Portuqaliya millisinin baş məşqçisi Fernandu Santuş mundialın qrup mərhələsinin 2-ci turunda Uruqvaya qalib gəldikləri matç (2:0) barədə danışıb.

Bu qələbə ilə 1/8 finala adlayan yığmanın çalışdırıcısı komandasının çıxışından razı qaldığını deyib: "Bu, əla oyun idi və qalan heç bir şeyin əhəmiyyəti yoxdur. Komandamız çətin rəqibə qarşı əla oyun nümayiş etdirdi. Boşluqlar tapıb matça nəzarət etməyi, hücum yaratmağı bacardıq. Biz əks-hücumda oynayaraq Uruqvayın istədiyini etməsinə mane olduq. İlk iyirmi dəqiqə çətin keçdi və bu, Uruqvayın xeyrinə idi. Amma sonra ikinci hissədə özümüzü toparlamağı bacardıq. Oyunumuzda nəyi inkişaf etdirmək lazımdır? Bunu oyunçularla müzakirə etməliyik. Topla kombinasiyaları təkmilləşdirməli və rəqiblərin cərimə meydançamıza yaxınlaşmasının qarşısını almalıyıq. Yaxşılaşdırmalı olduğumuz çox şey var. Amma komandada müsbət məqamlar da az deyil".
Santuş zədəli futbolçusu Nuno Mendeşin durumu barədə də danışıb: "Nuno Mendeş... O, sabah və ya bir gün sonra sınaqdan keçiriləcək. Bir növ əzələ ağrısı hiss etdi. Ümid edirik ki, bu, mürəkkəb bir şey deyil".
Mütəxəssis 2018-ci ildə mundialın 1/8 finalında Uruqvaya uduzduqları görüşü də xatırlayıb: "2018-ci ildə məğlubiyyətlə müqayisədə hazırkı oyunumuz fərqlidir. 4 il geridə qalıb. O zaman 1/8 finalda qarşılaşırdıq. Bu dəfə Uruqvay qalib gələ bilərdi, amma biz qalib olduq. Mərhələ adlamaq böyük məmnunluq hissi doğurur. İstədiyimiz bu idi. Komandam kompaktdır, oyunçularımızın çox yaxşı ruhu var. Biz lider olacağımıza hələ əmin deyilik, amma birinci olmaq istəyirik".
Qeyd edək ki, ilk turda Qanaya qalib gələn (3:2) Portuqaliya yığması Uruqvayı da üstələməklə 3-cü turun nəticəsindən asılı olmayaraq 1/8 finala vəsiqəni təmin edib. Komanda son turda dekabrın 2-si Cənubi Koreya ilə qarşılaşacaq.