Dövlət Sərhəd Xidmətinin (DSX) Sərhəd Qoşunlarının “Horadiz” sərhəd dəstəsində “Dini radikalizmin səbəbləri və doğurduğu nəticələr” və “Hərbi xidmət əleyhinə olan cinayətlər” mövzularında maarifləndirici tədbir təşkil olunub.
Bu barədə AZƏRTAC-a DSX-nin mətbuat mərkəzindən məlumat verilib.
Bildirilib ki, DSX-nin hərbi qulluqçularının və Respublika Hərbi Prokurorluğunun nümayəndələrinin iştirakı ilə keçirilən tədbirdə Dövlət Himni səsləndirilib, Ümummilli Lider Heydər Əliyevin və Vətən uğrunda canlarını fəda etmiş şəhidlərin əziz xatirəsi bir dəqiqəlik sükutla yad edilib.
Çıxış edənlər dini radikalizmin dövlət təhlükəsizliyinə, ictimai-siyasi sabitliyə, habelə ordu sıralarında nizam, intizam və vətənpərvərlik ruhuna mənfi təsirləri barədə ətraflı danışıblar.
Dini radikalizmin səbəblərinə toxunularaq qeyd edilib ki, bu prosesin kökündə təhsilsizlik, dini biliklərin yanlış mənbələrdən əldə olunması, sosial-iqtisadi amillər və düşmən qüvvələrin təxribatçı fəaliyyətləri dayanır. Azərbaycan dövləti hər zaman milli-mənəvi dəyərlərin qorunmasına xüsusi önəm verir və dini dözümlülük mühitini dünyaya nümunə olaraq təqdim edir.
Tədbirin davamında hərbi xidmət əleyhinə olan cinayətlər barədə vacib məsələlər şəxsi heyətin diqqətinə çatdırılıb, hərbi xidmətin təkcə fiziki bacarıq və fədakarlıq deyil, eyni zamanda, ciddi hüquqi məsuliyyət tələb edən vəzifə olduğu, əmrə tabe olmama kimi hərəkətlərin yalnız fərdi məsuliyyət yaratmadığı, xidmət kollektivinə və dövlətin müdafiə qabiliyyətinə ciddi ziyan vurduğu bildirilib, bu cür hüquq pozuntularına qarşı mübarizədə birgə səyin vacibliyi xüsusi qeyd edilib.
Tədbirin sonunda şəxsi heyəti maraqlandıran suallar cavablandırılıb, müzakirələr aparılıb.
