvləri Azərbaycanı Millətlər Liqasında yaxşı şəkildə təmsil etmək üçün əllərindən gələni edəcəklər: "Az vaxtımız qalıb. Yalnız qələbə qazanmaq haqqında düşünürük. Məşqlərimiz sentyabrın 4-də yekunlaşacaq. Futbolçuların fiziki hazırlığında köklü dəyişikliklər etməmişik. Onlar hazırda oynadıqları klublarda keçdikləri fiziki məşqləri yerinə yetirirlər".
Portuqaliyalı çalışdırıcı milliyə çağırılan hər bir oyunçunun onun üçün önəmli olduğunu vurğulayıb: "Mənə görə bu millinin formasını geyinən bütün futbolçular bərabərdir. Heç kim digərindən daha üstün deyil.  Biz bura gəlmişik ki, gələcək üçün komanda quraq. Həmin komandanın ölkəni yaxşı təmsil etməsini istəyirik. Cəlb etdiyim futbolçular mənimlə ilk dəfə işləyəcəklər. Biz onları, onlar da bizi tanıyacaqlar. İsveçlə oyuna qədər cəmi bir neçə məşqimiz olacaq. Fiziki baxımdan hansısa dəyişiklik etməyə imkanımız yoxdur. Futbolçular klublarında necə hazırlıq keçiblərsə, elə də olacaq. İndi hansısa köklü dəyişikliklər etməyə gərək yoxdur. Gələcək üçün yüksək səviyyədə mübarizə apara biləcək rəqabətədavamlı komanda qurmaq istəyirik. Çox kompakt, istəkli, vətən, bayraq üçün əzmkarlıq göstərəcək komanda yaratmaq arzusundayıq. Milliyə çağırılacaq hər bir futbolçu mənim üçün önəmlidir. Amma onlar ulduz deyillər. Ulduz ancaq göydə olur. Düşünürəm ki, hazırda heyətdə yer alan bütün oyunçular İsveç və Slovakiya ilə matçlarda özlərini yaxşı şəkildə göstərə biləcəklər. Onlar verdiyim şansa layiq futbolçulardır".
Qeyd edək ki, Azərbaycan millisi sentyabrın 5-də Tofiq Bəhramov adına Respublika Stadionunda İsveçlə, bu ayın 8-də isə Koşitsedə Slovakiya ilə üz-üzə gələcək.

Elçin CƏFƏROV,
"Azərbaycan"